Tom Dansip kalaallit qisuariarnerat pakatsissutigaa
Præsidentip tulliata nulia Avannaata Qimussersuanut qaaqqusimallugu Amerikamiu niuertoq Tom Dans X-imi allappoq.
Foto: Oscar Scott Carl
Kalaallit Nunaat ulluni kingullerni soqutingineqangaatsiarpoq, tassami Amerikamiut nuimasut aallartitaat nunatsinnut tikeraarniarlutik nalunaarput.
Ippassarli pisussat allanngorput, USA-mmi præsidentip tulliata nuliata Usha Vancep Nuummut Sisimiunullu tikeraarnissani taamaatimmagu. Taassuma Avannaata Qimussersua sapaatip-akunnerata naanerani pisussaq takornariarniaraluarpaa.
Uini, præsidentip tullia J.D. Vance, nukissiornermut ministeri Chris Wright isumannaallisaanermullu siunnersorti Mike Waltz ilagalugit Pituffimmukartussanngorpoq.
Tamanna Kalaallit Nunaata Danmarkillu piffissaq tikeraarfiusussaq arlaleriarlutik akerlerereeraallu pivoq. Tikeraarnissarmi Naalakkersuisut nutaat suli ivertinneqanngitsut pisussaammat.
Tom Dansip, American Daybreakimik pilersitsisup, tamanna pakatsissutigaa. Peqatigiiffik taanna Kalaallit Nunaata USA-llu attaveqatigiinnerannik nukittorsaasussatut suliniuteqarpoq. Donald Trump Jr.-ip tikeraarneranut Tom Dans aamma suleqataavoq.
- USA-p Kalaallit Nunaannik tapersersuinera kulturimillu, ileqqutoqqanik innuttaasunillu ilinniarnissamik neriuuteqarnera pillugu akeqqersimaartumik qisuariartoqarnera - tusagassiuutitigut eqqunngitsumik saqqummiussisoqartarnera pissutigalugu - American Daybreakimit uanniillu pakatsissutigeqaarput, Tom Dans inuit attaveqaqatigiittarfianni X-imi allappoq.
Kiap kina qaaqquaa?
American Daybreakip Usha Vance Avannaatalu Qimussersua takornariarniarlugu Kalaallit Nunaannut qaaqqusimagaa Tom Dans aamma allappoq. Tom Dansip tikeraarnissani pilersaarutigereersimavaa.
- Marsip aallartinnerani præsidentip tulliata nulia naalakkersuinikkullu qaffasissumi atorfillit allat kulturikkut aaqqissuussaq immikkorluinnaq ittoq alutornartorlu misigissallugit qaaqquavut.
KNQK-p Kultureqarnermut Ilinniartitaanermullu Naalakkersuisoqarfimmut qinnuteqaataani, Sermitsiap takusimasaani, peqatigiiffiup amerikamiut sukkanniunnermut isiginnaariarnissaannut aamma qaaqqusimagai allassimavoq. Ilersornissamut ministeri Pete Hegseth qaaqqusiniarsimagaluarlugu peqatigiiffik Facebookimi unnuaq allappoq.
Danmarkimi Kalaallit Nunaannilu politikerit USA-p iliuusai “ataqqinninngitsuliornertut” aamma “akuerineqarsinnaanngitsutut” oqaatigaat.
Pisut USA-p Kalaallit Nunaatalu akornanni attaveqarnermik ajoqusiisut Tom Dans allappoq.
- Tusagassiuutitigut allaaserisat aamma Kalaallit Nunaanni oqartussat ingattajaarlutik qisuariarnerat USA-p Kalaallit Nunaatalu sivisuumik attaveqarluarnerannut, ataqqeqatigiinnermik, ataatsimut soqutigisaqarnermik inussiarnernermillu tunngaveqartumut, ajoqutaapput. USA attaveqatigiiinnerup annerulernissaanik neriuuteqaraluarpoq.
