Mimi eqqumiitsuliaminik saqqummersitsisoq

Eqqumiitsuliortup Mimi Josefsenip Kalaallit Nunaanni arnat assuutaat kalaallisuut pingaarteqigai ersarippoq, taassumami kalaallisuut nersorlugillusooq assileqqissaarlugillu qalipaataani ilaalluinnarmata.

Eqqumiitsuliortummi taassuma 47-nik ukiuliusup Danmarkimi assilialiorluni eqqumiitsuliornermik ilinniarfiit ilaanni, tassa Aarhus Kunstakademimi ilinniarnermini soraarummeerutigalugit qalipakkaminik Aalborgimi atuakkanik atorniartarfissuarmi saqqummersitsitai ulluni makkunani takusarneqarsinnaapput. Taassuma qalipataanik maajip 18-ata tungaanut saqqummersitsineq apriilip 24-ani ammarneqarpoq.

Taassuma qalipataminik saqqummersitsinini Kinaavimik taavaa. Tamannami takusaasunut apeqqutiginagu imminut apeqqutigaa. Taamaammallu saqqummersitai inuiaassutsimut, kinaassutsimut nunamullu sorlermut ilaanermut tunngasunik eqqarsarlersitsilersarsinnaasarput. Apeqqutimmi taakkua – ingammik kalaallinut Danmarkimi assigiinngitsunik kultureqarfiusumiikkajuttunut pingaaruteqarput.

Inuusugunnaareernermini eqqumiitsuliortunngortoq

Mimi Josefsen Nuummi ukiut 47-t matuma siornali inunngormat, eqqumiitsuliortunngorumaartoq arlaannaataluunniit, angajoqqaavisalumi aamma, naamerluinnaq takorloorsimanngilaat. Tamanna allaatigisap massuma naggataani uterfigissavarput.

Mimi Josefsen 1977-imi inunngorpoq. Nuummi ASK-imi, Qorsussuarmi ukiullu atuartuuffigisaata amerlanersaanni Nuussuup Atuarfiani atuartuunikuuvoq. Niuernermik Ilinniarfimmi kingornatigut qaammatialunni aamma ilinniartuuvoq, ilinniartuunerminilli qatsussigami taamaatiinnariarlugu sulililerpoq.

- Aalananngitsumik suliaqarneq pikkoriffigivallaarnikuunngilara. Immaqa uniffeqanngippallaalaartuusimagunarpunga, suligaangamali inunnillu kiffartuussigaangama inuummarissisarlunga, Mimi Josefsen oqaluttuarpoq.

Mimi ukiuni arlalinni taama inuusaaseqarpoq. Aamma pingasunik meerartaarpoq – taakkualu tamarmik perorsimalereerput. Kisianni taava piffissap ilaani nikalloqqajaasalerpoq. Unnuakkut sinissaaruttalerpoq – eqqarsaaterpassuanilu inissitsiterumallugit taamaalilluni qalipaasalerlunilu titartaasalerpoq.

- Silarsuarmut nutaamut appakarpunga. Nuannaralugu paasivara, taamaalillungalu eqqumiitsuliortutut 2018-mi ilinnialerpunga angusiffigalugulu.

- Ilinniaqqinnissannulli kajumeriarama Aarhus Kunstakademimi 2019-imi aallartippunga. Sivitsunngitsoq corona nunarsuaq tamakkerlugu tunillaassuutilerpoq – ilinniarneralu tamanna pissutigalugu ilinniarnera ukiumik ataatsimik sivitsorneqarluni. Ilinniarninnilu 2024-mi soraarummeerutigalugit qalipakkakka angusissutigaakka, taakkualu Aalborgimi maanna tassa saqqummersillugit.

Mimip eqqumiitsuliortunngornissaanik angajoqqaavisa takorluugaqarsimanngilluinnarnerat maanna uterfigissavarput. Mimimmi angajoqqaani Nuummiit Aarhusimut nuutsigani sivisuumik oqaloqatigeqqaarpai.

Angajoqqaavi tupigutsattut

Mimip angajoqqaavi taamanikkut tupigutsapput, Mimimi meeraagallarami titartaanermik soqutigisaqaavinngimmat.

- Angajoqqaamma meeraasunga titartaanermik soqutigisaqaavinngitsunga maluginiarnikuusimavaat, taamaammat eqqumiitsuliortunngorniarusuttunga paasigamikku tupigutsapput – ernumaammerunarlutillu, Mimi Josefsen oqarpoq.

- Eqqumiitsuliornermi titartaanerlu toqqissiallannaralugu taamanikkut paasivara. Taamaammallu arlaatigut iliuuseqarfiginiarlugu aalajangiusimaffigaara. Taamaalillunga Aarhus Kunstakdemimi tassa ilinniartunngorlunga.

- Ilinniarnera nuannaraara, assigiinngitsorpassuarnimmi misileraaffigigakku. Assassorluni suliaqarneq aamma misilerangaatsiarpara. Asssersuutigalugu qalipaatit atugassakka tamarmik nammineq akuleruttalernikuuakka. Taamaalillunga qalipaatinik atorusutarpiannik qalipaanissara isumannaartarpara.

Eqqumiitsulioriaatsit allat misilittarai

Qalipaaginnarnani periutsilli allat aamma atorlugit eqqumiitsuliorsinnaalluarluni, Mimi Josefsenip Aarhusimi ilinniarnermini aamma paasileratarsimanerarpaa.

- Taamaammat annoraamerngit sapanngallu maanna atorneruakka – tullianilu saqqummersitsivimmut naleqqussakkamik saqqummersitsilersaarlunga, aammali assilisanik eqqumiitsuliornermik ilinnialersaarpunga. Taamaaliornissannulli suli iluamik piareersanngilanga.

- Qalipaanerli asoorunnikuunngilara. Sunngiffimmi suli titartaallungalu qalipaasaqaanga, imminulli pinerullunga taamaaliortarpunga.

Kalaaleq eqqumiitsuliornerup oqaluttuarisaaneranik ilisimasalik saqqummersitsinissamillu aaqqissuisartoq Laila Lund Altinbas Mimi Josefsenip saqqummersitsineranik aaqqissuisuuvoq. Taanna Kalaallit Aalborgimi Illuutaannut attuumassuteqarnikuuvoq – Mimi Josefsenillu Aalborgimi atuakkanik atorniartarfissuarmi saqqummersitsineranik piviusunngortitsiseqataasuulluni.

Tassa Mimip saqqummersitsinera Jyllandip avannaani kalaallinik inuusuttunik akuunerulersitsinissamik suliniummeersut, tassa Arctic Street Labimeersut qanimut suleqatigalugit aaqqissuunneqarpoq. Inuusuttut Arctic Street Labimeersut Mimip qalipataanik nivinngaassuisuupput – aamma Kinaavimik taallugu saqqummersitsinerata ammarnerani kaaginik nerisassanillu sassaalliisuupput.

Augustinus Fonden, Aalborg Kommune, Statens Kunstfond aamma Region Nordjylland Mimi Josefsenip saqqummersitsineranut tapersiisuupput.

Mimi Josefsen allapalaarinermik tamanut ammasumik Aalborgimi atuakkanik atorniartarfissuarmi maajip arfineq-aappaani workshoppertitsissaaq.