Nunarsuarmi qeqertat annersaanniippugut, taamaakkaluartoq Kommuneqarfik Sermersuumi Nuummi, Nuussuarmi Qinngorpumilu ilaqutariinnut ataasiakkaanut illuliornissamut namminersortunillu inissiaatileqatigiiffinnik pilersitsinissamut nunaminertanik amigaateqartoqarpoq.
Nuummi assersuuteqariarta: Kommuneqarfik Sermersooq 2018-imi Fjeldvejimi sanaartorfissat arfineq-marluk aamma 2020-mi C.P. Holbølsvejimi sanaartorfissat arfineq-marluk neqeroorutigai. Sanaartorfissat pilerinartorujussuupput; illoqarfiup qeqqanut qanittumiikkaluarlutik eqqissisimasumiittut. Sanaartorfissat 14-it soqutigineqarnerat annertummat inissianik piginnittut nutaat makitsinikkut agguaanneqartariaqarsimapput, qinnuteqartullu sinneri utaqqisunut allattorsimaffimmut ilanngunneqarlutik. Ullumikkut illut angisuut arlallit qaqqap sivingarnani illoqarfimmut, kangerlummut Avannamullu alutornartumik isikkivilimmiipput.
Nunarsuarmi qeqertat annersaanniippugut, taamaakkaluartoq Kommuneqarfik Sermersuumi Nuummi, Nuussuarmi Qinngorpumilu ilaqutariinnut ataasiakkaanut illuliornissamut namminersortunillu inissiaatileqatigiiffinnik pilersitsinissamut nunaminertanik amigaateqartoqarpoq.
Nuummi assersuuteqariarta: Kommuneqarfik Sermersooq 2018-imi Fjeldvejimi sanaartorfissat arfineq-marluk aamma 2020-mi C.P. Holbølsvejimi sanaartorfissat arfineq-marluk neqeroorutigai. Sanaartorfissat pilerinartorujussuupput; illoqarfiup qeqqanut qanittumiikkaluarlutik eqqissisimasumiittut. Sanaartorfissat 14-it soqutigineqarnerat annertummat inissianik piginnittut nutaat makitsinikkut agguaanneqartariaqarsimapput, qinnuteqartullu sinneri utaqqisunut allattorsimaffimmut ilanngunneqarlutik. Ullumikkut illut angisuut arlallit qaqqap sivingarnani illoqarfimmut, kangerlummut Avannamullu alutornartumik isikkivilimmiipput.
Illunut utaqqisut
Qinngorpumi Ningitsivimmi nutaanik illuliortoqarnissaa maannamut annikitsuinnarmik soqutigineqarpoq, Nuummili ilaqutariinnut ataatsinut sanaartorfissatut toqqaviit suli piumaneqarluarput.
Sanaartornermut ingerlatseqatigiiffiup EMJ-Atcon Greenland A/S-ip 2023-mi aggustip 31-ani paasissutissiilluni ataatsimiinnermi Nuummi aqquserngup matoqqasup Niels Hammekenip Aqqutaata naanerani illunik qulinik sananissamut qinnuteqaatertik oqaluttuaraa, eqqaamiuusulli amerlasuut sumiiffiup alianaannera uumasoqarluarneralu pissutigalugu akerliuniarlutik takkussimapput.
Suliniut ukioq ataaseq nipangiusimaneqarpoq, suliniummulli qinnuteqaatip ataatsimiititaliap oktobarip 15-iani ataatsimiinnissaani suliarineqarnissaa neriuutigineqartoq Kommuneqarfik Sermersuumi illoqarfimmik ineriartortitsinermut sanaartornermullu ataatsimiititaliami siulittaasoq Justus Hansen oqarpoq.
– Politikkikkut suliarineqarnissaanut ukioq ataaseq utaqqineq sanaartortitsisartunit eqqaamiuusunillu akuersaarneqarsinnaava?
