Ulloq unnuarlu nalunaarusiaq: Mobilit arlallit tillinneqartut

Sisimiuni sisamanngornerup unnuaani tillinniartoqarmat iPhonet mobilillu allat tillinneqarput.

Sisimiuni Pisiffiup immikkoortortaqarfiani Pisattani sisamanngornerup unnuaani nalunaaqutaq 03.19 tillinniartoqarsimasoq Kalaallit Nunaanni Politiit pigaartuisa pisortaat Jørgen Madsen Sermitsiamut ilisimatitsivoq.

- Innuttaasut takusaqarsimasut politiinut nalunaaruteqaqqillugit qinnuigaavut, Jørgen Madsen oqarpoq.

Pisinermut uppernarsaat takujumajuk

Politiit suliaq misissuiffigaat, maannamulli pasisaqaratik.

Tillitanik pisisut unnerluutigineqarsinnaasut Kalaallit Nunaanni Politiit erseqqissaapput.

- Innuttaasut mobiltelefonimik pisinissamut neqeroorfigineqarunik pisinermut uppernarsaatissaanik tajumasarnissaat pitsaassaaq, pigaartut pisortaat oqarpoq.

Tillinniarnermi mobiltelefonit qassit tillinneqarsimanersut Kalaallit Nunaanni Politiit maannamut ilisimanngilaat.