Siumup siulittaasussarsiornissaa sapaammut kinguartinneqarpoq

Siumup ataatsimeersuarnera silamik angallannermillu pissutilimmik allanngortinneqartariaqalerpoq. 

Pilersaarutit naapertorlugit immikkut ittumik ataatsimeersuarneq arfininngornermi ullaakkut 08:30 aallartittussaagaluarpoq, kisianni partiip nalunaaquttap akunneranik ataatsimik kinguartippaa, tikittussat arlallit suli utaqqineqarmata. 

Ataatsimeersuarneq 09:30 aallartimmat, arlallit suli tikissimanngillat. Partiillu aalajangerpaa ullormut oqaluuserisassat allanngortinneqassasut. 

Siulittaasussamik qinersineq aqagu aatsaat pissaaq

Nalunaaquttalli akunneranik ataatsimik kinguartitsineq naammanngilaq, tassami suli arlallit tikissimanngimmata, taamaattumik aalajangerneqarpoq siulittaasussamik siulersuisunillu qinersineq aqagu sapaammi aatsaat pissasut.

Maannamut Vivian Motzfeldt aamma Aleqa Hammond siulittaasunngornissamut sassartutuaapput. Suli nalunarpoq Ineqi Kielsen, Siumup Inuusuttaasa siulittaasussatut sassaqqullugu innersuussaat nalunaanngilaq sassassanerluni.

Naalakkersuisooqatigiinni peqataaneq Vivianip illersorpaa

Vivian Motzfeldt, partiip siulittaasuata Erik Jensenip tunuarnerata kingorna siulittaasuugallartutut inississimasup, siulittaasup nalunaarutaani oqarpoq Siumut innuttaasunut tusarnaarsimasoq akisussaaffimmillu tigusilluni naalakkersuisooqatigiinni peqataalernermigut.

Taassuma partiip naalakkersuinikkut nunami annertuumik inissisimanerlunneranut kukkussutigisimasinnaasat arlallit tikkuarpai.

Taanna ilaatigut erseqqissaatigaa aalisarnermut inatsimmik suliarinnissimaneq, ineqarneq pillugu iluarsaaqqinneq, soraarnerussutisiaqarnermut aaqqissuussineq, amerikamiut tatisinerannut qisuariarneq paatsuungatitsisoq (Jensensip Trumpimut qaaqqusineranut?, aaqq.) allarpassuillu, isummani malillugit Siumup allaanerusumik iliuuseqarfigisinnaasimagaluarai.

Siulittaasuugallartup nalunaarutaa tunngavigalugu maanna partiimi ataatsimeersuaqataasut oqallisigaat.