Tyskit sakkutuuisa imarsiortut umiarsuaat qaaqqusisoq

Tysklandip sakkutuuisa umiarsuaanni annerpaat ilaat, FGS Berlin, Nuummut ulluni tulliuttuni tikissaaq. Umiarsuup inuttai soqutiginnittunik tamanik sapaammi ualikkut qaaqqusipput.

Tysklandip imartaani una assilisaavoq, qanittukkulli FGS Berlin Kalaallit Nunaannut perngaammik tulassaaq.

Assi: Ein Dahmer / Creative Commons

Morten Okkels Tusagassiortoq

Saqqummersinneqarpoq 15. Aggusti 2025 - 15:33

Annonse

Tyskit sakkutuuisa umiarsuaat pilersuisoq FGS Berlin, Nuummiinnerani sapaammi aggustip 17-ianni nalunaaqutaq ataatsip sisamallu akornanni takornariarneqarsinnaavoq.

Kikkulluunniit umiarsuarmi takornariartitsinermi peqataasinnaapput, inuttallu naapinneqarlutik, umiarsuarmi inuttat tyskillu aallartitaqarfiat qaaqqusissummi neriorsuipput.

FGS Berlin Tysklandip sakkutuuisa imarsiortut umiarsuaataasa annersaat ilaraat.

Umiarsuaq assartuutaavoq, assersuutigalugu umiarsuarnut allanut orsussamik, sakkussianik, nerisassanik imermillu assartuisartoq.

Umiarsuaq Atlantikup avannaani sungiusarnermut ‘Atlantic Bear’-imut aggustimi septembarimilu peqataassasoq aallartitaqarfik ilisimatitsivoq.