Inuussutissarsiortoq: Illunik tuniniaanerup ajortumik sunnerneqarnissaa ilimanarpoq

Kommuneqarfik Sermersooq inuussutissarsiortorlu Jackie Lyng pisortanit 28,5 millionit koruuninik taarsigassarsineq pillugu isumaqatigiinngissuteqarput.

Suliaq kommunillu iliuusia Nuummi inissianik tuniniaanermut sunniuteqarujussuarsinnaasoq Jackie Lyng isumaqarpoq.

Kommunip Jackie Lyngip ingerlatseqatigiiffianut Nuuk City Investimut inissiat 73-it pillugit isumaqatigiissuteqarnermini taarsigassiissutit akileqquai imaluunniit attartornermut akiliut appaqqullugu.

Kommunip oqarnera naapertorlugu ineqarnermut akiliut isumaqatigiissummi allassimasoq pisortanit taarsigassarsisitsisarnermut inatsimmut naleqqiullugu qaffasippallaarpoq.

Imminiiginnarneqartutut misigineq

Kommunimit imminiiginnarneqarluni suliamilu pisuutinneqarluni Jackie Lyng isumaqarpoq. Kommunip nammineq piffissami tassani inissiat 73-it pillugit isumaqatigiissuteqarnissani kissaatigisimagaa taanna oqarpoq, taamatullu aamma pisortanit taarsigassarsinissaq akuersimagaa.

Inatsit naapertorlugu ineqarnermut akiliut apparneqassappat ukiuni 7,5-it sinneruttuni 17-18 millionit koruunit akornanni annaasaqaatigissallugit Jackie Lyng oqarpoq.

- Taamaallaat inissianik akunnittarfiliornikkut aningaasaqarneq ataqatigiisissinnaavara, oqarpoq.

Inissianik 73-inik attartornerup atorunnaarsinneqarneranut atatillugu kommunip taarsigassarsiat tamaasa misissorniarlugit pilersaaruteqarnersoq Jackie Lyngip paaserusuppaa:

1. Kommuneqarfik Sermersooq pilersaaruteqarpa pisortanit taarsigassarsiat tamaasa misissorniarlugit taarsigassarsiallu attartornermut inatsimmik tamatuminnga unioqqutitsisimasut tamaasa atorunnaarsinniarlugit?

– Ilaqutariit 73-it eqqugaassanngillat

Nuuk City Investip Kommuneqarfik Sermersuumut attartornermut isumaqatigiissutaa annertooq atorunnaarsinneqarpoq

2. Pisortat taarsigassarsisitsisarnerat pillugu inatsimmik unioqqutitsisumik attartortitsisoqarsimappat, taarsigassarsiat nalingata qaffanneranit iluanaarutigineqartut utertinneqarnissaat Kommuneqarfik Sermersuumit pilersaarutigineqarpa?

- Taamaanngippat isumaqartoqarsinnaavoq inatsit taamaallaat aalajangersimasunut atuuttoq, taamaattumillu peqquserluttumik iliuuseqartoqartoq, tamannalu Nuuk City Investip pigisaata nalingata appariartorneranut millioninik marlunnik kisitsisitalinnik taarsiissuteqarnissamik suliamik ammartitsissaaq, Jackie Lyng Kommuneqarfik Sermersuumut allappoq.

Illunik tuniniaanermut sunniuteqarnerlussasoq

Pisoq tamanna Nuummi inissianik tuniniaanermut ajoqutaalluinnartoq, pisortaniillu taarsigassarsiat inissiarpassuarnut aningaasalersuinermi tunngaviusarmata sunniuteqarnerlussasoq inuussutissarsiortoq isumaqarpoq:

- Qularilluinnarpara ilissi (Kommuneqarfik Sermersooq, aaqq.) inatsit allanut atuutsissagissi, nalunnginnassiuk attartornermut isumaqatigiissutit tamarmik misissorneqassappata inissianik tuniniaanermut ajortumik sunniuteqasassoq, Jackie Lyng allappoq.

Nuummi inissianik tuniniaasarneq ukiuni 30-ni malinnaaffigilluarsimallugu Sermitsiamut oqaluttuarpoq, inissianillu neqerooruteqartartut nittartagaat misissorlugit inissiat pisortanit taarsigassarsiarititaasimasut arlallit, ineqarnermut inatsimmi qaffasinnerpaaffiup qaavatigut attartorneqarsinnaasut, nassaarisimallugit.

Kommunip inuussutissarsiortullu inissiat 73-it pillugit illuatungeriit aaqqiissuteqarsinnaanngippata isumaqatigiinngissutaat eqqartuussivimmi aaqqinneqassaaq.