Timmisartoq Atlantiku qulaallugu Kangerlussuarmut timmisartuussisussaq siulleq ataasinngorpat missasoq

Air Greenland aamma Albatros Arctic Circle sapaatip akunneranut marloriarlutik Københavnimiit Kangerlussuarmut timmisartuussisarnissamut siorna ukiakkut isumaqatigiissuteqarput.Jettimep timmisartuutaa, Boeing 737-800 180-inik ilaasoqarsinnaasoq, piffissamilu marsip 17-ianiit oktobarip 16-ianut timmisartuussisartussaq, timmisartuussisassaaq.

- Kangerlussuaq siunissarissaartoq, illoqarfimmilu inuit 450-init ikinnerugaluartugut timmisartoq mikkaangat qiimmaallattoqartarnera qularutissaanngilaq, taamaammat suli suliassarpassuaqarpoq. Kangerlussuaq angalaffissatut ingerlaannassasoq upperilluinnarpara, Albatros Arctic Circlemi pisortaq Jørgen Larsen oqarpoq. 

Albatros Arctic Circlep takornarialerisutut umiarsuarnik takornariartitsisartut inuttaasa ilaasuisalu paarlaannerinut atatillugu sermersuarmut takornariartitsinerit Kangerlussuullu eqqaani angalaarnerit neqeroorutigalugillu unnuisarfiit Old Camp, Polar Lodge aamma Hotel Kangerlussuaq kiisalu neriniartarfiit Restuarant Roklubben aamma Restaurant MuskOx ingerlataraat.

- Jettimemik timmisartuussinerit saniatigut timmisartuussinerit aasap ingerlanerani Kangerlussuarmukartussat 37-it umiarsuarni takornariartaatini ilaasut inuttallu paarlaannerannut atatillulgu atorneqartussat pilersaarutaapput, Jørgen Larsen oqarpoq.

Tikinnerit amerlassusaat siornamut sanilliullugit qulinik ikinnerupput, umiarsuarnilli takornariartitsisut inuttatik ilaasutillu Kangerlussuarmi silap atoruminartarnera pissutigalugu Kangerlussuarmi paarlaatsittarniarpai. Maannamut Atlantiku qulaallugu Kangerlussuarmut Kangerlussuarmiillu timmisartuussinerit 100-it pilersaarutaapput.

- Kangerlussuaq takornarianut angalaffissatut kajuminnartuuvoq, tamanna Atlantiku qulaallugu qimmisartuussinissat pilersaarutaasut naapertorlugit qulakkeersinnaavarput, Jørgen Larsen oqarpoq.

Kangerlussuaq angalaffissaasoq

Kangerlussuaq takornarianut angalaffissatut pilerinarsarniarlugu timmisartoqarfittullu akunnittarfittut qangaaniilli ilisimaneqarnera allanngortinniarlugu pilerinarsarniarlugu inuussutissarsiutinik siuarsaanermut ingerlatseqatigiiffik Kangerlussuarmi aallussaqartut peqatigalugit ilungersorluni suliniuteqarsimasoq Arctic Circle Businessimi angalaffissanut ataqatigiissaarisunngortoq, Taatsi Fleischer, oqaluttuarpoq. Ilungersorsimaneq maanna imminut akilerpoq, Kangerlussuarlu misigisassarpassuaqarluni angalaffissatut takornarianut kajuminnartuuvoq.

- Albatros Arctic Circle Kangerlussuarmi takornariartitsisarfiuvoq angisooq, kisiannili aamma allanik Kangerlussuarmut takornariartunut misigisassarsiortitsisunik ingerlatsisorpassuaqarpoq. Kangerlussuaq takornariarfiusoq inniminnerneqarsimasunit takuneqarsinnaavoq, takornariallu aamma Ilulissanut Sisimiunulluunniit angalanissamut periarfissaqarput, Taatsi Fleischer oqarpoq.

Albatros Arctic Circle-imi pisortaq Berlinimi angalanermut nittarsaassinersuarmut peqataalluni takornarianut angalanissanik tuniniaaqqammerpoq, takornariarpassuillu Kangerlussuarmi sermersuaq pinngortitarlu allanngortinneqanngitsoq takorusuppaat.

- Kangerlussuup akunnittarfimmiit angalaffissamut pilerinarsarnissaanik sulinitsigut misigisassarsiornissamik nioqqutigut siuarsarpagut. Maanna takornariat ullult tallimat arfinillilluunniit Kangerlussuarmiillutik misigisassarsiorsinnaapput, Jørgen Larsen oqarpoq.

Mittarfittut periarfissaasinnaasoq

Københavnip Nuullu akornanni angalanerit qulit missaat 2025-mi taamaatiinnarneqareerput.

- Timmisartup Københavnimut utertinnissaa akisuvoq, aningaasallu Danmarkimiiginnarnatik nunatsinni atorneqarsinnaaniassammata Kangerlussuup mittarfittut periarfissatut atorneqarnissaa eqqarsaatigisariaqarparput, Jørgen Larsen marlunngornermi Sermitsiamut oqarpoq, taannalu nammineerluni ippassaammat timmisartumi Københavnimiit Nuummukartumi, silarlunneralu pissutigalugu utiinnartariaqarsimasumi ilaavoq.

- Timmisartumi akunnerni qulini issianeq sakkortuallaarpoq, taamaammat Kangerlussuarmi upalungaarsimanerup ingerlalluarnissaa isumagineqarlunilu mittarfittut periarfissatut atorneqarnissaa aaqqiissutissaasinnaavoq, Jørgen Larsen isumaqarpoq nassuiarlugulu atlantikoq qulaallugu Kangerlussuarmut timmisartuussinerit ukiumut ataasiaannarlutik taamaatiinnarneqartartut.

- Umiarsuit takornariartaatit Kangerlussuarmi mittarfik aalajaatsoq atortarpaat, pissutsillu aalajaatsuunissaat pingaaruteqarpoq. Umiarsuit takornariartaatit aalajaatsumik atugassaqarnissartik pinngitsoorsinnaanngilaat, oqarpoq.