Mittarfinni misigisat kipiluttunartut

Kikkut tamarmik Kalaallit Nunaannukarusupput. 

Nuummi mittarfissuartaap siorna atulernerata kingorna timmisartumik angalasut takornariallu amerleriarujussuarput.

Oqaluttuaq iluatsittoqarneranit pisuuvoq. Sinerialli tamarmi silarlutsillugu Air Greenlandimut aammali angalasorpassuarnut misigisaavoq nuanninngitsoq.

Air Greenlandip sapaatit akunnerisa siuliani ataasinngornermi juunip 30-ani angallassinissat, marlunngornermi timmisartuussinissat ilaat taamaatiinnartariaqarsimavai. Aammali sapaammi juulip arfergani ataasinngornermilu juulip arfineq-aappaani ullup naalernerani aatsaat timmisartuussisoqarsinnaalertarpoq. Ilulissat silarlummik aamma eqqugaavoq.

Timmisartumik angalaniartorpassuit kinguaatoortut unnuiffissaannik Air Greenlandimit ujarliunneqartariaqalernerannit kinguneqarpoq.

Kalaallit Nunaanni silarlunneranit timmisartumik angallassinissat eqqugaasarnerat takornartaanngilaq. Air Greenlandip siorna juulip qaammataani angalasut 2.000-it missaanniittut aamma sullippai. Ilaasut kinguaattoortut arlallit Kangerlussuup timersortarfiani siniffilerlutik unnuisariaqarnerannik kinguneqarpoq.

Ataqatigiissagassat amerlasut

Ukioq manna aamma taama ajortigaaq. Ingammik Nuummi takornariat amerleriarujussuarnerisa nassataannik kinguaattoortoqartillugu unnuiffissarsiuussisarneq Air Greenlandimut unammilligassaavoq.

- Ataqatigiissagassat imaaliallaannaq aaqqinneqarsinnaanngitsut amerlapput – sulisullu tamaasa aaqqiissutissamik suliaqartikkaluaraanniluunniit imaaliallaannarneqarsinnaanngilaq, Air Greenlandimi piujuartitsinermik attaveqatigiinnermilu pisortaq Inga Dora Gudmundsdottir Markussen oqarpoq.

- Illoqarfinni mittarfeqarfigisatsinni Nuummi, Ilulissani, Narsarsuarmi Sisimiunilu akunnittarfiit isumaqatigiissuteqarfigaagut. Taakku akunnittarfinni unnuiffissat ulloq taanna qanoq amerlatigisut inoqannginnersut ullaat tamaasa nalunaarutigisarpaat.

- Angallassinissanik taamaatitsisoqassagaluarpat attartorsinnaasavut. Piffissamili kingullermi Nuummi Ilulissanilu unnuiffissat naammanneq ajorput. Taamaattumik arlaleriarluta, una sapaatit akunnerata naanera kingulleq aamma, angalasut namminneq unnuiffissarsioqqullugit kaammattorsimavagut. Angalasut imminnut ilisarisimanngitsut aamma ineqatigiikkaarnissaat periarfissaalluni.

- Angalasorpassuit kaammattuuterput qujanartumik ilassilluarpaat, unnuiffissarsigaangamillu paasitittarluta. Tatineqarnitsinnut oqilisaataalaarpoq.

Angalanissamik pilersaarutit nutaat

- Unammilligassatsinnulli aaqqiissutissaanngilaq – tassami angalasussarpassuit angalanissaannik nutaamik pilersaarummik tunineqartussaapput. Tamannalu amerlanertigut uagut suliassaraarput. Taamaattumik angalasut naammagittarnissaannik, sianernaveernissaannik mittarfimmilu saaffiginnittarfimmut saaffiginninnginnissaannik piumaffigalugit nittartakkatsinni Facebookimilu quppernitsinni nalunaarutigaarput.

- Paasissutissanik, unnuiffissanik, illoqarfiliarneqarnissamik nerisaqarnissamullu paasitinneqarnissamik utaqqineq naammagittarsinnaanermik piumasaqarfiusoq ilisimavarput, aaqqiissaqqaarpugulli. Piffissarli tamatumani atorfissaqartinneqarpoq, Inga Dora Gudmundsdottir Markussen oqarpoq.

Silarlunnerata nassataanik unammilligassat saniatigut Nuummi mittarfimmi pissutsit Air Greenlandimut aamma unammillernarput.

- Aallarnissat sioqqullugu sillimaniarnermut suliaqartunit misissortinnissamut tulleriiaartorpassuaqalersarnera aqqusaartarparput, qujanartumilli tikittoqareeraangat nassatat tigunissaannik taamarsuaq utaqqisoqarneq ajorpoq. Aallariartornermili taamaattoqartarluni.

- Nuummi juulip aappaanni aallartussarpassuaqarpoq. Nassatanilli tunniussisarfiup atortorissaarutai arlaleriarlutik unittaqattaarput kinguaattoortitsisumik. Tamanna saaffiginnittarfinni sisamani nalinginnaanngitsumik tulleriiaarpassuaqalernerannik kinguneqarpoq, taamaattoqarneralu paasinartumik angalasunut sulisunullu kipiluttunarpoq.

Sillimaniarnermik suliaqartut amigaataasut

Greenland Airportsip sillimaniarnermik sulisussaaleqinera Air Greenlandip sullissineranut aamma sunniuteqarpoq. Tassami aallarnissaq sioqqullugu angalasunik misissuisarfik naatsorsuutigisamiit kingusinnerusukkut ammarpoq. Nunallu iluani angallassinissamut sunniuteqarluni.

