Umiarsuaq kivisimasoq dieselimik 20.000 literit angullugit imalik

Maluginiaruk: Kalaallit Nunaanni Politiinit paasissutissanik ilassuteqarfigineqarsimalluni nutarterneqarpoq.

Umiarsuaq Nanortallip eqqaani kivisimasoq Kalaallit Nunaanni Politiit Sermitsiamut ilisimatitsipput.

Umiarsuaq 30 meterisut takitigisoq sumiiffimmi tassani ikkarlissimasoq oqartussat sisamanngornerup unnuaani nalunaaqutaq 03.09 nalunaarfigineqartut, pigaartut pisortaat Bent Johnsen oqaluttuarpoq.

Umiarsuup kivinnginnerani umiarsuarmiittut aniguisinneqarput.

Ujaasineq annaassiniarnerlu aallartipput, ajoqusertoqanngilarlu, pigaartut pisortaat oqarpoq.

Umiarsuup kiviffiani uuliakoormat qatserisartut sulipput. Qanoq annertutigisumik uuliakoortoqarsimanersoq suli ilisimaneqanngilaq, qatserisartulli uuliakuuiaaleruttorput.

Assiaquttamik puttasuliisoqartoq

Aammattaaq umiarsuarmit kivisumeersumit annanniutit sumiiffimmi kiviffiusup nalaani takussaasut, pigaartut pisortaat oqaluttuarpoq:

- Annanniutit inuit takusinnaassavaat, oqartussaasullu tamanna eqqumaffigaat, Bent Johnsen oqarpoq.

Umiarsuaq kivisoq 15.000 aamma 20.000 literit akornanni annertutigisumik dieseleqartoq, tamatumalu saniatigut uulia motoorimut atorneqartartoq 1000 literit missaanniittoq, sisamanngornerup ullaap tungaani politiit tusagassiuutinut nalunaarummi allapput.

- Umiarsuup kivisup eqqaani mingutsitsisoqarnissaa pinngitsoortinniarlugu 50 meterisut silitsigisumik assiaquttamik puttasuliisoqarpoq. Puttasoq aamma 50 centimeterisut ititigisumiippoq, politiit tusagassiuutinut nalunaarummi allapput.

Politiit qatserisartullu umiarsuarmit mingutsitsisoqarsinnaanera pillugu suliaqarniarlutik sisamanngornermi ullaap tungaani suli sumiiffimmiipput.

Umiarsuaq Qaqortup tungaanut ingerlaartilluni Nanortallip eqqaani kivisimasoq politiit aamma ilisimatitsipput. Nal. 01.45 umiarsuaq ikkarlippoq, tamatumalu kingorna immalluni aallartissimavoq. Nal. 07.05 umiarsuaq kivivoq.