Nunaqarfiit
Taama amerlatigisut inuerutereersimasut
Nunarput nunaqarfippassuaqarpoq. Kisitsisilli mianersortumik takussutissiipput. Nunaqarfiit 18-it inuerussimapput. Inoqarfinni minnerpaani inuuneq oqilisarniarlugu kommuni maanna misiliiniarpoq.
Nunaqarfiit oqaluttuarisaanerat inuerukkiartornerinnaanngilaq, aammali uummaarinneq, isumalluarneq ataatsimoornerlu pineqarlutik. Ineriartornerulli illuanut saatinnissaa ajornakusoortuuvoq.
Leiff Josefsen
Nunaqarfiit Nunatta ilumoortortaatut ilaannikkut taaniarneqartarput, ileqqutoqqanik ataqqinniffiusutut. Nunattali ilumoortortaa annikilliartorpoq. Ineriartorneq aamma sukkatsikkaluttuinnarpoq.
- Inoqarfiit minnerpaat 1977-imiilli 18-inik ikileriarsimapput, ullumikkullu inoqarfiit 700-t ataallugit inullit 61-iullutik, nuna tamakkerlugu nalunaarusiami kingullermi taama allassimavoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit siunissami taamaallaat
atuarneqarsinnaajumaassapput.
Atuarluarna.
Kisitsisit allat ineriartornermik allamik aamma takussutissiipput. Inuit 25 procentii inoqarfinni 700-nit ikinnerusunik inoqartuni 1977-imi najugaqarput, ullumikkulli 15 procentiinnaat najugaqarlutik .
- Taakku 60 procentinik inukinnerulersimasut, nalunaarusiami allassimavoq.
Nunatsinni kommunimi inuttunersaasumi, Kommuneqarfik Sermersuumi, periusissiamik suliaqartoqaqqamerpoq, nunaqarfiit ineriartornerannik isiginninniarfiusumik, immaqalu inukilliartuinnarnerannut unikaallatsitsisinnaasumik. Tamannami anguniakkani arlaliusuni neriuutigineqarpoq.
Borgmesterip Avaaraq Olsenip oqaatigaa, inuit piginnaaneqarnerannik ineriartortitsinissaq pilersaarummi qitiutinneqartoq: - Inuit ataatsimoornerillu inoqarfinni qitiupput,“ taanna siuleqummi taama allappoq.
Kommunimi nunaqarfiit mikinerit arfineq-pingasuupput, tassa Arsuk, Kapisillit aamma Qeqertarsuatsiaat, Kuummiit, Kulusuk, Sermiligaaq, Tiilerilaaq aamma Isertoq. Taakku Kommuneqarfik Sermersuumi innuttaasut tamarmiusut 4,5 procentiinnaraat, taakkunanilu aamma inuerukkiartortoqarluni.
Assersuutigalugu Arsummi ukiuni kingullerni innuttaasut 106-init 72-inut ikileriarsimapput. Kapisilinni 83-init 43-nut, tassa affaannanngorsimallutik. Kuummiinilu 331-nit 250-inut ikileriarsimallutik. Nunaqarfiit allat assingusumik inukilliartorput.
Angutit utoqqaat amerlanerusut
Kommuneqarfik Sermersuumi nunaqarfinni nunallu sinnerani nunaqarfinni innuttaasut utoqqaliartuinnarnerat immikkut ilungersunartuuvoq. Utoqqaat peerukkaangata nutaanik ikittuinnarnik nuuttoqartarpoq. Inuusuttullu ilinniagaqarniarlutik nuukkaangamik nunaqarfimminnut uterneq ajorput.
Arnat ikinnerusut nuanniilliortoqarneranut tunngaviusinnaapput.
Ingammik Nuuk nutserfigiumaneqartorujussuuvoq. Illoqarfiit pingaarnersaat ukiuni qulikkaani kingullerni tallimani nuna tamakkerlugu innuttaasut 17 procentiinik inoqariarluni maanna 35 procentiinik inoqalersimavoq.
Nunap sinnerani inuit nunap immikkoortuini illoqarfinnut annerusunut aamma nuuttarput.
Nuna tamakkerlugu pilersaarusiami oqaatigineqartut naapertorlugit innuttaasut 85 procentii illoqarfinni annerni 14-ini najugaqarput, illoqarfinni mikinerni 14-ini innuttaasut 0,8 procentiinnaat najugaqarlutik.
Inoqarfinni mikinerni — 50-it inorlugit inulinni — utoqqaat amerlapput, aamma angutit arnanut sanilliullugit amerlanerullutik, tamannalu oqimaaqatigiissutsimut allanngortitsisarluni nuanniilliuutaasarlunilu.
Aammattaaq nunaqarfiit kisimik allanngoriartunngillat; oqaatsit aamma allanngoriartorput. Naalakkersuisunit inoqarfik ullutsinni, sumiiffinnut tamanut inoqartunut atorneqarpoq. Taaguutit illoqarfik aamma nunaqarfik siunissami inatsisiliortoqartillugu atorneqarunnaassapput – taakkununnga taarsiullugu inoqarfiit atorneqalissallutik.