- Taamaattoqaraangat eqqugaalluta kinguaattoortarpugut. Taava angalasussat ulloq taanna unnuiffissarsiuuteqqittariaqartarpagut, Inga Dora Gudmundsdottir Markussen oqarpoq. Mittarfimmiilu unammilligassat allat aamma eqqaallugit.

- Arfininngormat isumannaallisaanikkut ajortoortoqarpoq. Tikittut isertarfii iluamik paarnaarneqarsimanngimmata nunap iluani angalasut aallariartortarfitsigoorlutik isertariaqarsimapput. Nunanut allanut angalasussat isumannaallisaanermik misissorneqareersunut akuliuffigaat.

- Angalasut tamarmik ikiartoqquneqartigatik isumannaallisaanermik aallaqqaataaniik misissorneqartariaqarnerannik kinguneqarpoq. Qujanartumik amerlasuut Tuukkamut ikiartorlutik anereertut ikiuallattoqarneranik kalerrisaarut appippoq – taava angalasut tamarmik mittarfiup illutaaniit anisariaqarlutik, taamaalillutillu aallaqqaataaniit aamma misissorneqaqqittariaqarlutik.

- Taama pisoqartarnera suleriusitsinnut tatisivoq, angalasunullu pisariaqanngitsumik artukkiilluni, ilaallu immaqa meerartaqarlutik. Angalalluni atugarliornarluni. Greenland Airportsimili sulisut ulapputeqaqisut misiginneqatigaavut.

Sulisussaaleqineq

Greenland Airportsimi ajornartorsiutit ilisimaneqarluarput, neriorsuutigaallu ajornartorsiutit aaqqinneqarumaartut.

”Nuummi sillimaniarnermut suliallit massakkuugallartoq immikkut ilinniagallit ikinnerullutik sulipput, sulisullu amerlisarnissaat sukataarutigaarput.

Annerusumik ullup aallartinnerani utaqqineq sivisunerusinnaavoq.

Unamminartorsiornerput pisariaqavissumik sillimaniarnermut sulisunut nutaanut tunngatillugu oqartussaasunut suliassat saniatigut piffissartuutaapput.

Aaqqiissuteqarnissaq sukataarupparput naatsorsuutigaarpullu piaartumik ajornanngitsumik eqaatsumillu Nuummiit angallannerup ingerlaqqilernissaa.”, Greenland Airports Facebookimi quppernermini allappoq.

- Sulisutsinnut angalasunut kinguaattoortunik sullissinianut ullut pikkunarput. Sulilluaqaat, Inga Dora Gudmundsdottir Markussen oqarpoq.

- Angallassinissamik taamaatitsisoqaraangat suliaq annertooq aallartittarpoq. Pisoq qanoq iliuuseqarfigineqassanersoq ingerlatsinermut immikkoortortaqarfiup siullertut misissussavaa – namminneq timmisartuvut atorlugit imaluunniit attartorluta angallassissanersugut.

- Kinguaattoortorpassuit angallanniarlugit marlunngormat ulappuppugut. Tuukkaq Københavnimukassaaq, aamma Jettime atorlugu atlantikoq quulaallugu angallassinissat pingasut, kiisami timmisartoq Airbus A320 180-inik ilaasoqarsinnaasoq DAT-imiit attartugaq timmisartuussivugut.

- Nunalli iluani timmisartuussinissat ullaap tungaani anorlerpallaarnera pissutigalugu iluatsinngillat. Sisimiuniit Ilulissaniillu Nuummukartussat allat aamma kinguaattoorput. Taamaammallu angalasut mittarfiup isersimaartarfiani unnuisippagut, tamannalu Greenland Airportsip qujamasuutigaa.

Silarlunneranit kinguaattoornerit angummaffiginiarlugit pingasunngornermi timmisartuussinerit nangeqqinneqartut Inga Dora Gudmundsdottir Markussen aamma oqarpoq.

Ataatsimiititaliami siulittaasoq isumalluartoq

Akunnittarfinni inissat killeqarnerinut unammilligassat piffissap ingerlanerani aaqqiivigineqassasut Sulisitsisut Akunnittarfiutilinnut, Neriniartarfiutilinnut, Takornarialerisunullu Ataatsimiitsitaliaani siulittaasoq Helge Tangip neriuutigaa.

- Kalaallit Nunaanni silarluttarnera nutaarsiassaanngilaq misigisassanullu ilaalluni. Ajornartorsiutit iliuuseqarfiginissaat soorunami pikkoriffiginerulissavagut, taamaattoqarsinnaaneralu upperaara, Helge Tang oqarpoq.

- Ilulissani mittarfissuaq piareerpat angalasut tikerarnerat ataqatigiinnerulissaaq. Illoqarfiit pingaarnersaanni ilungersuasoqartarneranut oqilisaataassaaq.

Helge Tang, Hotel Hans Egedemi siulersuisuisa aamma siulittaasuusoq, mittarfiup akunnittarfissaanik pilersitsinissamik pilersaaruteqarpoq.

- Inissitassat tamakkerlugit suli inissinneqanngillat, taamaattumik unnuiffigineqarsinnaasut qanoq amerlatigissaneri suli oqaatigisinnaanngilakka. Piviusorsiortumilli oqaatigissagukkit 120-t missaanniipput. Akunnittarfiliornissamik nunaminertamik sanaartorfissamut akuersissummik tunineqaqqammerpugut, taannalu mittarfiup eqqaani biilinut inissiisarfiup eqqannguaniissaaq – tummeqqat qulaanni.