Biilit atortorissaarnerpaat innaallagissamik ingerlasut

– Meeqqat inuusuttullu ilaasa assatik biilit nillusaataasa matuata qaavatigut ingerlatittarpaat, Morten Nordahl, Nuuk Centerimi pisiniarfimmi Nønnemi piginnittoq Porsche Taycan Cross Turisme 4S-imillu piginnittoq oqarpoq.

Kalaallit Nunaanni siullersaasoq 

Taycan, Porschep biiliu innaallagiatortut siulliit, 2022-mi tuniniarneqalerput, Morten Nordahlilu siulliit ilaanniilluni Kalaallit Nunaannukaattussanngorlugu 2023-mi pisiaraa. 

– Taycan biilitaarinngikkallarakku Porsche Cayenne plug-in hybrid-imik biileqarpunga. Biilit taakku nuannareqaakka, innaallagiaannarmilli ingerlasunik biilitaarusuppunga, tamannami maani Kalaallit Nunaanni, Utoqqarmiut Kangerluarsunnguanni innaallagissiorfeqartilluta silatusaarneruvoq. Biilit taakku pilerinerpaavakka, Morten Nordahl oqarpoq, taassumalu Cross toqqarpai. Atai silaannalimmik maavaarsaateqarput, biilit taamaalillutik toortagaq toorlugu 15 centimeterit missaannik qullarneqarsinnaalluni. Biilit ataanni maavaarsaat silaannalik - Ukiuunerani iluaqutaasaqaaq. Naak ikinnguterpassuamma biilimma nusunnissaat quianarunartikkaluaraat suli apummi magguttoornikuunngilanga, Morten Nordahl oqarpoq.

Taanna taamanikkut Porsche Cayennemik biileqarnermini Porschemik biilerneq nuannarilerpaa.

- Biilit taakku assut nuannarilerpakka. Pitsaassusaat, ilorrisimaarnartuunerat biilernermilu ingerlaartarnerat. Tamarmik nuanneqaat. Porche atortugissaarnerpaapput.

Utoqqarmiut Kangerluarsunnguannit innaallagiaq 

Morten Nordahl naapertorlugu Nuummi aqquserngit takivallaanngitsut aamma biilit innaallagiatortut ingerlavigisinnaasaannut naleqqulluinnarput. – Biilit unnuit tamaasa angerlarsimaffitsinni sukkasuumik atorluaasumillu sarfalersortarsinnaaniassagatsigu, illuliornitsinni sarfalersuut 32 ampereusoq ikkutsipparput. Utoqqarmiut Kangerluarsunnguanniit innaallagialersorneqarsinnaalluni benzinamik umiarsuakkut tikisitsisarneq isumassaqanngitsoq isumaqarpunga.

Nipaatsut maluginiarneqartariaqartullu 

Biilit nipaqanngilluinnarput, illoqarfimmili inuppassuaqarfiusumiikkaanni Porschep “electric car sound”-ia (biilit innaallagiatortut nipaat, aaqq.) ikinneqarsinnaajuaannarpoq.

- Ilaannikkut taamaaliortarpunga, pingaartumik paniga ilaasorigaangakku, taassumami torragisarpaa, Morten Nordahl illarpoq, taassumalu aamma biilertilluni meeqqat ”Kaar”-imik oqartartut malugisarpaa.

– Biilit serlersaarfigineqanngisaannarput allatigulluunniit aserorterneqarsimanatik. Nuannersuinnarnik oqarfigineqartarpunga, Morten Nordahl oqarpoq, taassumalu Porschemik, assersuutigalugu SUV-mik innaallagissamik ingerlattakkamik tuniniaasoqalissagaluarpat Taycanini aatsaat allamik taarsersinnaallugu takorloorsinnaavaa.

- Porsche SUV-imik innaallagissamik ingerlasumik, soorlu VW Amarok-imut Toyota Hilluximulluunniit assingusumik, saqqummertoqarpat immaqa taarsersinnaavakka, maannamulli pigisakka nuannareqaakka.