MOTOORI
Umiatsiap ukiornissaanut piareersarnera
Sila issileriartorpoq nunalu apummik qallerneqaraluttuarluni. Umiatsiat suli qaqissimanngikkukku piffissanngorpoq.
Umiatsiap qaqinneqarnissaa nallerpoq. Assartuussisartut arlaqartut ikiuussinnaapput.
Assi: Leiff Josefsen
Ilaat namminneq
qaqissisinnaapput, allalli ikiorneqartariaqartarlutik.
Umiatsiamik umiarsualivimmit
qaqinniarnerat ukiumullu piareersarnerat nunami umiatsialerisut
assartuisarfiillu ulapputigaat.
Nuuk Transport aamma Godthåb
Transportservice ulluni makkunani umiatsianik qaqissuillutik ulappupput.
Kiffartuussinertik piumaneqarnerulersimanersoq apeqqummut, Nuuk Transportimi
pisortaq Niclas O. Niclasen ima akivoq:
– Umiatsialeriffiup nalaani
suliarisinnaasatsinnit amerlanerusunik suliassaqalersarpugut, taamaattumik
oqaatigiuminaappoq. Ukiunut siuliinut sanilliullugu
sanaartornikinnerusoqalernikuullunilu kranbiilit illoqarfimmi amerlinikuummata,
kranbiilit maanna suliassaqannginnerusutut ipput.
Umiatsiat ullormut 6-7
Umiatsiamik ukiornissaanut piareersaanermi eqqaamasassat:
Kujaava: Ajoqusersimanersoq misissoruk, glasfiberi ajoqusersimanngila?
Naqqa: Maanna silineqassaaq – umiatsiap naqqa imaaniinnerminit qitulisimasoq
silissallugu ajornannginnerusarpoq.
Qaleruaa: Qillarissarneqassaaq voksimillu tamaat taninneqassalluni. ISUGUTAK
PINAVEERSAARUK – Isugutammik tigooraasinnaasut tamarmik piiarneqassapput,
akisaasat, atisat angallasit il.il. Umiatsiami puussiaaqqanik isugutammik
tigooraassutinik nivinngaassuigit, taarsernissaallu eqqaamallugu.
Nillataartitsivik: Saleqqissaarneqassaaq, matualu ammatilaarlugu
qimanneqassalluni.
Aquutaa: Aquutip lejerii nikinganerinik aquutillu wirea qasoorsimaneranik
misissorneqassapput, kvadrantimit pillikaqqunagu.
Boltit: Aquutip boltii atatitsisut misissorneqassapput.
Gelcoat: Umiatsiap qaleruaani imaluunniit immap killiffiani gelcoatimi
qalipaatinilu ajoqusertoqarsimanersoq misissoruk.
Tillinniarneq: Atortorissaarutit elektroniskiusut peeruminarpata
tamaasa piikkit, tillinniartoqarnissaa pinaveersimatinniarlugu.
Motorolie filterillu: Motorolie filterillu taarserneqassapput,
nillusaatillu killiffia uuttuummik uuttorneqassalluni imaluunniit suliamik
ilisimasalimmut misissortinneqassallutik.
Gearolie: Aquuteralanni taarserneqassaaq aquuteralallu imiinnarmik
salinneqassalluni. Aalasinnaasut punnerusaamik taninneqassapput zinkitallu
nillusaatillu impellerii ukioq allortarlugu misissorneqartassallutik.
Sarpiit: Motoorit umiatsiap iluaniittut sarpiit sarpiillu ikkuffiat
nungullarnermut nikinganermullu misissorneqassapput. Sarpiit nikinganersut
misissukkit.
Anodit: Sarpinni sarpiillu ikkuffiini zink-anodit taarsersukkit.
Ulik: Umiatsiap ulia misissoruk imermik isaasoqaqqunagu.
Najoqqutaq: Marinelageret
Godthåb
Transportservicemi pisortap Niels Pedersenip umiatsiaatillit angallatiminnik
qaqitserusuttut amerlinerat maluginiarpaa.
-
Suliakkiissutigineqartup naammassineqarnissaat qulakkeertarpakka. Umiatsiamik
qaqitseqqammerlunga maanna allaffimmukaarpunga, assakka qerippai.
Ulapingaaratta kranbiilit ataatsit umiatsianik qaqitsissutissatut taamaallaat
maanna atorneqartussanngorpakka.
Niels
Pedersen naapertorlugu ullormut umiatsiat agguaqatigiissillugu arfinillit
arfineq-marlullu akornanni qaqinneqartarput, imaluunniit nalunaaquttap
akunneranut ataaseq qaqinneqartarluni.
–
Novembarimi qaqitsiniartut amerlasaqaat. Angallatillit ataatsikkut tamarmik
qaqitserusulertarput, taamaattumik atuisut allat sullinniarlugillu umiatsialerilertaratta
assartuisartuusugut tamatta ulappusertarpugut. Tamaasali angumeriniartarpagut,
Niels Pedersen oqarpoq.
Angallatit
umiarsualivimmiittut anginerpaartaasa qaqinnissaat Godthåb Transportservicemit
kisiisa itigartitsissutigineqartarput.
Motoorip qerinissaa pinaveersaartinniarlugu ukiornissaanut piareersarneqartarpoq. Lars Bo Lauridsenip Fix It-imeersoq sullitaminik ikiuivoq.
Assi: Leiff Josefsen
-
Amerlanerpaat akuerisarpagut, annerilli assartuisartunut allanut
innersuussutigisarlugit, Niels Pedersen oqarpoq.
Umiatsiap ukiumut isumannaallisarnera
Umiatsiaq
qaqinneqareeraangat assartuisartut angallat inissiffissaanukaattarpaat,
tassanilu piginnittup allalluunniit sullissisut ukiuunerani uninnganissaanut
piareersartarpaat. Tassani motoori isumannaarneqartarput, anartarfiit imermullu
kissartuusivik imaarneqartarlutik.
Amerlanersaasa
aamma batteriit umiatsiamit peertarpaat. Aquuteralaqaraanni sarpia
peerneqartarpoq. Umiatsiamillu paarsilluarumagaanni uulia filterilu
taarserneqartarput, naggataatigullu umiatsiaq qallerneqartarluni. Taamaasilluni
imaani angalaarfissanngoqqinnissaanut piareereerneqartarpoq.
