KL

DK

ISUMAGINNINNERMI IKIORSIISSUTIT

Ukiuni qulini affaannanngortinneqarput

Kalaallit Nunaanni Naatsorsueqqissaartarfiup kisitsisaataasa nutaat takutippaat sulisinnaasut amerlanerpaat suliffeqartut taamaalillutillu imminnut pilersortuusut.

2014-mi 7.887-iniit 2023-mi 3.022-nut. Tassa taamak amerlatigisunik ikileriaateqarput isumaginninnikkut ikiorsiissutinik qinnuteqarnermikkut pissarsisarsimasut. Taamatuttaaq suliffeqannginnermi, angerlartitaanermi napparsimanermilu suliffeqanngikkallarnermi ikiorsiissutinik pissarsisarsimasut ikiliartorput.
Jensine Berthelsen
tusagassiortoq
Saqqummersinneqarpoq

2023-mi 3.022-t  katillugit  pisortanit  ikiorsiissutinik  pisimapput,  taakkunannga  1.821-t katillugit suliffeqanngikkallarnermi ikiorsiissutinik kiisalu 719-it  katillugit  ernereernermi ullormusianik pisimallutik, nunatta naatsorsueqqissaartarfiata utaqqiisaagallartumik isertitanut taarsiissutaasunik ikiorsiissutinik pisartut pillugit kisitsisaatai nutaat taamak ersersitsipput.

162 millioner koruuniniit 49 millionit koruuninut

Inuit utaqqiisaagallartumik isertitanut taarsiissutaasunik pisariaqartut affaannanngorsimanerat ukiuni kingullerni qulini ersersitsivoq aamma  inuiaqatigiinnut iluaqutaasumik inerneqartoq.

Pisortat 2014-mi 162 millionit koruunit sinnerlugit ikiorsiissutinik tunniussisimapput, kisianni 2023-mi aningaasat 48 millionit koruunit sinnilaaginnarlugit amerlassuseqarlutik.

Kisitsisinut taakkununnga sanilliullugu nunatsinni suliffissarsiortut aatsaat taamak ikitsiginerat, taakku ataatsimut isigalugit nunatsinnut iluaqutissiisimassasoq qularutissaanngilaq, tassa inuiaqatigiit tamanut iluaqutissiisumik (win-win) inissisimalersimapput; ikiorsiissutinut aningaasartuutit appasinnerupput -illuatungaanilu sulillutik imminnut pilersortut amerliartornerisigut akileraarutitigut isertitat amerlanerusut.

Covid-19 kisitsisitigut takuneqarsinnaavoq

Suliffeqanngikkallarnermi ikiorsiissutit tunniunneqartartut annertussusaat 2022-mut sanilliullugu 40 pct.-inik annikillisimapput. 2023-mut sanilliullugu 2022-mi  ukiup affaani siullermi coronamik napparsimasut pissutaallutik utaqqiisaagallartumik isertitanut taarsissutit 2023-i  ikilerujussuarput. 

Ilaatigut taakku pissutaallutik 2023-mi  suliffeqanngikkallarnermi  ikiorsiissutinik  pissarsisimasut 1.146-nik 2022-mut sanilliullugit ikilipput.

Ernereernermi il.il ullormusiat ukiut taakku ingernanerini assigiikannersumik inissisimareerlutik takuneqarsinnaavoq 2023-mi aatsaat taamak ikitsigisimasut.

grønlands statistik samfund inuiaqatigiit offentlige ydelser

ATORFIIT Se alle jobs

Powered by Labrador CMS