– Naamik, sivisuallaarujussuarpoq, Justus Hansen nassuerpoq.
Tusarniaanermi akissutit nassiunneqartut, ilaatigut sumiiffimmi uumasut pillugit Pinngortitaleriffiup akissutaata, suliarineqarneri utaqqinermut peqqutaapput.
Partii illuatungiliuttoq Siumut naapertorlugu suliniuteqarnissamut tinnuteqartut namminersortut illoqarfissuarmi ineriartornermik ingerlatsivallaarnerat pissutigalugu kommunep aammattaaq suliniutinut qinnuteqartarneq 2024-mi januaarip aallaqqaataani matuaa.
kurt@sermitsiaq.gl
Ilaqutariinnut ataasiakkaanut illussanik sanaartorfissat 14-it soqutigineqarluarnerat pissutigalugu Kommuneqarfik Sermersooq Qinngorpumi inissiaqarfimmik nutaamik Ningitsivimmi sanaartornissamut piareersaanermik suliaqalerpoq. Ilaqutariinnut ataasiakkaanut illussanik, illunik marloqiusanik inissiarsuarnillu sanaartorfissat 42-t maajip 22-ani inuttassarsiuunneqarput, qinnuteqartullu sanaartornissamut nassuiaammik piffissamullu pilersaarummik, aningaasaqarnermik uppernarsaatinik kiisalu pingaarnersiuinermi allattukkanik ilanngussisussaapput.
Qinnuteqartut aqqaneq-marlupput, taakkulu pingaarnersiuinerat aallaavigalugu makitsinikkut agguaanneqarput. Ilaqutariinnut ataasiakkaanut illut inissiarsuarnillu sanaartornissamut qinnuteqartoqarpoq, illunullu marloqiusanut sanaartorfissanngortitassanut qinnuteqartoqarani. Sanaartorfissat allat pingasut kommunip inissiaatileqatigiiffianut Iserit A/S-imut, inissianik attartortitsisartumut sanaartortitsisumullu, immikkoortinneqarsimapput.
Nunaminertat 27-t Ningitsivimmi sinneruttut kommunip qinnuteqarfigisinnaanngorteqqippai.
- Sooq aqqaneq-marluinnaat Ningitsivimmut qinnuteqarpat?
– Kommuneqarfik Sermersooq ukiuni kingullerni nunaminertanik nutaanik qinnuteqartunut piumasaqaatinik sukaterisimavoq, pilersaarusiornermi pisortaq Runa Sværd Sermitsiamut oqarpoq.
Ukiorpassuarni inissianik sanaartortartut inissianik tuniniaanissaq siunertaralugu sanaartortarsimapput, piumasaqaatilli nutaat pissutigalugit amerlanerusut, aamma ilaqutariit inuillu ataasiakkaat, nunaminertanik qinnuteqarsinnaalerput.
Piumasaqaatit nutaat malillugit inuit ataasiakkaat, suliffeqarfiit, ingerlatseqatigiiffiit peqatigiiffiillu qinnuteqarsinnaalerput, qanitamili iniutillit sanaartorfissamut inuttaqanngitsumut makitsinermut qinnuteqaqqissinnaajunnaarput. Makitsinermi tunngaviusumik najoqqutassiaavoq qinnuteqartut tamarmik ataasiaannarlutik makitsinermut peqataasinnaanissaat.
– Kommunimut pilersaarummi nunaminertat piginneqataassutit, attartortitassat pigisatillu naapertorlugit immikkoortitersinnaanngilavut, neriuutigisimavagulli piginneqatigiilluni inissianik piumasaqartut ilaannut matussusiisinnaanerput. Ningitsivimmi misilittakkat tunngavigalugit nalilersussavarput qinnuteqaatinut piumasaqaatit tamarmik suli naleqquttuunersut, kisiannili sapinngisamik amerlanerpaat sanaartorfissaqartikkusuppavut, Runa Sværd erseqqissaavoq.
