Sulisitsisut sulisuminnik nikisitsipput

Kalaallit Nunaanni Sulisitsisut (GE) ullumikkut 350-nik suliffeqarfinnik ilaasortaqartut, taakkulu katillugit 7.000-inik sulisoqartut, maanna allattoqarfimmi nutaamik pisortartaarput, taamak Sulisitsisut tusagassiuutinut nalunaaruteqarput.

Sulisitsisut allattoqarfimminni pisortartaavat tassaavoq Dan Sivertsen, taannalu Airgreenland/Grønlandsfly-mi timmisartunik iluarsaassisartutut ilinniarsimasuuvoq kingornalu Københavnip Universitetiani inatsisilerituutut bachelorinngorluni, tamatumallu kingornatigut Juris Doctor USA-mi inatsisilerituunngorluni. 

Dan Sivertsen ukiuni arlaqartuni eqqartuussisorisoqarfinni tusaamasaasuni arlariinni New York-imi sulisarsimavoq, tamatumallu kingorna Kangiani Qiterlermut nuussimalluni, tassanilu aningaasalersueriaatsinut- aammalu nukissiuuteqarnermut tunngasunik suliaqarsimalluni. Dan Sivertsen kingullermik Namminersorlutik Oqartussani atorfeqarsimavoq, tassanilu qitiutillugit  erngup nukinga atorlugu Kalaallit Nunaanni nukissiuutitut atorneqarsinnaaneranut annertusaanissamik suliaqarsimalluni.

- Sulisitsisuni nuannaarutigaarput Dan ilagileratsigu. Nukittuutut aammalu misilittagaqarluarnermigut Dan Sulisitsisut peqatigiiffianni taannaqqissaarpoq iluaqutaalluartussaq, tassalu inuussutissarsiortunut periarfissanik nutaanik aammalu qulequttani angisuuni suleqataanermigut, matumani annermik piujuaannartitsinermik ineriartortitsinermik, nunatsinnik aammalu ilaasortanut suliffeqarfiutilinnut.

Dan Sivertsen amerikamiumik nuliaqarpoq Karen-imik atilik, taanna oqaluttuarisaanermut tunngasunik ilinniagartuujuvoq aammalu marluullutik pingasunik inersimasunik meeraqarlutik. Dan-ip sunngiffimmini pinngortitamiinneq nuannaraai, taamaasilluni soqutigisani piujuaannartitsinermik ineriartortitsineq aamma piujuaannartitsinermut ikaarsaarnermut tunngasut soqutigilluarneranut takussutissaalluni.

Lyberth-Klausen siunnersortaaninngussaaq

- Dan-ip atorfinitsinneqarneratigut kingumut qujassuteqarfigerusupparput Karsten Lyberth-Klausen ukiut 22-it sinnerlugit Sulisitsisuni atorfeqarsimaneranut, kingullermik Allattoqarfimmi pisortatut.

Karsten siunnersortaanertut piffissap ilaannaanik ingerlagallassaaq aammalu suli suleqatigut pingaartutut peqataassalluni.