Tusassimi ataatsimeersuarnermi siulersuisuni ilaasortat nutaat toqqarneqartut
Namminersorlutik Oqartussat suliffeqarfiutaanni siulersuisuni siulittaasuusoq taarserneqarpoq.
Bodil Marie Damgaard Tusassimi siulersuisuini siulittaasunngorpoq.
Foto: Leiff Josefsen
Tusassimi immikkut ittumik ullumi ataatsimeersuartoqarpoq. Siulersuisunut qinersineq allallu kisimik oqaluuserisassaapput.
Ulrik Blidorf siulersuisuni siulittaasutut tunuarpoq, Bodil Marie Damgaardilu siulittaasunngorluni.
Suliffeqarfimmi Namminersorlutik Oqartussanit pigineqartumi siulersuisut amerlanersaat Naalakkersuisunit toqqarneqartarput.
Tusass ukiumi pissanganartorsiorfiusumi angusarissaarsimasoq, Naalakkersuisut siulittaasuat Jens-Frederik Nielsen (D) ataatsimeersuarnermi oqarpoq.
Ilaatigut attaveqaatit, soorlu qaammataasatigut attaveqaatit, nutarterneqarnerat aningaasaliiffigineqarpoq.
Ulrik Blidorf nutaaliornermik aqutsisimanera pillugu qutsavigaa Bodil Marie Damgaardilu siulittaasutut tikilluaqqulugu.
Taanna naatsorsuuteqarfigineqarluarpoq. Suliffeqarfiup inuiaqatigiinnut sullissinerata ingerlaannarnissaa taassuma qulakkeertussaavaa, oqarpoq.
Ukiuni qulini siulittaasuusoq
Siulittaasuujunnaartoq Ulrik Blidorf oqaaseqarpoq.
- Ukiuni qulini siulersuisuni ilaasortaasimanera ukiunilu kingullerni pingasuni siulittaasuusimanera nuannaarutigaara, angusavut tulluusimaarutigeqaakka, oqarpoq.
Ilaatigut eqqaavai internetti sukkanerusoq, akit appasinnerulersimasut, attaveqaatit ullutsinnut naleqquttut Tusass Musicilu.
Nukissat nutaat sulilernissaannut piffissanngortoq isumaqarpoq, aamma siulersuisut nutaat pilluaqquai, sulisullu suliaminnik ilisimasaqarluartut sulilluarnissaannik kissaallugit.
Tatiginninnermut qujasoq
Siulittaasunngortoq Bodil Marie Damgaard qinigaanermini oqaaseqarnissamut aamma periarfissaqarpoq. Tatiginninnermut qujavoq atuuffigilikkanilu akisussaafferujussuarmik nassataqartoq piareersimaffigalugu oqarpoq.
- Tusass suliffeqarfiuvoq aalajaatsoq ingerlalluartorlu. Ukiorpassuarni angusaqarluartoq, tamatumunngalu atatillugu Ulrik Blidorf immikkut qujaffigisariaqarparput, oqarpoq.
- Nalunngilara siulersuisunut siulittaasutut tunniusimalluinnartuusimasutit, nuannarineqarlutillu peqataatitsillutit siulersuisunik aqutsisuunikuusutit.
Tusassimi siulersuisut aqutsisullu suleqatigilernissaat qilanaaraa, qularutiginngilaalu pissanganartorpassuarnik suliassaqarumaarluni.
Bodil Marie Damgaard Air Greenlandimi 2020-miit 2024-mut siulersuisuni siulittaasuunikuuvoq.
Siulersuisunut ilaasortaq nutaaq
Camilla Ley Valentin siulersuisuni aamma ilaasortanngorpoq. Eqalunnguaq Abel Kristiansen siulittaasup tulliatut ingerlaqqippoq, Maja Mathilde Motzfeldt-Haahr aamma Kim Kyllesbech Larsen ilaasortaaginnarput.
Kim Hammond Zinck, Lars Holm Hansen Benedikta Naamansenilu aamma siulersuisunut ilaasortaapput. Sulisunit taakku qinigaapput.
