MOTOORI
Nukissiorfiit illoqarfinni amerlanerusuni sarfalersortarfinnik ikkussuiniartut
Nukissiorfiit biilinut innaallagiatortunut sullissivitsik Nukissalik 2026-mit siaruarneruniarpaat. Illoqarfinni erngup nukinganik innaallagissiorfeqartuni tamani, kikkut tamarmik innaallagissamik sarfalersorsinnaalernissaat pilersaarutaavoq.
Nukissiorfiit biilinut innaallagiatortunut amerlanerusunik aningaasaliissuteqarniarput, ilaatigullu tamanut sarfalersortarfinnik amerlanerusunik ikkussuinikkut aamma suliffeqarfinnik pisortallu ingerlatsiviinik suleqateqarnerminnik annertusaaniarlutik.
Assi: Leiff Josefsen
Nukissiorfiit biilinik innaallagiatortunik atuinerulerniarlutik
aningaasanik amerlanerusunik immikkoortitsiniarput, ilaatigut tamanut
innaallagissamik sarfalersortarfinnik amerlanerusunik ikkussuiniarlutik aamma
suliffeqarfinnik pisortallu ingerlatsiviinik, ilaatigut Kommuneqarfik
Sermersuumik, atuiffimminni innaallagissamik sarfalersortarfinnik
pilersitsinissaannik suleqateqarnertik annertusarniarlugu. Nukissiorfiit
Sermitsiamut taama allapput.
Innaallagissamik
sarfalersortarfinnik nutaanik pisisoqartoq
Nukissiorfiit pineqartumut teknikikkut aamma Issittumi silap pissusiani
unammillernartunut ukiuni kingullerni ilisimasaqarnerulersimapput.
Nukissiorfimmit qanittukkut ajuusaarutigaat atuisut arlallit Nuummi Brugsenip
aamma katersortarfiup eqqaanni sarfalersortarfiit ajoquteqartut
sarfalersoriartorfigisarsimagaluarmatigik. Sarfalersuutilli taakku maanna
allanik taarserneqassapput, silami nillernerusumi atorneqarsinnaasutut
akuerineqarsimasunik aamma Issittup silaanut naleqqunnerusunik sanaajusunik,
Nukissiorfiit taama paasissutissiipput.
NUNATSINNI INNAALLAGIARTORTUNIK AAMMA ORSUSSAMIK BATTERIIMILLU AKULERIISSITSILLUTIK BIILIILLIT AMERLATIGIPPUT
Biilit
innaallagiatortut aamma orsussamik batteriimillu akuleriissitsillutik
ingerlateqartut nalunaarsorneqarsimasut amerliartorput.
Politiit ukiumoortumik kisitsisaataat naapertorlugit 2024-mi biilit
innaallagiatortut aamma orsussamik batteriimillu akuleriissitsillutik
ingerlatillit nalunaarsorneqarsimasut 2.268-iupput. Taakkunannga 795-it
innaallagiatortutut nalunaarsorneqarsimapput, 1.313-illu orsussamik
batteriimillu akuleriissitsilluni ingerlatilittut nalunaarsorneqarsimallutik.
Biilit 160-it hybriditut nalunaarsorneqarsimapput. Aqqusinikkut
angallassissutit 160-it akuleriissitsillutik ingerlatilittut
nalunaarsorneqarsimapput.
- Nukissaliup ineriartortinneqarnissaa
ingerlatsinerminilu patajaatsuunissaa, uagutsinnut pingaaruteqarpoq,
taamaalilluni innuttaasunut suliffeqarfinnullu sarfalersuutinik atuinissaq
pilerinarnerulersinniarlugu, Nukissiorfimmit taama allapput.
Nukissalimmik
ingerlatsineq
Nukissiorfiit ingerlatsivimmik pilersitsipput, biilit
sarfalersortarfiinik taamaallaat suliaqartussamik.
Nukissalik aamma tassaavoq Nukissiorfiit app-iat, taannalu atorlugu
innaallagiatortunik biilillit biilertik sarfalersorsinnaavaat, akiligassat
takuneqarsinnaallutik, aamma sarfalersortarfiit atorneqanngitsut sumiinnersut
takuneqarsinnaallutik.
Nukissalik Nukissiorfiit nukissamik mingutsitsinngitsumik ingerlatsilernissamik anguniagaannut
pingaaruteqarpoq, aamma erngup nukinganik nukissiorfimmik Utoqqarmiut
Kangerluarsunnguanni ittumik alliliinerup kingorna innaallagissamik
sinneqartoorutigisaanik atuilernissani kissaatigalugu.
Illoqarfinni allani sarfalersortarfiit
Qaqortumi, Ilulissani Nuummilu maannakkut sarfalersortarfeqareerpoq.
Nukissiorfinnilli sulissutigineqarluni Ilulissani, Narsami, Sisimiuni
Tasiilamilu tamanut sarfalersortarfeqalernissaa.
