Ujaasineq: Inuk ataaseq ajunaarsimasoq nassaarineqarpoq - inuk alla ataaseq ajunaarsimasinnaanissaa ilimagineqartoq

Sisamanngornermi avannaani nunaqarfiup Savissiviup eqqaani alianartumik pisoqarsimavoq.

Nalunaaqutaq 16.00 missaani umiatsiaq marlunnik ilaasoqartoq ilimagisatut nunaqarfimmut utersimanngitsoq oqartussanut nalunaarutigineqarpoq.

Issittumi Sakkutooqarfik Sermitsiamut ilisimatitsivoq politiit kalerrinneqarsimasut, nunaqavissullu umiatsiaaqqanik ujaasiartorsimasut.

Ualikkut umiatsiaq inuttaqanngitsoq nassaarineqarsimavoq, qanittuanilu inuk ataaseq ajunaarsimasoq aamma nassaarineqarsimalluni.

Politiit Issittumilu Sakkutooqarfik qulimiguulimmik aallartitsipput, taannalu unnuakkut ujaasinerup unitsinnissaata tungaanut maqaasineqartup aappaa ujarsimagaluarpaa.

Maqaasineqartup aappaanik ujaasineq maanna unitsinneqarsimalerpoq, oqartussallu naliliipput aamma taanna ajunaarsimasinnaassasoq.

Ilaqutaasut maanna ilisimatinneqareersimalerput.