MOTOORI
Tuttut ajutoortut
Lasse Trollep septembarip qaammataani aavartilluni tuttut marluk tatsimi ipisimasut siumorpai. Taakku nassummittaannerminni nassui imminnut aalajangersimapput kaanngaqqinnerlu ajulerlutik, avissaarniarsarinerminnilu tatsimut nakkarsimagunarlutik. Qaqutigorujussuaq taamaattoqartartoq ilisimatusartoq oqarpoq.
Tuttut nassummittaannerminniit avissaarnaveersimasut tatsimiipput. Taakku qasorujussuarnerminnik ipisimagunavipput.
Assi: Lasse Trolle
Qaqutigut taama pisoqartarpoq,
taamaalisoqarsinnaallunili. Tuttut nassummissimapput kaanngaqqinnerlu
ajulerlutik.
Tuttut marluk Qeqertarsuatsiaat eqqaanni taamatut
pisimapput. Lasse Trollep ikinngutimilu tuttut nassui imminnut aalajangersimasut
tatsimi ipeqqasut nassaaraat.
Lasse Trolle piniariakulasarpoq, tuttulli marluk nassui aalajangeqqasut toqungasut takunikuunngisaannarpai.
Foto: Privat
– Septembarimi tuttunniarluta tatsimi eqqumiitsumik
takusaqarpugut. Ungasinnerusumukarsinnaajumalluta gummibådilisaarpugut,
tassanilu nassuit nuui tatsimi takuagut kingornalu marluusut imminnut
aalajangeqqasut paasilerlugu. Ataani timaat arroriartulersimasut
takusinnaavavut. Ukiup ataatsip matuma siorna oktobarimi uumasut
nuliarsarnerisa nalaani pisimagunavippoq. Angutivissat inerilluarsimasut
marluupput, taamaattumik arnavissat pilerngussimassagaat ilimagaara. Nassui
imminnut aalajangersimapput kaanngaqqinnaveerlutillu. Piffissap ilaani tatsimut
nakkarsimapput, taannalu itinngikkaluartoq marluullutik ipisimallutik.
Taamaattunik siullermeerlugu takuvunga, kisianni tusarnikuullunga,
piniarumatooq Lasse Trolle oqarpoq.
- Siornatigut taamatut pisoqarsimaneranik tusarsimanngisaannarpunga. Taamaattumik qaqutigoortorujussuusimassaaq, Pinngortitaleriffimmi ilisimatusartoq miluumasullu nunamiut pillugit immikkut ilisimasalik Katrine Raundrup oqarpoq.
Assi: Pinngortitaleriffik
Qaqutigorluinnaq taamaattoqartartoq
Katrine Raundrup Pinngortitaleriffimmi
ilisimatusartuuvoq miluumasullu nunamiut pillugit immikkut ilisimasaqarluni.
Tuttut nassui imminnut aalajangersimariarlutik kaanngaqqinneq ajulernerminnik
toqquteqartut qaqutigorluinnaq pisartut taassuma oqaatigaa.
- Siornatigut taamatut pisoqarsimaneranik tusarnikuunngisaannarpunga.
Taamaattumik qaqutigoortorujussuusimassaaq. Naluara sooq taama
pisoqartarnersoq, kisianni uumasut nuliarsarnerisa nalaanni angutivissat
’qaasunnerulersarput’ arnavissallu ajugaaffigerusullugit qanorluunniit
pisinnaallutik. Uanilu pisumi nassummittaarsimassapput kingornalu tatsimut
nakkarsimariarlutik ipisimassallutik.
Aalborgimi uumasuusivimmi uumasunik paarsisut tuttut
marluk annaanniarlugit pilattuummik aamma atuisariaqarnikuupput. Tamanna
2010-mi pivoq. Tuttut nassui ima kaanngarnaveersimatigaat
avissaartinneqarsinnaajunnaarsimallutik. Angutivissat unnuami
nassummittaassimapput, taakkulu avissaaqqinnaveerlutik
nikeriarsinnaajunnaaqqasut uumasunik paarsisut suliartoramik naammattoorpaat.
Pinngortitami taamaattoqaraangat uumasut nannuniit amaqquniillu
pisariuminartorujussuanngortarput.
