MOTOORI
Aavarneq aallartippoq
Qerititsivik ulikkaarlugu immerneqassaaq. Ukiakkut aavartarneq amerlaqisut inuunerannut ilaalluinnarpoq. Jan Erik Pedersenimut piniarneq, aalisarneq naatitsinerlu inuusaatsimut ilaavoq.
Jan Erik Pedersen erninilu aggustip aallartilaarnerani tuttunik marlunnik pisaqarput.
Assi: Nammineq pigisaq
– Umiatsiaq
umiarsualivimmi orsersuleruttorpara, aqagumi ullaakkut aallaqqinniassagama, Jan
Erik Pedersen oqarasuaatikkut oqarpoq.
Aggustip
aallaqqaataanni aavarneq aallartimmalli arlaleriarluni aavareersimalerpoq,
maannalu ullormi ataatsimi aavaqqilaarniarluni.
Sunngiffimminni pinialuttartunut aavarneq aggustip aallaqqaataanni aallartittoq, oktobarip 31-ata tungaanut aavarnissamut periarfissivoq
Assi: Nammineq pigisaq
–
Ilaquttakka ilagalugit juulip 31-anni aavarlunga aallarnerusarpunga. Ernera
Jonas, ukuara, soraluara kuisimmallu tigumiagara ilagalugit, ukioq manna
aallarpugut. Aggustip aallaqqaataanni aavarneq aallartikkaangat, Nuup
Kangerluani piareersimajuaannarpugut.
Ukiulli 20-t
ingerlaneranni ullormi tassani siullermeerluta tuttumik
takusaqanngilluinnaratta, tamatumunnga taarsiullugu eqalunnik pisaaqqammersunik
nerilluta ikumatitallu saavani kakaavisorluta nuannisarpugut. Eqaluit ukioq
manna kusanartorujussuugamik, maannamullu eqaluppassuit pisarisakka
qerititsivinni inissaarutilerput.
Tuttut marluk pisarigaat
Jan Erik
Pedersenip oqaatigaa, eqqumiinnerarlugu aggustip aallaqqaataanni tuttut
tamaaniinngimmata, allanimmi aavartoqanngimmat nunallu naanera kusanarmat
annerusumillu mangiarneqarsimanani.
Jan Erik Pedersenip ernini Jonas ukioq manna aggustimi aavaqatigigaa.
Assi: Nammineq pigisaq
- Ullualuit
qaangiummata erneralu pisukkatta tuttut pingasut takuavut, taakkunanngalu
marluk pisaralugit. Tamanna ajunngilluinnarpoq. Ernera qanittukkut Danmarkimut
nuuttussaagami, qerititsivimminiitsitassaminillu neqimik pissarsinissaa
pingaaruteqarluni.
Jan Erik
Pedersenip siornatigut aavarfiup nalaani tuttorpassuit pisarisarsimagaluarpai.
Ukiunili kingullerni taamaallaat arfinillit arfineq-marlulluunniit
pisarisarlugit.
Jan Erik Pedersen piniarnerup aalisarnerullu saniatigut angummi illuaratoqaani kangerlummiittumi naatitsivimmi naatitanik naatitsisalersimavoq. Aggustimi ruuat, radisit aamma jordbærit inerilluartarput.
Assi: Nammineq pigisaq
- Pisariaqartitakka
kisiisa pisarisarpakka. Qerititsivik ulikkaartarpara, inuuissiornerni
juullimilu neqissaqarniassagatta, taava aamma utoqqarnut tunniussilaartarpunga.
Jan Erik
Pedersen tungernik qaqortunik ukioq manna nassataqarpoq, tuttut
aattorneqareeraangata poortuutigisakkaminik.
Nammineq naatitat namminerlu immussualiaq
Jan Erik
Pedersen piniarianngikkaangami aalisarianngikkaangamiluunniit, kangerlummi
angummi illuaratoqaaniittarnini nuannarisaqaa. Illuaraq aamma illumik
naatitsiveqarpoq tassanilu ruuat, rødbedet, jordbærit, radisit naasullu
mamarsaatissat assigiinngitsorpassuit naatittarlugit.
– Piffissami
matumani sapaatip akunneri tamarluinnaasa naatitanik nutaanik aallertarpunga.
Tamarmik puttussuunnerat naajartornerallu iserluni takullugit nuannertaqaaq,
Jan Erik Pedersen oqarpoq, taassumalu aqissit aamma piniagaaleqqammernerat
nuannaarutigaa.
