Savalimmiut Kalaallillu Nunaat nunarsuarmi ileqquulersumut ilannguttut

Nunat amerlanerujartortut takornarianik akileraartitsinermik pinngortitamut innuttaasunullu iluaqutaasussamik eqqussipput. 

Nunarsuarmi ileqquulersimavoq, assersuutigalugu Kalaallit Nunaanni Savalimmiunilu inatsisartut pinngortitamut iluaqutaasussamik inatsisiliorsimapput.

Savalimmiuni inatsit ukiup ataatsip missaata matuma siorna akuersissutigineqarpoq, akileraarnertaviali ukioq manna oktobarip aallaqqaataani atuutilissaaq. Kalaallit Nunaanni unnuinermut akitsuut imaluunniit takornarianut akileraarummik taaneqartartumik 2026-mi januaarip aallaqqaataaniit atuutilersitsisoqassaaq. 

Savalimmiuni ukiut qulit missaanni matuma siornagut takornariaqartorsuuneq ajorpoq. Maannali allarluinnaavoq. Siorna Atlantikumi qeqertat 18-it takornarianit 130.000 missaanniittunit takornariarfigineqarput, innuttaasut 55.000-it ataatilaarlugit amerlassuseqarlutik.

Akunnittarfinni airbnb-nilu unnuinerit

Ukiut qulit matuma siornagut takornariartut 60.000 ataassimagaat missingersuutigineqarpoq.

– Sumiiffinnut aalajangersimasunut tikeraarnermut namminersortut akitsuutinik akiliisitsiniarnerput ilungersunartut ilaatigut ilagisimavaat. Inatsit nutaaq atorlugu akiliisitsiniaraanni kiffartuussinerup ilaanissaa piumasaqaataavoq.

Jóhan Pauli Helgason, Savalimmiuni Takornariaqarnermut Siunnersuisoqatigiinni Visit Faroe Islandsimi ineriartortitsinermut immikkoortortami pisortaq Sermitsiamut taama oqarpoq.

Takornarianut akileraarummi nutaami tikeraat akunnittarfinni, unnuisarfinni airbnb-ni allanilu akiliilluni unnuisarfinni unnuisut tamarmik ullut qulit angullugit ullormut 20 koruuneertassapput. Takornariamut ataatsimut akileraarutip 200 koruunit sinnissanngilai.

Kikkut tamarmik pisinnaatitaaffiat

Norgemi Sverigemilu kikkut tamarmik killilersorneqaratik pinngortitami ”kikkut tamarmik pisinnaatitaaffianni” angalaarnissaminnut pisinnaatitaapput, pinngortitarli qimaleraanni tikinnertuulli pitsaatigisumik qimanneqartassaaq.

– Savalimmiuni ”kikkut tamarmik pisinnaatitaaffiat” atorneqanngilaq. Inuiattut aamma takornaqarpallaanngilagut. Illoqarfiilli nunaqarfiillu aalajangersimasut soorunami takornariaqarnerpaaffiata nalaani ilungersunartorsiulaartarput, Jóhan Pauli Helgason oqarpoq.

Visit Faroe Islands takornarianut akileraaruteqanngikkallarmat pinngortitap illersornissaanut akileraaruteqalernissamik siunnersuuteqarsimavoq.

– Tamanna naalakkersuinermik suliaqartut unnuinermut akileraarummik, soorlu akunnittarfinni unnuinermut, kiisalu umiarsuarmik takornariartunut ataasiarluni akileraarutaasumik, nutaamik eqqussigamik tusaaniarsimavaat. Tamatumunnga taarsiullugu soorlu maanna pinngortitami arlaanik takuniaanermi assigiinngitsunik akitsuusiisoqartalersoq, oqarpoq.

Takornarianut akileraarutinit aningaasat aningaasaateqarfimmut nakkartinneqartarput, pinngortitamik illersinermut attaveqaatinillu soorlu pisuinnaat aqqutaannut, qaqqami nasiffinnut sumiiffinnilu mianernartuni perusuersartarfinnut atorneqartarlutik, Jóhan Pauli Helgason oqarpoq.

Taamaalilluni aningaasaateqarfik maannakkut takornariat amerlassusaat eqqarsaatigalugu ukiut tamaasa millionerpassuarnik ilaneqartarpoq.

– Takornarianut akileraarut nutaaq, aningaasaateqarfik ilanngullugu pinngortitamillu illersuinissamut inatsit nutaaq Savalimmiuni takornariaqarnermik allannguerujussuartussaapput. Aningaasaateqarfik piffissap ingerlanerani annertoorsuanngussaaq, suliniutinut angisuunut akissaqalerluni, Visit Faroe Islandsimi piorsaanermut immikkoortortami pisortaq isumaqarpoq.

