Aarlerisaarut: Qalerallinik angisooqanngingajattoq

Sinerissap qanittuani qaleralinniarneq pillugu pisassiissutinik Naalakkersuisut ikilisitsinissaminnik kaammattoqqinneqarput.

NAFO-p (Northwest Atlantic Fisheries Organization) qaleralinniarneq pillugu siunnersuutaa nutaaq Pinngortitaleriffiup saqqummiuteqqammerpaa.

Qalerallit Avannaata Kitaani sinerissap qanittuaniittut tatineqarnerat siunnersuummi oqariartuutigineqaqqippoq. Pisarineqartartut maannakkumit appartinneqarnerujussuusariaqartut tassani siunnersuutigineqarpoq.

Qeqertarsuup Tunuani, Uummannami, Upernavimmilu ukiuni arlalinni ikiliartornerat takussutissaqareersoq Pinngortitaleriffik allappoq - ilaatigut aalisakkat angisoortaqarpiannginnerat pillugu allappoq:

  • Qalerallit tulaanneqartartut millisimapput

  • Qalerallit angisoortaqarpianngitsut

  • Pisarineqartartut ikiliartortut (oqummersakkuutaartumik pisarineqartartut) aalisartut nalunaarsuusiorfiini takuneqarsinnaasoq

  •  Aalisarnermi aalisakkanillu misissuinermi ukioqatigiiaat ikittunnguusartut (ukioqatigiiaat marluk-pingasuinnaasarput).

Avataani pisassiissutit attatiinnarneqarput

Nunatta Kitaata avataani qalerallit nunatta Canadallu akunneranni avinneqartartut eqqarsaatigalugit, NAFO-p avataanut siunnersuinera 2025-mut 2026-mullu allannguuteqangaanngilaq.

Pisarineqartartut nalunaarsorneqarnerisa matematikkilu atorlugu naatsorsuinerit avataata qaleraleqassusiata ikileriaateqarsimannginneranik takutitsinerinik tamanna peqquteqartoq, Pinngortitaleriffik allappoq.

Nunatta Kangiata avataani, Tunumi, qalerallit 2024-mi pisarineqarsimasunut sanilliullutik pisarineqartussat 9%-inik ikinnerussasut ICES-i siunnersuisoq, Pinngortitaleriffik nangilluni allappoq.

- Qaleraleqassutsip siornarnik ikileriaateqarsimanera ikileriarnissaannut peqqutaavoq. Neriuutissaqarluarporli, tassami qaleraleeqqat ukiuni tulliuttuni pisarineqarsinnaalertussat amerlammata, Pinngortitaleriffik allappoq.

Siunnersuutit pillugit Pinngortitaleriffik imatut takussutissaliorsimavoq:

Powered by Labrador CMS