Biilit umiatsiallu qimaannakkat illoqarfitsinni takussunartut

Nuummi umiatsiat, biilit nummerpladeqanngitsut, containerit allarpassuillu inuttaqanngitsut Kommuneqarfik Sermersuumit nalunaarsorneqartuartarput.

Nittartakkami immikkut ittumi inuttassarsiuussisoqartarpoq, qaammatillu pingasut qaangiukkaangata kommunip pigisat aaniarneqarsimanngitsut tuniniarsinnalertarpai imaluunniit akitsorterussinnaalertarlugit. Taamaalilluni suliarineqarnerannut igikkiartorneqarnerannullu aningaasartuutit matussuserneqartarlutik. Aammattaaq kommunip pigisat angallannermut akornutaappata avatangiisinullu mingutsitsippata sumiiffimmut aalajangersimasumut nuussinnaavai.

Nuussuarmi biilit

Nittartakkami containerit 43-t, umiatsiat 53-it biilillu 54-it maanna inuttassarsiuunneqarput. Biilit ilarpassui Nuussuarmi qimaannagaapput. Assersuutigalugu Suzuki Swift tungujortoq taartoq nummerpladeqanngitsoq assakaasuilu qaarnikut. Biilit novembarip 20-ata tungaanut inuttassarsiuunneqarput.

Toyota Rav 4-t nillasaataa kofangerialu singasimasut, qanittukkullu ingerlasinnaarpasinngeqisut, aamma inuttassarsiuunneqartut ilagaat.

Umiatsiat Qeqertani

Qeqertanut isuani umiatsiat arlallit, ilaatigut Bayliner Classic, Draco 2000 aamma umiatsiaaraq Windy motooreqanngitsoq, oktobarip aappaata tungaanut aamma inuttassarsiuunneqarput.

Tassani containerit qimatat aamma nassaassaapput - ilaat paarnaaqqasut allallu ammaannartut.

Sanaartornermut Avatangiisinullu Ingerlatsivimmit akuersissuteqarani inissinneqarsimanerat ullormilu aalajangersimasumi peerneqarnissaannik allagartaq inuttassarsiuunneqartunut ikkussuunneqarsimapput. Kommunimi kaammattuut

Innuttaasut biiliminnik taartissanik utaqqisunik imaluunniit umiatsiaminnik sivisuumik iluarsaatamik pillit kommunimut attaveqaqqullugit Kommuneqarfik Sermersuumi nakkutilliisutut immikkoortortaqarfianni pisortap Vilhelm Lynge Hardip innuttaasut kaammattorpai. Taamaattoqartillugumi innuttaasut biiliminnik umiatsiaminnilluunniit tulluartumik inissiisoqarnissaanut nassaarnissaannut kommunimit ikiorneqarsinnaapput, inuttassarsiuunneqarneralu peerneqarnissaalu pinngitsoortinneqarsinnaallutik.

– Ukiup affaanut motoorimut akitsuutip akilerneqarnissaanut piffissanngoraangat biilit nummerpladeqanngitsut uninngasut nalaattarpagut, tamatumali saniatigut biilit ilaat taartissamik tikittoornissamik utaqqinermi uninngasuusarput, imaluunniit allanik pissuteqarlutik nummerpladiiangaasimasuullutik. – Biilillit ilaasa biilit nalunaarsorneqarneranut kisitsisit igalaavaniittoq peertarpaat, taamaammallu kina piginnittuunersoq paasinissaa uagutsinnut ajornakusuulersinnaasarpoq. Tamanna innuttaasoq peqatigalugu aaqqiissutissamik nassaarniarnermi akornutaasinnaavoq. Taamaattumik inuit biileqarunik imaluunniit umiatsiaqarunik taartissaanik utaqqisunik allatigulluunniit pissuteqartumik uninngatitsigunik kommunimut ornigullutik paasititsisinnaapput. Taava biilit umiatsialluunniit inissisimaffia upalungaarsimasunut, aputaajaasunut innuttaasunulluunniit akornutaanersoq nalilissavarput, Vilhelm Lynge Hard oqarpoq, nangillunilu:

– Biilit umiatsiallu illoqarfiup qeqqani aqqusinermi akornutaasut Qeqertanut inissikkallarnikuusavut maanna amerlapput.

Containerit immikkut eqqumaffigineqartut

Containerit qimaannakkat Kommuneqarfik Sermersuumi immikkut eqqumaffigineqarput.

- Piffissami aggersumi tamanna suliaqarfigissavarput, Vilhelm Lynge Hard oqarpoq, erseqqissarlugulu inatsit naapertorlugu innuttaasut nunaminertamik akuersissuteqaratik uninngatitsisinnaannginnerat.

– Tassa innuttaasut containerimik inisseerusukkunik kommunimut saaffiginnittussaapput. Taava inatsisit naapertorlugit qanoq iliortoqarsinnaanersoq paasiniartarparput, Vilhelm Lynge Hard oqarpoq, taannalu containerimik qummoroortartunik ulikkaartumik ammaanikuuvoq. – Upalungaarsimasunit iliuuseqarfigineqarpoq. Ajutoorujussuarnermik kinguneqarsimasinnaagaluarpoq, Vilhelm Lynge Hard oqarpoq. Nunatsinni suarsunnik katersuillaqqittarnerput aamma eqqaavaa.

- Inuit katersuillaqqittarput, illoqarfimmilu initusarlutik, Vilhelm Lynge Hard oqarpoq.

Nuna tamakkerlugu ajornartorsiut

Kommuneqarfik Sermersooq kisiartaalluni pigisanik qimaannakkanik nalunaarsuisanngilaq. Kommunit tamarmik taamaaliortarput – inuttassarsiuussinerilli kommunip nittartagaatigut ingerlanneqartarpoq, soorlu Avannaata Kommuniani. Tassani qanittukkut Ilulissani angalaarluni Toyota Pickup truck tungujortoq, aquuteralak Honda, sikkilit usisartut containerilu aappalaartoq qassutinik ulikkaartoq qanittukkut nalunaarsorneqarput, oktobarillu 15-iata tungaanut aaneqassasut piumasaqaatigineqarluni. Aamma Sisimiuni kommunip containerinut inissiisarfiani pigisat arlallit Qeqqata Kommuniani inuttassarsiuunneqarput. Ilaatigut aalisarnermut atortut, qamuteralaat pisoqqat motoorillu piginnittunit peerneqarnissaat qinnuigineqarput.