Ima nukissanittarpunga

Paarnaq immap tungaanut ingerlavoq.

Issippoq anorillu uluai aappillertippai.

Ujaqqat quasattut apummik nakkarlaamik qallerneqarsimapput. Nipaappoq. Tulukkat qarlorpalunnerat imarlu kisimik tusarsaapput.

Paarnaq immap killinganut pivoq peqillunilu. Imaanit tarajorsunni naamasinnaavaa eqqissiallannaralugulu.

Assani imaanut nillertumut kinippai nillerneralu malugalugu. Itisuumik anersaarpoq angunnilu qimagutereernikoq eqqarsaatigalugu. Allaanngilaq immap isumakuluutaanik eqqarsaataanillu oqimaatsunik arsaaraa maliillu uteqattaarnerat ilutigalugu piiarlugit.

Paarnap assani malinnit masatserneqarsimasut isigai nukissamillu nutaamik tunineqarnini malugalugu. Imaanut qiviarpoq umiatsiarlu ammasoq sanioqquttoq takuaa. Motoorerpaluup piviusumut uterteqqippaa.

Panini marlunnik ukiulik isumakuluutissartaqarani suliffimmilu uippakajaarnini qimallugit meeqqerivimmut maanna aanissaanut piareerpoq.

- Ullut tamaasa taamaaliorniartarpunga. Tarnip pissusaanik ilisimasalittut sulinera ilaannikkut unammillernarsinnaasarpoq, taamaattumik ima iliortarnera nassaarsiaraara. Taamaalillunga timera salittarpara nutaamillu nukissaqalersarlunga, Paarnaq Rosing Jakobsen oqarpoq.

Taanna apriilip aallaqqaataani 1989-imi — ukiut 36-t matuma siorna — Nuummi inunngorpoq, illoqarfiillu pingaarnersaanni angajuni pingasut peroriartoqatigalugit.

- Qatanngutigiinni sisamaavugut niviarsiaraannaallutalu. Angajulliup tulliuvunga, oqarpoq.

Aviaaja Rosing Jakobsen Nunatta Katersugaasiviani pisortaq anaanagaa Alfred Jakobsenilu siornatigut naalakkersuisuusimasoq KNAPK-mi ICC-milu pisortaasimasoq ukiut sisamat matuma siorna napparsimareerluni toqusoq ataatagaa.

Atuakkat hunnorujukkaat anersaamut tunngasunik sammisaqartut, kalaallit atuakkiaat, inuuneq pillugu atuakkiat ilisimatusarnermilu atuakkiat Nuup ilaani Nuussuarmi angerlarsimaffimmi atuakkanut ilisivimmi takisuumiipput. Ini bohemeanerpalaarpoq tarrajuttunillu qalipaatigissaarluni. Paarnap qulleq ikimmagu ini orsuaasarsunnilerpoq. Nuummi ulapaarfiusumi inuppassuarnillu ulikkaartumi kangerlummi inuuneq, issittumi pinngortitaq tiguaasutullusooq pivoq.

Eqqaamasat siulliit

1991.

Paarnaq marlunnik ukiulik Nuussuarmi piginneqatigiilluni inissiami Kimmernani najugalik.

- Nunami piginneqatigiilluni inissiat siullersarisimavaat, taannalu angajoqqaama ilaqutagut allat peqatigalugit pilersitaat, Paarnaq Rosing Jakobsen oqarpoq.

Piginneqatigiilluni inissiami ataatsimoortarfeqarpoq, tassanilu Paarnaq ilaqutaat allat meerartallit poorskisiorlutik, juullisiorlutik ukiortaasiorlutillu kaffillertarsimapput.

- "Peqatigiit" mikisut pilersippagut nuannareqaaralu! eqqaamasalersaarpoq.

Paarnaq Rosing Jakobsenip eqqaamasaasa pingaarnerit ilagaat Arsummi pinngortitamiinneq, tassani eqalunniarlutillu nuniattarlutik.

- Qinngorput suli piunngikkallarmat ilaquttavut illortaavullu ilagalugit tupermiittarnikuuvugut. Maanna mittarfimmi biilit unittarfiattut atorneqartarpoq. Siaasaalluta, kalaaliminertuulluta tasermilu kakilisaararniarluta, oqaluttuarpoq.

Nuummi meeqqat atuarfiat naammassigamiuk Brasiliamut AFS-eriarpoq. Tassungarnissani piaarinaatsoornerinnarmik toqqanngilaa, namminermi issittumiit ungasinnerpaamukarusukkami.

Paarnaq Rosing Jakobsen ukiup ataatsip missaani Novo Hamburgomi, Brasiliap naalagaaffiani kujasinnerpaami Rio Grande do Sulimiittumi, najugaqarsimavoq.

