TAKORNARIALERINERMI AKUERSISSUTEQARTARNEQ PILLUGU INATSISISSAQ
Takornariaqarnermut inatsisissaq borgmesterip ernummatigaa
Qeqqata Kommuniata borgmesteria, Malik Berthelsen (S) takornariaqarnermut inatsisissatut siunnersuummut maanna tusarniaassutigineqartumut naammaginninngilluinnarpoq. - Aseruissaaq, nunatta takornariaqarnikkut ineriartorniaraluarneruinnaanngitsumut, aammali nunatta aningaasaliiffigiuminarsarnerigaluanut akerliugami tusaamanerlutsitsilissaaq, taanna oqarpoq.
Takornarialerilluni ingerlatseqatigiiffissuup Albatrosip Kangerlussuarmi hoteli pisiaraa 1. august 2023. Kingusinnerusukkut ingerlatseqatigiiffik nalunaarnikuuvoq Nuummi Ilulissanilu mittarfissuit atuutilereernerisa kingorna Kangerlussuarmi pilersaarutiminik annikillisaaniarnani. Maannali borgmester Malik Berthelsen ernumavoq takornariaqarnerup ineriartortinneqarnera innarlerneqassasoq takornariaqarnermut inatsisip nutaap kingunerisaanik.
Assiliisoq: Leiff Josefsen
Ingerlatseqatigiiffiit takornariaqarnermi nunatsinni suliaqartut pilersaarutiminnik unikaallatsitsinngikkunik unitsitsillutik aallartereerput,”sumiiffinni immikkut toqqakkani takornariartitsisarnernut
akuersissuteqartarneq pillugu Inatsisartut inatsisissaattut siunnersuut” pissutigalugu.
Qeqqata Kommuniata borgmesteria, Malik Berthelsen (S) ernummatigaa taamatut pisoqarnera kommunimini ingerlatseqatigiiffinnut takornarialerinermik suliaqartunut tamanna aamma tuniluutissasoq:
- Inatsit saqqummiunneqarnermisut iluseqarluni akuersissutigineqassappat, kommunitsinni pitsaanngitsumik sunniuteqassasoq qularutissaanngilaq, Malik Berthelsen oqarpoq.
Hotel Kangerlussuaq sooq tuniniarneqarpa, kingornalu piginnittuulernikoq nunatsinnit anisinniarlugu?
Inatsisissatut siunnersuummi pisinnaatitaaffinnut tunngasut
Borgmester Malik Berthelsen (S) Naalakkersuisunut kaammattuuteqarpoq inatsisissatut siunnersuut allanngortinneqassasoq, immikkut ittumik piumasaqaatit pisinnaatitaaffinnut tunngasut eqqarsaatigalugit.
Inatsisissatut siunnersuummi ilaatigut allassimavoq:
§ 19. Takornariartitsinermut
akuersissut taamaallaat nalunaarutigineqarsinnaavoq inummut tigussaasumut
tulliuttunik piumasaqaatinik tamakkiisumik naammassinnittunut:
1) Inuit Kalaallit Nunaanni inuit
allattorsimaffianni nalunaarsorsimareersimasut siumoortumik minnerpaamik
piffissami ukiunik 5-inik ataatsimut sivisussuseqartumi.
2) Inuk Kalaallit Nunaanni inuit
allattorsimaffianni nalunaarsorsimasoq.
3) Inuk tamakkiisumik Kalaallit Nunaanni
akileraartartuusoq.
§ 20. Takornariartitsisarnermut akuersissut
taamaallaat ingerlatseqatigiiffimmut piumasaqaatinik tulliuttunik
naammassisaqarsimasumut nalunaarutigineqarsinnaavoq:
1) Ingerlatseqatigiiffik
aktiaatileqatigiiffiuvoq imaluunniit piginneqatigiiffiulluni, imaluunniit inuup
nammineq ingerlatseqatigiiffiutigalugu Kalaallit Nunaanni
angerlarsimaffeqartoq.
2) Minnerpaamik aktiaatit imaluunniit
piginneqatigiissutit 2/3-ii aningaasaliissutaasuni pigineqarput toqqaannartumik
imaluunniit toqqaannanngitsumik inunnit ataasiakkaartuinit, § 19 naapertorlugu
3) Minnerpaamik 2/3-it peqataasuni inuup
ingerlatseqatigiiffiutaani aammattaaq § 19-imik naammassinnittuussapput.
Maliup ernummatigaa takornariaqarneq Kangerlussuarmi aserorneqassasoq:
- Kangerlussuarmi takornariaqarnerup annersaa aserorneqassaaq. Pissutigalugu takornarissat amerlanerpaat Kangerlussuarmut tikittartut tassaapput Albatros aqqutigalugu tikittartut. Albatros aamma taannaavoq Kangerlussuarmi akunnittarfimmik pisisoq aammalu timmisartut suli siunissami Kangerlussuarmut tikittuaannarnissaannut tikisitsisarnissaminut naammattumik nukittussusilik. Paasisinnaanngilaralu Naalakkersuisut nunatta avataaneersut mattunneqarnissaannik siunertaqarsimagunik, taava sooq Kangerlussuarmi akunnittarfik Albatrosimut tunisimaneraat, borgmesteri aperivoq.
