Halibut Greenland Pannertuumut tikeraartoq

Halibut Greenland ApS Ilulissani qitiusumik allaffeqarfeqarlunilu aalisakkanut suliffissuaateqartoq, qaleralinnik saarullinnillu annerusumik tunisassiortuuvoq, taakkulu nunarsuarmi niuerfinnut assigiinngitsut niuerutigineqartarnerat North Atlantic Seafood A/S-mit, Halibut Greenlandimit piginneqataaffigineqartumit ingerlanneqartarpoq.

North Atlantic Seafood Canadami Nunavup ilaani illoqarfimmi Pannertuumi aalisakkanut suliffissuaq Pangnirtung Fisheries Ltd ilaatigut qaleralinnik eqalunnillu tunisassiorfiusoq aamma pisiffigisarpaa.

Qaammallu kingulleq martsip ingerlanerani North Atlantic Seafoodip Pangnirtung Fisheries Ltd-imut tikeraarneranut atatillugu Halibut Greenland qaaqqusaavoq. Pannertuumiinneq iluatsillugu Halibut Greenlandip tunisisassoriaasaa pillugu saqqummiisimallutik suliffeqarfiup pisortaa Erik Siverthsen oqarpoq.

Ilisimasanik tuniorarneqartut 

Erik Siverthsenip oqarnera naapertorlugu ukiut 30-t missaasa matuma siornatigut Ilulissani aalisartut Pannertuumi sikukkut ningittagarsorluni qaleralinniarnermut ilinniartitsiartornikuusimapput, tamannalu ilaatigut tunngavigalugu Halibut Greenlandip Pannertuumut angalanermut peqataanissaa tulluartutut isigineqarsimavoq. Halibut Greenland aalisakkanik tunisassiornermi nammineerluni annertuumik ineriartortitsivoq, tamannalu pillugu Pannertoormiut saqqummiivigineqarput.

- Aalisakkanik tunisassiatsinnik nalittorsaanermik ingerlatagut, soorlu qalerallit paperuinik saarullinnillu tisaanik tunisassiornerput pillugit Pangnirtung Fisheries oqaluttuuppagut.

- Pannertuumi aalisakkat tunisassiatik qulimiguulik atorlugu avammut nioqqutigineqartarput, taamaattumillu tassunga atatillugu aningaasartuutaat qaffasissorujussuullutik, imaatigulli assartuinerup aallartinnissaa misissorniarneqartoq paasivarput, Erik Siverthsen, Pannertoormiut Ilulissanut paasisassarsiorlutik tikeraarnissaannik neriuuteqartoq, oqarpoq.

Piniartut amerlanerusut 

Nunavumi aalisarneq sikuusarneralu pillugit ilisimasaqarluartup Sermitsiamut paasissutissiinera naapertorlugu ukiukkut sikuunerani taamaallaat qaleralinniartoqartarpoq aammalu Pannertuumi piniarnermik inuussutissarsiutillit aalisarnermik inuussutissarsiutilinnut naleqqiullugit amerlanerusut, taassuma oqaatigaa. Ukiuni kingullerni sikuunikinneruleranik peqquteqartumik sikukkut qaleralinniarluni aalisarneq annikinnerulersimasoq, taassuma aamma oqaatigaa.

Tamannalu aamma maluginiarsimagitsik Erik Siverthsen oqarpoq.

- Inooriaasertik piniartuuneq ukkatarinerorpasippaat aammalu nuniaffinngoraangat nuniannissaq aalisarnermiit pingaartinnerorpasittarpaat.

- Aammali Pannertuumut qaleralittassiissutaasartut ukiumut 500 tonsiinnaavoq, taakkulu ukiuunerani qaammat ataaseq affarlu aalisarneqaraangamik nunguttarput, kisiannili piumassuseqarneq apeqqutaatillugu pisassiissutit qaffanneqarsinnaasut oqaatigineqarpoq, taanna oqarpoq.

Nunavummi qalerallit angissutsimikkut kusanartut, nunatsinnilu qaleralinnut sanilliullugit qummut silinnerusut, taamaattumillu tunisassiarinissaannut periarissaarissaartut, Halibut Greenlandip pisortaa oqarpoq.

Angallatit allaanerusut 

Kalaallit Nunaani umiatsiaaqqat qaleralinniarnermut atorneqartartut nutaaliaanik soorlu amuarfinnik atortoqarput. Nunavummili umiatsiaaqqat atorneqartut aamma allaanerupput.

- Taakaniinnitsinni umiatsiaaraq taamaallaat ataaseq amuarfilik alakkartinneqarpoq. Aammali umiatsiaaqqat atorneqartut alumiiniuupput ukiukkut angallatigissallugit tulluarpallaanngitsut atorneqarput, taamaattumik sikuunerani aalisarnerusarput, Erik Siverthsen oqarpoq.

Pannertuumi qaleralinnik tunisinermi kilomut 12,50 kronit missaat akigitinneqarpoq.