KL

DK

Tasiilami inuusuttut pillugit filmi nutaaq nunani allani soqutigineqarluartoq

Filmi naatsuliaq ‘Anngeerdardardor’ Berlinalenimi takutinneqassaaq, maannalu filmi Tasiilameersoq filmfestivalini allani aamma soqutigineqarlualerpoq. Ilitsersuisoq Christoffer Rizvanovic Stenbakken oqaloqatigaarput.

Tasiilami inuusuttut arlallit filmiliornermi misilittagaqarnatillu ilinniagaqarsimanatik peqataapput. Filmiliornermik suliaq taakkununnga ataqqinaataasoq ilitsersuisoq oqarpoq.
Morten Okkels Tusagassiortoq
Saqqummersinneqarpoq

urifi

Filmi naatsoq “Anngeerdardardor” Berlinimi Filmfestivalimi, aamma Berlinalemik taaneqartartumi, takutinneqassasoq Sermitsiami naatsumik juullinngitsiartoq allaaserineqarpoq

Paasisaqarnerorusulluta Christoffer Rizvanovic Stenbakken, Tasiilami peroriartorfimmini filimiliamini ilitsersuisoq, attaveqarfigivarput.

Aluu Christoffer Berlinalenimi takutitsilernini pilluarit. Ilitsersuisutut tulluusimaarsimassaatit?

– Aap, soorunami nuannaarutigeqaara. Aammali oqaatigisariaqarpara Tasiilami inuusuttut peqataasut pisooqataapput. Taakkuami filmimi inuttaaqataapput, taakkualu oqaluttuaat aallaavigalugit filmiliarineqarpoq.

Oqaluttuaat, qanoq paasillugu?

– Filmiliornissamut piareersaatitut illoqarfimmi workshoppertitsivunga. Kamillo Ignatiussenip, filmimi Kaali, qimmeq pillugu oqaluttuuppaanga, nuannareqaaralu. Oqaluttuarlu taanna tunngavigalugu filmiliorpunga. Namminiulluni inuttaaqataanngilaq, oqaluttuarli piviusumit aallaaveqarpoq.

‘Anngeerdardardor’-mi susoqarpa?

– Nukappiaraq Kaali pineqarpoq, taanna immikkuullarilluinnartuuvoq qimmeqarlunilu nuannarilluakkaminik. Ullut ilaanni qimmia tammarpoq, qularinngilluinnarpaa tillinneqarsimasoq. Ikinngutinilu qimmini ujarpaat. Illoqarfimmilu angalaarnerminni Kaali allaanerulluinnarnerminik paasitinneqarpoq, taavalu aalajangerpoq... a tassami, tamaat oqaluttuarissanngilara!

Kamillo Ignatiussenimit inuttaaffigineqartoq Kaali Tasiilami unnukkut immiunneqarnera. Mikkel Paalu P. Biancop aamma Simujook Ikilallu inuttaaqataaffigisaat filmi 20 minutsinik sivisussuseqarpoq.

Berlinimimi qanoq pisoqarumaarneranik oqaluttuarsinnaanerpit? 

– Aappi, Berlinale nunarsuarmi filmfestivalit annerpaanut pingasut ilaattut isigineqarpoq, tassanilu nunarsuarmi takuteqqaarneqarnissamut toqqarneqarpugut. Filmit inuusuttunut saaffiginnissutaasut unammissutigineqartut ilaattut peqataavugut, tassa Generationimik taaneqartartumi. Berlinimi malugineqaratta festivalertitsisartut amerlasuut allat aamma saaffiginnipput.

Nunanit allanit soqutigineqarnersi qanoq kingunissaa neriuutigaajuk?

– Neriuppunga filmi aqqutigalugu Tasiilami inuusuttut qanoq piginnaasaqartiginerat inunnit paasineqarnissaanik iluaqutaassasoq, tamannalu takutissinnaagukku tulluusimaarutigissavara.

– Filmi taanna tamakkiisumik kalaallinit aningaasalersorneqarmat aamma nuannaarutigeqaara, aamma filmi Kalaallit Nunaannit kalaallillu pillugit pimmat.

Kalaallit Nunaanni innuttaasut filmi qanoq isiginnaarsinnaavaat?

– Berlinimi februaarimi takuteqqaarneqaqqaassaaq, neriuutigaarpullu kingusinnerusukkut festivalini allani takutinneqassasoq. Tamatuma kingorna neriuppugut KNR-ikkut aallakaatinneqarsinnaajumaartoq. Air Greenlandip filmi aamma aningaasaleeqataaffigaa, taakkulu aamma periarfissinneqassallutik.

– Filmip siammarterluarnissaa Kalaallit Nunaannilu inuit sapinngisamik amerlanerpaat akeqanngitsumik isiginnaarnissaanut periarfissinneqarnissaat uagutsinnut pingaaruteqarpoq, Christoffer Rizvanovic Stenbakken erseqqissaavoq.

Berlinale februaarip 13-ianniit 23-anut ingerlanneqassaaq. Ullormi apersuiffimmi ulloq takutitseqqaarfiusussaq ilisimaneqanngilaq. Christoffer Rizvanovic Stenbakkenip apersorneqareernermi kingorna Tasiilamiit Berlinimut angalasoqarnissaa sulissutigineqartoq ilisimatitsissutigaa.

film christoffer rizvanovic stenbakken inuiaqatigiit kultur tasiilaq

ATORFIIT Se alle jobs

Powered by Labrador CMS