EU-mit milliardikkaat Nunatsinnut

EU-Kommissionip 530 millionit eurot (4 milliardit koruunit missaat) 2028-mit 34-mut Nunatsinnut aningaasaliissutiginiarpai.

Aningaasat taakku EU-p Nunatsinnut 2021-mit 27-mut aningaasaliissutigisartagaannit 225 millionit euronit, imaluunniit 1,7 milliardit koruuningajaasunit, marloriaat sinnerlugu amerlassuseqarput.

Taakku nunat EU-mut ilaasortaasut nunasiaatigisimasaannut (OLT) suleqatigiinnissamut isumaqatigiissutit ilagaat. Nunarput aamma EU suleqatigiinnissamut isumaqatigiissutip saniatigut aamma aalisarnermut isumaqatigiissuteqarput. Taanna 2025-iinnarmut 17,3 millionit euronik imaluunniit 129 millionit koruuninik aningaasartaqarpoq.

EU-Kommissionimit siunnersuutigineqartoq tamanna maanna nunanit EU-mut ilaasortaasunit ukiut marluk ingerlaneranni oqallisigineqassaaq isumaqatigiinniutigineqassallunilu. Tamatumunnga peqatigitillugu aningaasat sumut atorneqassanersut Nunatsinni oqallisineqassaaq.

Nunatsinnut immikkut aningaasaliissutigineqartut takussutissaapput EU-p suleqatigiinnerup qanoq pingaaruteqartigineranik isiginninneranut, tamannami nunani tamalaani politikikkut pisut kingunerannik erseqqinnerulermat, EU-Kommissionip Nuummi allaffiani pisortaq Simon Bojsen-Møller oqarpoq.

Ilinniartitaanermut tunngasut

EU-p Nunatsinnut aningaasaliissutaasa amerlanerpaartaat maanna missingersuutini aningaasaqarnermut naalakkersuisoqarfik aqqutigalugu missingersuummut tapiissutaasutut toqqaannartumik nuunneqartarput. Aningaasat Nunatsinnit aqunneqarput.

Tapiissutigineqartut 25 procentiisa missaat allanngorartuupput. Tassa imaappoq, Nunatsinni ilinniartitaanermut periusissiami, EU-mit Nunatsinnillu ataatsimoorluni toqqartorneqarsimasumi, anguniakkat anguneqarsimanerat apeqqutaatinneqartarput. EU-p maanna suleqatigiinneq pillugu isumaqatigiissutaani tapiissutit 90 procentii ilinniartitaanermut atorneqartarput. – Aningaasat EU-meersut Nunatsinni ilinniartitaanermut periusissiaq tunngavigalugu nunatsinnilu ingerlatsiviit aqqutigalugit aqunneqartartut, Simon Bojsen-Møllerip oqaatigaa. 

Aatsitassarsiorneq ataavartumillu nukissiorneq

Ilinniartitaanerup saniatigut EU-p aamma Nunatsinni aatsitassarsiorneq nukissiornerlu ataavartoq tapersersorpai. Aningaasaliissutigineqartut amerlanersaat ilinniartitaanermut aningaasaliissutini missingersuutinut tapiissutaapput, assersuutigalugu Namminersorlutik Oqartussanit nunap sananeqaataanik paasissutissanik amerlanerusunik suliaqarnermut, avatangiisinut inuiaqatigiinnullu piumasaqaatinik suliffeqarfinnut, ilisimatusarnermut il.il. ineriartortitsinermut atorneqarsinnaallutik.

– Namminersorlutik Oqartussanik suleqateqarnerup nukittorsarneqarnera aamma Nunatsinni namminersorlutik inuussutissarsiortuni inooqatigiinnermut piumasaqaatinik ineriartortitsinermut tapersersuinissaq pineqarput, Simon Bojsen-Møller oqarpoq nanngillunilu: 

- Taamaalilluni aningaasarpassuit pineqarput, Nunatsinni ingerlatanut atuuttunut atugassiissutigineqartartut. Aningaasallu pineqartut tamakkununnga aningaasaliissutigineqartartunut amigaataasussaagaluartut. Ukiuni tulliuttuni amerlanerusunik aningaasaliisoqarnissaanik maanna siunnersuuteqartoqarneratigut Nunatta ilippanaateqarneranik EU-p akuersineratut isigisariaqarpoq, tamannalu aamma Nuummi allaffimmik ammaasoqarneranut takussutissaavoq, Simon Bojsen-Møller oqarpoq.