Politiiusimasoq pinngitsaaliisimasutut sakkukinnerusumik pineqaatissinneqartoq
Qaqortumi politiiusimasoq ukiut arferngat avillugu pineqaatissinneqarsimasunut inissiisarfimmiittussanngortinneqarpoq. Taassuma eqqartuunneqarnera Nunatsinni Eqqartuussisuuneqarfimi marlunngornermi ualikkut naammassineqarpoq.
Assi: Morten Okkels
Politiiusimasoq 31-nik ukiulik ukiut arferngat avillugu pineqaatissinneqarsimasunut inissiisarfimmiittussanngortinneqarpoq. Nunatta Eqqartuussisuuneqarfiani angutip unnerluutigineqarneranut tunngasunik arlalinnik ulluni kingullerni suliaqarfiusumi taama inerniliisoqarpoq.
Unnerluutigineqartup, Eqqartuussisoqarfik Sermersuumi marsimi eqqartuunneqarnermini ukiut arfineq-aappaat avillugu pineqaatissinneqarsimasunut inissiisarfimmiittussaanngortinneqarnermi kingorna, eqqartuussut nammineq suliareqqitassanngortippaa. Taamaalillunilu Nunatta Eqqartuussisuuneqarfiani sakkukinnerusumik pineqaatissinneqarluni. Unnerluussisussaatitaasup eqqartuussut sakkortunerussasoq piumasaqaatigaa.
Angutip isumapiloqarluni tatiginnilersitsiniaasimasutut unnerluutigineqarnermini Nunatta Eqqartuussisuuneqarfiani pisuunngitsutut nalilerneqarnera Eqqartuussisoqarfik Sermersuumi aalajangiinerup allaanerussutigaa.
Angut politiiusimasoq badmintonimi sungiusaasutut kajumissutsiminik suleqataanini aqqutigalugu niviarsiaqqat ilisarisimalersimavai. Qaqortormiuuvoq Nunatinnili sumiiffinni allani kannguttaatsuliorneri pisimallutik.
Suliami atinik saqqummiusseqqusinnginneq pissutaalluni Sermitsiami allaaserineqartut siuliini paasissutissat eqqaaneqartut ilaat saqqummiunneqanngillat.
