SIUMUP IMMIKKUT ITTUMIK ATAATSIMEERSUARNERA
Taasisinnaatitaasut 41-t Siumup siulittaasussaanik arfininngorpat qinersissapput
Arfininngorneq juunip 28-ani partiimi Siumumi siulittaasussaq toqqarneqassaq. Tamanna pissaaq immikkut ittumik ataatsimeersuarnermi Nuummi, siulittaasuusimasup Erik Jensenip qinersinermi ajorsarnerup kingorna tunuarnerata malitsigisaanik.
Siumup siulittaasorigallagaa, Vivian Motzfeldt siulittaasutut sassarluni nalunaaruteqareerpoq. Siumup allattoqarfiata aamma uppernarsarpaa Aleqa Hammond siulittaasunngorniarluni sassartoq. Siulittaasussatut sassartut amerlanerusut takkussinnaapput, tassami partiip immikkut ittumik ataatsimeersuarnerani partiip ilaasortai tamarmik naggatissaa tikillugu sassarsinnaatitaapput.
Assinik katiterisoq: Linda Lyberth Rachlitz
Avataaniit isiginnittuulluni oqartoqarsinnaavoq partiimi Siumumi arfininngorpat juunip 28-ani Nuummi ataatsimeersuartussami, eqqissisimasumik ingerlasoqanngitsoq.
Inatsisartunut marsimi Inatsisartunut qinersinermi ajorsarnerup kingorna, kiisalu apriilimi kommunalbestyrelsimut qinersinermi, Inatsisartunut qinersinermiit taama annertutiginngikkaluartumik kinguariartup qanoq ingerlariaqqinnissaa pillugu ataatsimeersuartut aalajangersaanissaat apeqqutaavoq.
Taamatuttaaq siulittaasuusimasup Erik Jensen piumasaqarnikuuvoq partii naalakkersuisooqatigiinniiginnassanersoq nalilersorneqassasoq, apeqqusiinerlu taanna siaruarsimasoq malunnarpoq.
Gabrielsen
Kingullertigut Avannaata Kommuniani borgmesteri, Lars Erik Gabrielsen (S) Naalakkersuisunut ammasumik isornartorsiuivoq Kalaallit Nunaata Danmarkimut EU-mullu isummani malillugu pituttoraluttuinnarnera pillugu, isumaqarami Naalakkersuisut innuttaasunit akuersissummik peqarnatik Kalaallit Nunaat Danmarkimut EU-mullu pituttoraat.
Gabrielsen aamma Naalakkersuisut isornartorsiorpai soraarnerussutisiaqarnermut aaqqissuussineq pillugu. Partiip ilaasortaata ilaasa attaveqaqatigiittarfiit aqqutigalugit Gabrielsen kajumissaarpaa siulittaasunngorniaqqullugu, tamannali suli inuttaata erseqqissumik akissuteqarfiginngilaa.
Kielsen
Erik Jensenip siulittaasunngornissaa sioqqullugu, maanna Inatsisartut siulittaasuat Kim Kielsen siulittaasuuvoq.
Kielsenip ersarissumik partiimut siulittaasunngoqqinnissani kissaatiginikuuaa. Taanna partiip ataatsimeersuarnerani aasaanerani 2023-mi siulittaasunngorniarluni sassarpoq, kisianni taamani Siumup folketingimi ilaasortaatitaa, Aki-Matilda Høegh-Dam aamma siulittaasussatut sassaqataavoq. Kielsenip suli Siumut siulittaasuuffigissallugu kissaatiginerlugu aammalu sassarnissaminut pilersaaruteqarnersoq, Sermitsiamit akissutissarsiniarluta sulissutigaarput.
Hammond
Aleqa Hammond Siumut Sisimiunit aamma kingusinnerusukkut Siumut Uummannamit siulittaasussatut sassassasoq innersuussutigineqarpoq, Siumup allattuuneqarfianit Sermitsiaq paasitinneqarpoq innersuussineq inuttaata akuersaarsimagaa.
Taanna partiimi siulittaasuusimavoq piffissami 2009-2014. 2016-imi partiimit anisitaavoq, kingusinnerusukkullu Vittus Qujaukitsoq peqatigalugu partii Nunatta Qitornai pilersippaat, partii 2018-miit 2021-mut ataatsimik ilaasortaatitaqarpoq, tamatumali kingorna iseqqinngitsoorluni, kingornalu partii matuneqarpoq, Aleqalu 2021-imilu Siumup ilaasortanngoqqissinnaasoq akueraa.
Motzfeldt
Vivian Motzfeldt Siumumut aquummik tigusivoq Erik Jensen marsimi siulittaasutut tunuarmat. Tamatuma saniatigut, marsi 2022 aallarnerfigalugu nunanut allanut tunngasunut Naalakkersuisutut atuuffeqalerpoq, manna tikillugu ingerlataminik. Siulittaasutut sassarnissani siusinnerusukkut nalunaarutigereerpaa.
Siumup immikkut ittumik ataatsimeersuarnera pissaaq arfininngorneq juunip 28-ani nal. 08:00-17:00.
Siulittaasumik siulersuisunillu qinersineq ualikkut pisussaavoq. Tassani siulittaasumik qinersinerup saniatigut siulittaasup tullii marluk aammalu siulersuisuunerni ilaasortat pingasut qinerneqassapput.
Tamanna sioqqullugu partiip anguniagaanik iluarsiinermut, ilaasortat siunnersuutaannik oqaluuserinninnermut, naatsorsuutinik akuersinermut malittarisassanillu allannguinermut piffissaq atorneqassaaq.