- Ilaqutarsiakka tyskiupput. Sorsunnersuup aappaani tyskit tassunga illoqarfimmut qimaasimapput. Quianakujuppoq, tassami Brasiliamiileriasaarpunga ilaqutariinni tyskini, oqaluttarpoq.

Qaammatit siulliit oqaatsit nutaat, kulturi nutaaq nerisassallu nutaat unammillernarput.

Ukioq 2006-ivoq.

Qaammatialunnguilli qaangiummata oqaatsit ilikkaramigit allanngortoqarujussuarneralu sungiukkamiuk oqinnerulerpoq.

- Brasiliami akisussaaffeqarneq pillugu ilikkagaqaqaanga. Nuummut angerlarama ilinniarnertuunngorniarfimmilu aallartikkama tupaallaatigeqaara Kalaallit Nunaanni qanoq inuulluataartigisugut paasilerakku, aali eqqarsaatigisarnikuunagu, oqarpoq.

Allattuiffik anersaamullu tunngasut

Meeraalluni timmisinnaaneq takorluugarisimavaa. Aqqusinermi pisukkaangami timmisartut timmissallu isiginnaartarpai isumassarsiorfigisarlugillu. Taamaattumik tupaallannanngilaq taalliani atuaganngorlugit saqqummersikkamigit atserlugu “Taartumi Sulugissarpoq”.

Århusimi tarnip pissusaanik ilisimasalinngorniarnermini taalliortalerpoq.

- Århusimut nuukkama soorlu Brasilia 2.0-usoq, oqaatsit allat kulturilu alla. Qaammatit siulliit imaannaanngeqaat, Paarnaq Rosing Jakobsen eqqaamasalersaarpoq.

Oqartarpoq Nuummi peroriartorsimalluni Århusimilu inersimasunngorluni.

- Imminut nassaaraanga, anaanama paniginngikkaanga, qatanngutaanngikkaangama ikinngutaanngikkaangamalu. Eqqarsarpallaartarnera ajunngitsoq paasivara, meeraallungalu apeqquterpassuarnik apersuisarsimanera aamma ajunngitsoq, oqarpoq.

Tassani taalliortalerpoq. Nammineq oqarneratut taamani anersaakkut ammarpoq. Allattaaveerannguaqarpoq sumunnaraluaruniluunniit nassartakkaminik. Sikkileraluaruni, atuaraluaruni, pisuttuaraluaruni illoqarfimmiikkaluaruniluunniit.

- Sumiluunniit unissinnaasarpunga allalerlungalu. Misigisarpunga uangaanngitsoq allattoq. Allaannginnami "aqqutaallunga" oqaatsillu assakka aqqutigalugit aniasut, Paarnaq Rosing Jakobsen oqarpoq.

23-nik ukioqarluni Århusimi ilinniarnermini allatani tamaasa atuakkamut katersorpai. Taalliai inuttut ineriartornermut samminerupput. Inuuneq pillugu itinerusumik isumai eqqarsaataalu. Tassani taallioriaasia ilusilersorneqarpoq assiliartalersuineq takussutissiisinnaanerlu ilikkaramigit tarnip qanoq ittuuneranik ersarissumik takorluuisitsisinnaalerpoq.

- Taallat taakkuupput tarnermut attuisut. Atuakkanit atuarsimasannit taallat taakkuupput kimittunerpaat. Atuakkat takorluukkanik piviusunngortitsisarput, oqarpoq.

Sassuma Arnaanut inuulluaqqussut

Paarnaq Rosing Jakobsen Nuummi maanna najugaqarpoq, aappani David panitsillu Qupaluna Alfrida. Angunni toqukkut qimagunnikoq atsiunnikuuaa.

- Ataataga toqummat qaangiiniarninnut imaq atorpara. Imaani nillertumut kinittarpunga, ikima maminnissaanut iluaqutigalugu. Angumma annaanera qaangerniarlugu, oqarpoq.

Taamaaliortarnini attatiinnarpaa. Ullumikkut qasuersaatitut imaluunniit arlaannik iperaaniarnerminut atortarpaa.

- Imarpalaaq mallillu nukissamik tuniuarsimavaannga. Ataatannut siuaasannullu attaveqarfittut uannut sunniuteqartarpoq, Paarnaq Rosing Jakobsen oqarpoq.

Immap killinganiikkaangami siuaasani, kinaassutsini kulturinilu attaveqarfigisutut misigisarpai.

- Panima oqartarneratut, Sassuma Arnaanut aamma inuulluaqqusineruvoq, oqarpoq.