Kalaallit Nunaat

Inatsisartut siorna novembarimi takornarianut akitsuutit pillugit inatsit akueraat, akileraarulli nammineq taaneqareersutut 2026-imi januaarip aallaqqaataani atuutilissaaq.

Taamaalillutik Kalaallit Nunaanni takornariat ineeqqani, inissiaaqqani, inissiani, illuni, containerini, najugaqarfinni tupernilu unnuinermut ataatsimut 30 koruuninik akitsuuserneqartassapput.

Aaqqissuussineq takornarianut nunatsinneereersunut atuunnani avataaniit takornariartunut atuuppoq. 

Akitsuutip nutaap ukiumut 6,3 million koruuninik isertitsissutaanissaa naatsorsuutigineqarpoq, taakkulu kommuninut tallimanut agguarneqassapput. Takornariaqarnerup piorsarnissaanut atorneqassasut siunertaavoq.

Akitsuummit aningaasat unnuinerit nalunaarutigineqartut amerlassusaat aallaavigalugu kommuninut agguaanneqartassapput.

Inatsimmi paragraf 8-mi allassimasutut:

– Najukkami nunallu immikkoortuani takornariaqarnerup inerisarneranut unnuinermut akitsuummit isertitat kommunit taamaallaat atortassavaat, matumani sumiiffimmi takornariat amerleriarneranni kingunerisinnaasat pitsaanngitsut millisinnissaat ilanngullugu.

Islandimi takornariaqarpallaartoq

Nunanit allanit takornariat 2,3 millioningajaammata Island 2024-mi aatsaat taama takornariaqartigaaq. Nunap naalakkersuisui nunap silap pissusaanut anguniakkamik ilaattut takornarianut akileraarummik siorna eqqussipput. Akunnittarfinni unnuisarfinnilu unnuineq ataaseq 30 koruuninik akileraaruserneqartarpoq.

Islandimi pinngortitaq takornariaqarpallaarneranit tatineqarpoq. Naalakkersuisut akitsuusiinikkut pinngortitaq tikinneqarsimanngitsoq takornariarpassuarnut illersorsinnaallugu neriuutigaat.

Islandimi naalakkersuisut inatsit nutaaq atorlugu tikeraat uumasunik asimillu sunniinerat annikillisissinnaallugu neriuutigaat.

Norge

Norgemi oqartussaasut ukiuni arlalinni takornarianut akileraarut inissinniarlugu suliaqarsimapput. Naalakkersuisut kommunit akunnittarfinni unnuinermut, tammaarsimaarnermut airbnb-ilu takornarianut akileraarummik eqqussissasut kissaatigaat.

Kommunit namminneq taama aaqqissuussissanerlutik aalajangissavaat. Norge 2024-mi aatsaat taama takornariaqartigimmat unnuinerillu 38 millionit sinneqarsimammata taama siunnersuuteqartoqarpoq.

Bhutan takornariarpassuaqarneranik annikillisaavoq

Himalayami buddistit kunngeqarfiani Bhutanimi aviisi digitalisoq ”Verdens Bedste Nyheder” naapertorlugu takornariarpassuarnik killiliiniarneq iluatsinneqarsimavoq.

Nuna takornarianit 300.000-nit ukiut tamaasa tikinneqartarpoq, taakkulu tamarmik ullormut 660 koruuninik takornariarnermut akileraartarput. Aningaasat atuarfeqarnerup peqqinnissallu iluani piorsaanermut atorneqartarput. Takornariat tamarmik illoqarfiit pingaarnersaata avataanut ingerlaniarunik najukkami angalatitsisoqartassapput.

Grækenlandimi takornarianut akileraarut silap pissusianut akileraarummik taaneqartalersimavoq. Tassani aningaasat sumiiffinni takornariarfiusuni pinngortitap ikuallattoqarneranik qarsutsinersuarnillu eqqorneqarsimasup iluarseqqinnianeranut atorneqartarput.

Danmarkimi takornarianut akileraaruteqanngilaq, naak tamanna Københavnimi pilersinneqartussatut oqaluuserineqarsimagaluartoq.

Frankrig, Italia, Spania, Japan, Thailand, nunat Caribiamiittut nunallu allarpassuit assigiinngitsumik annertussuseqartumik takornarianut akileraarusiisimallutillu aaqqissuussinernik asiinngitsunik ingerlataqarput.