Stina Sværd Meeqqat pillugit Oqaaseqartartunngussaaq
Naalakkersuisut Stina Sværd Meeqqat pisinnaatitaaffii pillugit sullissivimmi MIO-mi Meeqqat pillugit Oqaaseqartartutut nutaatut toqqarpaat, taannalu aggustip aallaqqaataani 2025-mi atorfinitsinneqassaaq.
- Meeqqanut, inuusuttunut ilaqutariinnullu suliassaqarfimmi ukiut 20-t sinnerlugit misilittakkanik, suliatigut kinaassutsimik patajaatsumik meeqqallu pisinnaatitaaffiinut, atugaannut ingerlalluarnerannullu tunngatillugu nammineq inuttut pimoorussinermik Stina nassataqarpoq, Naalakkersuisut nalunaarput. - Nunatsinni meeqqat tamarmik tusaaneqassasut – aammattaaq meeqqat aperineqanngitsut ilanngullugit tusaaneqassasut sulissutiginiarpara. Meeqqat pisinnaatitaaffii inatsisaannaanatillu isumaqatigiissutaannaassanngillat, piviusumili aamma ingerlanneqassapput, Stina Sværd oqarpoq.
Asseq: Naalakkersuisut
Stina Sværd Meeqqat pisinnaatitaaffii pillugit sullissivimmi MIO-mi Meeqqat pillugit Oqaaseqartartutut nutaatut Naalakkersuisut toqqarpaat aggustillu aallaqqaataani 2025-mi atorfinitsinneqassalluni.
Meeqqanut, inuusuttunut ilaqutariinnullu suliassaqarfimmi ukiut 20-t sinnerlugit misilittakkanik, suliatigut kinaassutsimik patajaatsumik meeqqallu pisinnaatitaaffiinut, atugaannut ingerlalluarnerannullu tunngatillugu nammineq inuttut pimoorussinermik Stina nassataqarpoq, naalakkersuisut tusagassiuutitigut nalunaarumminni allapput.
Stina isumaginninnermut siunnersortitut ilinniarsimavoq Nunatsinnilu sumiiffinni arlalinni sulianik suliarinnittartutut, aqutsisutut kajumissutsiminillu suliaqartutut sulinikuuvoq suliassaqarfimmilu inatsisinik ilisimasaqarluarluni. Ukiuni 18-ini Stina ilaqutailu ilaqutariittut paarsisartuusimapput, taamaammat meeqqat sakkortuumik aqqusaagartut pisariaqartitaannik Stinamut immikkuullarissumik ilisimasaqalersitsisimavoq. Ukiorpassuarni kajumissutsini atorlugu sulinerminut tunniusimanerata, meeqqanut inuusuttunullu pitsaasunik pilersitsiniarluni siamasissumik suleqateqarnissamut piginnaasaqarnera annertunerulersissimavaa.
- Stinap Meeqqat Oqaaseqartartuattut sulilernissaanut isumalluarpunga. Stinap nunatsinni pissutsit minnerunngitsumillu meeqqat atugaat ilisimaarilluarpai, qularutiginngilaralu Stina sulinermini meeqqat naligalugit sullissinini ingerlatissagaa. Naalakkersuisutut tulluussimaarutigaara Meeqqat Oqaaseqartartuattut Naalakkersuisuniit toqqaanermut peqataasinnaagama, taama oqarpoq Meeqqanut, Inuusuttunut Ilaqutariinnullu Naalakkersuisoq, Mads Pedersen.
Nunatsinni meeqqat tamarmik tusaaneqassasut – aammattaaq meeqqat aperineqanngitsut ilanngullugit tusaaneqassasut sulissutiginiarpara. Meeqqat pisinnaatitaaffii inatsisaannaanatillu isumaqatigiissutaannaassanngillat, piviusumili aamma ingerlanneqassapput, Meeqqat pillugit Oqaaseqartartussatut toqqagaasoq, Stina Sværd oqarpoq.
Meeqqat pillugit Oqaaseqartartoq aammalu Meeqqat pillugit Siunnersuisoqatigiit siulittaasuat
Stina Meeqqat pillugit Oqaaseqartartutut Meeqqat pisinnaatitaaffii pillugit sullissivimmi MIO-mi ersarissumik siuttuussaaq, tassanilu aamma Meeqqat pillugit Siunnersuisoqatigiit allattoqarfillu ilaapput.
- Taamaasilluni Stina Meeqqat pillugit Siunnersuisoqatigiinni siulittaasunngussaaq MIO-milu pisortaaninngussalluni, akisussaaffigisassai tassaapput:
- Meeqqat atugaannik pisinnaatitaaffiinillu oqaluuserisassanngortitsineq
- Oqartussaasoqarfinnik suliniaqatigiiffinnilu siunnersuineq
- Meeqqat pisinnaatitaaffii pillugit Naalagaaffiit Peqatigiit isumaqatigiissutaata malinneqarneranut nakkutiginninneq
- Meeqqat inatsiseqarnikkut isumannaatsuunerannik ingerlalluarnerannillu siuarsaaneq
- Meeqqat inuuneranni atugarisaat pillugit ilisimasanik katersillunilu ingerlatitseqqinneq
