Aaqqissueqatigiittartut: Iluatsittumik aaqqissuusseqqissaagut

Nunatsinni qamuteralannik sukkaniuttartut pikkorinnerit aqqanillit, meeqqallu sapiitsut qulit Greenland Hill Climb Championshipimi ukioq manna apriilimi pissartanngorniupput. Pissartanngorniunnerlu aningaasaliisunit isiginnaartunillu iluatsilluartutut isigineqarmat, aaqqissuisut aappaagu aamma pissartanngorniuttoqarnissaanik pilersaaruteqalereerput.

- Greenland Hill Climb Championship 2026 poorskikkunni ullut marluk ingerlaneranni ingerlanneqassaaq, pilersaarutaasutut sisamanngornermi apriilip aappaanni aallartissalluni. Silap qanoq innissaa apeqqutaatillugu pisariaqassappat ataasinngornerup apriilip arfernata (poorskip aappaata) tungaanut aaqqissuussineq allanngortissinnaavarput, Larseeraq Egede aaqqissuisut sinnerlugit oqarpoq, taakkununngalu ilaallutik Lasse Trolle aamma Victor Meinel. 

Nutaarsiassat pitsanngorsaanerillu

Unammiuaarneq Nuummi majuartaatip eqqaani, Qoororsuarmi ingerlanneqassaaq – ukioq mannatulli, tassani unammisunut aqqutissiortoqassalluni, isiginnaarianut inissaqassalluni meeqqanullu sammisassaqartitsisoqassalluni.

Aaqqissuisut qisuariaatinik pitsaasunik tigusaqarsimapput aamma pitsanngorsaataasussanik ukioq manna isumassarsiarpassuaqarlutik, maannalu taakku ineriartortinneqaleruttorlutik.

- 2025-mi iluatsilluarsimasut tunngavigalugit suli nutaanerusunik pitsanngorsaatinillu suliaqassaagut, taama oqaaseqartoqarpoq. 2025-mi tatsimit qummut Quassussuup qaavanut aqqutigineqartussat aqqutigalugit sukkaniuttoqarpoq. 2026-mi unamminerit nutaanik ilaneqassapput, ilaatigut aqqutigineqartussani allani arnat aamma utoqqasaat sukkaniutissallutik. arpannerat aamma angutit utoqqasaat arpaffiit immikkoortut atorlugit arpattarnissaat. Tamatuma saniatigut meeqqat aamma sukkaniutsinneqaqqissapput. Meeqqallu ikinnerpaamik aqqaneq-marluk peqataanissaat anguniarneqarluni, angutini utoqqasaat qulit aamma arnat tallimanit arfineq-pingasunut amerlatigisut kiisalu ukioq manna angutinit aqqanilinnit amerlanerusunit peqataasoqarnissaa anguniarneqarluni. Aamma aaqqissuussinerup ulluni marlunni ingerlanneqarnerani isiginnaariat ikinnerpaamik 600-700-t takkukkumaartut naatsorsuutigineqarpoq. 

Sukkaniuffiit assigiinngitsut toqqaannartumillu aallakaatitsinerit 

Aaqqissuisunit periarfissanik nutaanik aamma oqalliseqartoqarsimavoq, soorlu ”sukkaniuffiit assigiinngitsut” oqaloqatigiissutigineqarlutik. Soorlu peqataasut tatsip eqqaanit aallarteriarlutik Quassussuup qaavanukassallutik uterlugulu.

Sukkaniunnerit YouTubekkut toqqaannartumik malinnaaffigineqarsinnaanissaat naatsorsuutigineqarpoq, taamaalilluni isiginnaartunit malinnaaffigiuminarnerussallutik.

Aamma sumiiffiit ataqatigiinnerunissaat aaqqissuisunit sammivaat, ingammik majuartarfiup eqqaani tatsimi, tamaani biilit angallannerat, isiginnaartut inissisimaffissaat isumannaallisaanerlu erseqqinnerusumik aaqqissuussaassallutik. Tamakku saniatigut perusuersartarfiit siorna amigaatigineqarmata, aaqqissuussiffiup eqqaani tamakkuninnga pilersitsisoqarnissaa sulissutigineqarpoq.

Aningaasaliisussanik ujaasineq

Suliffeqarfippassuit aningaasaliisartut qamuteralattartut sinerissameersut Nuummut tikinnissaannut qulakkeerinnittuupput. Assersuutigalugu Royal Arctic Linep qamuteralannik Nuummut assartuineq aningaasaleeqataaffigaa, illoqarfimmilu pisiniarfiit arlallit sinerissamit angalasut timmisartumut bilitsissaannut aningaasaliillutik.

- Aningaasaliisinnaasunik suli oqaloqateqarpugut. Aaqqissuussinernilu pisussat aningaasaleeqataasinnaasunik pisariaqartitsisorujussuusarput. Illoqarfimmi suliffeqarfiit ingerlatsisullu qamuteralannik timersuuteqarnernut ataatsimoornissamillu tapersersuerusuttut suleqatigiilluarsinnaassallugit neriuppugut, aaqqissuisut oqarput, aamma taakku pilersaarutigaat illoqarfimmi neriniartarfiit caféllu peqataanissaannut qaaqquneqarsinnaassasut, soorlu ullormi aaqqissuussiviusuni tuniniaaveqarnermikkut.