Timmisartoq Narsarsuarmiit Danmarkimukartoq kingulleq qangattartoq
Jettimesip Narsarsuarmiit Københavnimut pilersaarutaasumik timmisartuussinera kingulleq qangattarpoq, Narsarsuullu mittarfia nunanit tamalaanit atorneqarunnaariartornera nalliulluni.
Narsarsuarmi mittarfik qulimiguulinnut, pilersaarutit malillugit aappaagu, mittarfigineqalissaaq.
Toqqorsivimmit: Leiff Josefsen
Narsarsuarmi timmisartoq Københavnimeersoq maannamut pilersaarutit malillugit naggammik tikimmat tussunngusoqarpoq.
- Oqaluttuarisaanermut pingaarutilik, Greenland Airports Facebookimi quppernermini allappoq.
USA-p mittarfik Bluie West One-mik taallugu sorsunnersuup aappaata nalaani sanavaa. Narsarsuaq kingorna ilaasunik angallassinermut ammarneqarpoq. Mittarfik Kalaallit Nunaanni angallannermi ukiuni qulikkuutaani arlalinni pingaaruteqarsimavoq, nunap immikkoortuani nunarsuullu sinneranut.
Jettimep Air Greenland sinnerlugu timmisartoq Boeing 737 atorlugu timmisartuussiffigisarpaa. Timmisartoq taamaattoq Narsarsuup mittarfianut tulluarpoq, sumiiffimmi Nuummiit Kangerlussuarmiillu minnerugami.
Narsarsuaq mittarfittut atorneqarunnaalernera nalliuppoq. Qaqortumi mittarfissap nutaap kujataani timmisartuussinermut qitiusumik inissisimalernissaata tungaanut timmisartuussinernut naannernut suli atorneqassaaq. Qaqortumi mittarfissaq pilersaarutaasutut 2026-mi atulissaaq, qaqugorpiarli pissanersoq suli ilisimaneqanngilaq.
Tamatuma kingorna Narsarsuarmi mittarfik qulimiguulinnut mittarfiulissaaq. Tamanna nunaqarfimmi suliffissat suliassallu pillugit apeqqutinik arlalinnik pilersitsinikuuvoq, tassanimi mittarfik aalajangiisuulluinnarami.
Marlunngormat timmisartuussinermit assilisat Greenland Airportsip Facebookimi quppernerani takuneqarsinnaapput.