Sumiiffik
Kommuni sanaartornissamut piareersaasimavoq, naak nunataq Kalaallit Nunaanni tamanit pigineqaraluartoq, Ningitsivimmi nunaminertaq sanaartorfissaq 500.000 koruunit 2.500.000 koruunillu akornanni akeqartarpoq.
– Tamanna qinnuteqartut ilaannut tunuarsimaartitsilersinnaavoq, akiali siornatigut sanaartornissamut neqeroorutinut sanilliullugu qaffasinnerungaanngilaq, Runa Sværd oqarpoq.
TV-kkut aallakaatitassiani soorlu »Hammerslag«-imi pissutsit pingasut akimut aalajangiisuupput: Sumiiffik, sumiiffik aammalu sumi inissisimanera. Ningitsivimmi sanaartorfissat sivingasumi inissisimapput, Qinngorput kangerluanut kusanartumut Nuullu nunanut tamalaanut mittarfissaanut ulapaarfiusumut isikkiveqarlutik. Kommunip kommunimut pilersaarummut tapiliussami illoqarfiup immikkoortua pilerinartoq assigiinngitsunik inissiaqarfeqartoq assigiinngitsunillu innuttaqartoq neqeroorutigisimavaa. Pilersaarummi sissap qulaatigut aqqusinniortoqarsinnaanera periarfissaasoq allassimavoq. Illoqarfiup immikkoortuanut nutaamut aqqusineq pingaarnerusoq tassaavoq Aqqusineq Dronning Margrethe II.
– Imaassinnaavoq illoqarfiup qeqqanit ungasinnera pissutaasinnaavoq. Inuit ilaat sanaartorfimmi, siulliullutik nuuttut piffissap ilaani ulluinnarsiutissarisaanni, najugaqarusunngillat, Runa Sværd oqarpoq.
Sanaartorfissat
Grønlandsbankenip sanaartornerit unikaallassimanerat maluginiarpaa, tamannalu erniaqarnerulernermik pissuteqartoq. Nuummi inissianik niuertut maanna tuniniagaqaalupput, inissiallu tuniniarneqarnerisa sivisussusaat siornatigornit sivisunerumaarluni.
- Nunaminertanik qinnuteqartoqaraangat neqeroorfigineqartartullu assigiinngissuteqaraangata immaqa aamma siornatigut nunaminertanik taama amerlatigisunik ataatsikkut tunniussisarsimannginnatta pisoqartarsimavoq, Runa Sværd oqarpoq.
– Ningitsivimmi sanaartorfissat 27-t inuttaqanngitsut qanoq pineqassappat?
– Piffissap ingerlanerani sumiiffimmut qinnuteqallattaasoqassanersoq utaqqimaassavarput. Aammattaaq inissianik piginnittunut nutaajuvoq pitsaallunilu sanaartorfissat suli inuttaqanngitsut. Sumiiffiilli ilaat siunissami allatut atorneqartariaqalersinnaanersut eqqumaffigissavarput. Tamanna kommunip pilersaarusiaanik allannguinermik kinguneqassaaq, kisianni biilinut inissiisarfinnullu tunngatillugu Ningitsivik inissialiornissamut tulluarsagaavoq.
– Ningitsivimmut soqutiginninnerup annikinnera kommunimut pilersaarummut tapiliussap nalilersoqqinnissaanut, inissianut allatut ittunut imaluunniit niuernermut illunut neqeroorutiginissaanut, pissutissaqarpa?
– Aallaqqaammut naamik, kommunimulli pilersaarummi novembarimi/decembarimi tusarniaassutigineqartussami siunnersuutigaarput najugaqarfinni inuussutissarsiutit amerlanerusut ammarneqarnissaat, inuussutissarsiutit assersuutigalugu pujoralammik nipiliortitsinermillu aniatitsinngitsut, Runa Sværd oqarpoq.
