Utoqqaat illuanni najugaqartoq ajunaarluni toqusoq
Nuummi utoqqaat illuanni najugaqartoq ajunaarluni toquvoq. Kommuneqarfik Sermersooq taama nalunaarpoq. Kommuni maanna utoqqaat illuanni puigortunngorsimasunut immikkoortortami isumannaallisaanermut malittarisassat tamaasa misissorsorpai.
Nuummi Utoqqaat Illuat.
Assi: Kommuneqarfik Sermersooq
Nuummi utoqqaat illuanni ajunaartoqarpoq.
Utoqqaat illuani puiguttortunut immikkoortortaqarfimmi najugaqartoq marlunngornerup unnuaani septembarip 23-anni igalaamit nakkarpoq, aqqunarsimaninilu pissutigalugit kingornalu nuummi napparsimavimmi toqukkut qimagulluni. Kommuneqarfik Sermersooq nittartakkamini taama nalunaarpoq.
Sulisut ikiueqqaarnermik ingerlatsipallapput ambulancemillu aggertitsinerup nalaani najugaqartoq attaveqarfigaat. Naak iliuuseqapallattoqaraluartoq najugaqartoq peqqissavimmi marlunngornermi ullaakkut toquvoq, kommuni ilisimatitsivoq.
- Tamatta pisoq tupassutigeqaarput, siullertullu ilaqutaasunut qanigisaasunullu asasaminnik annaasaqartunut misiginneqataanerput apuukkusupparput, isumaginninnermut suliffissuaqarfimmullu aqutsisoqarfimmi pisortaq Ejner Grønvold oqarpoq.
Sikringip periutsinik misissuineq ingerlanneqassaaq
Utoqqaat illuanni errortuisarfimmi igalaakkut nakkarneq pivoq, tassa 1. salimiit. Sumiiffinni, puiguttortut ulluinnarni nakkutigineqaratik isersimaffigisinnaasaanni igalaat allallu annerfigisinnaasaat nalinginnaasumik isumannaallisarneqartarput.
- Isumannaallisaaffiusinnaasut suut tamaasa isumannaallisaaffigisinnaanngilagut. Tamanna isumaqarpoq, sumiiffinni minitaqarluni najugaqartunit annerfigineqarsinnaanerinut ilimanaateqarsinnaaneri nalilersuisoqartuaannartoq. Errortuisarfimmi igalaap isumannaallisaataa equngasimavoq, ikkusimanerlulluni. Tamanna piaarnerpaamik isumannaarneqarpoq, aamma suleriaasigut qulaajarneqaqqipput, Ejner Grønvold oqarpoq.
Pisortap sulisut pisumi eqqortumik sukkasuumillu iliuuseqarnerat pillugit qutsavigai.