Heliskiieng aamma ajalusoorneqassaaq
Borgmesterip ernumanera Kangerlussuarmuinnaq tunnganngilaq, tassami Maniitsumi ukiut tamaasa heliskiingimik annertuumik isertitaqartitsisartumik ingerlatsisoqarnera aamma aserorneqariaannaasoq, Berthelsen oqarpoq tunngavilersuilluni:
- Upernaat tamaasa Maniitsumut sisoriartitsisarneq aningaasanik annertuumik kaaviaartitaqarfiusartoq aamma aserorneqassaaq. Tassami sisoriartitsisarneq Maniitsumi akunnittarfimmut, targa-nik angallassiartunut aammalu Air Greenlandip helikopteriutaanik attartornermut annertuumik iluaqutaasarpoq. Taakkualua tamarmik upernaat tamaasa kaaviaartikkakaminnik annaasaqassapput. Eqqaamaneqassaarmi qaqqani portusuuni sisoriartitsisinnaasutut ilisimasallit nunatsinni najugallit naammanngimmat. Taamaattumik sisorariartitsisinnaanermik piginnaanillit amerlisarnissaat Naalakkersuisut sulissutigeqqaartariaqaraluarpaat.
Borgmesterip aamma ernumassutigaa inatsit Hotel Sømamut Sisimiuni sunniuteqarnerloriaannaassasoq:
- Sisimiuni Hotel Søma ullumikkut iniutimik annertuumik allilerilluni sanaartortitsivoq. Aamma taanna inatsisissamik ajortumik innarleqassava? Qeqqata Kommuniani borgmesteri pakatsisimaqaluni aperivoq.
Takornarialerineq pillugu inatsit aalisarnermut inatsimmut sanillersuunneqarsinnaanngilaq
Malik Berthelsen isumaqataagaluarluni takornarialerinermit aningaasat kaaviiartinneqartut nunatsinniitinniarnissaat qulakkeerneqartariaqartoq, taamaattoq taanna anguniakkamut aqqutissiuussineq sukumiisumik nalilersorluarneqarlunilu oqaluuserineqaqqaartariaqartoq, taamaammallu Naalakkersuisut inatsisissatut siunnersuumminnik allannguisariaqartut Inatsisartunut suliassanngortinneqartinnagu:
- Isumaqarpunga takornariaqarneq Aalisarnermut Inatsisissamut assersuunneqarnera kukkunerusoq. Pissutigalugu aalisagartassanik nalituunik pisassaatilittuulli takornarialerisut aningaasanik atorniarnissaminnut periarfissagissaartiginngillat. Taamaattumik piginnittut minnerpaamik 67 procentiisa nunatsinni najugaqarnissaannik piumasaqaat isumaqarpunga kommunetsinnut piviusorsiortuunngitsoq.
Anguniakkat annertuut akissaqartinneqaqqaartartussaapput
Borgmesteri Naalakkersuisunut kaammattuuteqarpoq ajornanngitsunnguusoq eqqarsassalluni suna tamaat nammineq akissaqartikkipput, uffa piviusut ersersikkaat akissat killeqartut, tamanna pinngippat isertitsissutaasartoq seqummakoq naggataatigut kiserngoruteriaannaammat.
- Inuiaqatigiittut kissaatigaarput takornariaqarneq nunatsinnut pitsaasumik inerisarneqassasoq, taannami aamma suliffissaqartitsilluartunut ilaammat, aqqutissaanngilarli aningaasaliiumasut piiaaannarnissaat, tamanna kukkuneruvoq, taamaammat Naalakkersuisut suliaq pineqartoq pillugu eqqarsaqqittariaqarput, aammalu tamanit peqataaffigineqarsinnaasumik angusaqassagunik attuumassuteqartut minnerunngitsumillu kommunit oqaloqatigeqqaarlugit alloriaqqittariaqartut isumaqarpunga, borgmesteri kaammattuuteqarpoq.
Naalakkersuisoq oqaloqatigiinnissamut qaaqqusivoq
Inatsisissatut siunnersuut pillugu aviisimi Sermitsiami apersorneqarluni, inuussutissarsiornermut naalakkersuisoq Naaja H. Nathanielsen (IA) oqarpoq, hotelinik ingerlatsineq inatsisissatut siunnersuummi pineqanngitsoq, aammalu oqaloqatigiinnissamut qaaqqusisimalluni:
- Paatsuuineruvoq akunnittarfinnik ingerlatsineq inatsimmi ilaasoq. Taamaassimasuuppat isornartorsiuineq isumaqatigissagaluarpara. Akunnittarfinnilli ingerlatsineq namminermini inatsimmi ilaanngilaq, taamaattumik aamma nunaqavissuunissamik piginnittuunissamilluunniit piumasaqaatini ilaanani.
- Inatsimmi pineqarput suliffeqarfiit takornarianik angalatitsisut (ulluinnarlutik). Taamaattumik akunnittarfiit namminerminni angallassinernik tuniniaagunik akuersissuteqassapput, piginnittussaanermillu piumasaqaatini ilaallutik, allalli angalatitsinerannik akunnermiliuttuugunik taamaanngilaq. Paatsuuineq tamanna pinngitsoortinniarsimavarput, maajip 27-anni ataatsimiinnissamut qaaqqusinitsinni kiisalu susassaqartunut suliniaqatigiiffinnullu saaffiginninnitsinni, Naalakkersuisoq oqarpoq.
