Pride Parade aallartisarnerani ajuusaarnartumik pisoqartoq

Arctic Soundsertoqarmat illoqarfimmi lastbiili qalipaatigeqisunik pinnersarneqarsimalluni nipilersorfigineqartarlunilu ingerlaarpoq. 

Tassa Pride Paradertoqartoq. Aaqqissuussalli aallartinnissaanut minutsialuinnanngortut aaqqissuisut ajuallaatigisaannik pisoqarpoq.

Suliffeqarfik lastbiilinik piginnittoq lastbiilini atoqqujunnaarpaa, nassuiaatigalugu "gay pride"-mut atorneqarnissaanik ilisimatinneqarsimannginnami.

Arctic Soundsimi pisortaaqataasoq, Laura Lennert Jensen nassuiaavoq lastbiilip atornissaanut suli akiliinerunissamut piumaffigineqarsimallutik, soorlu Arctic Soundsimut isernissamut billetsinik.

- Pride Paradertoqarnissaanut illoqarfimmi suliffeqarfiup lastbiilii attartorsimavagut. Suliffeqarfik aallaqqaataaniilli ilisimatinneqarpoq lastbiili Pride Parademut atorneqartussaasoq, kisianni ilisimasimanngilaat Pride Parade tassaasoq LGBTQIA+-erpalaartumik aaqqissuussaasoq.

- Lastbiili Taseraliup silataanut inissippaat, tassani ingerlaaqatigiinneq aallartittussaammat, lastbiililu pinnersarneqartussaammat. Aallartinnissarli minutsialuinnanngortoq suliffeqarfik nalunaarpoq lastbiili attartortinniarunnaarlugu, paasitinneqarsimannginnamik suiaaqatigiinnut tunngasumik ingerlaaqatigiittoqarnissaanut attartorneqartussaasoq, tamassuma kinguneraa lastbiilip attartorneqarnissaanut suli akiliinerussasugut.

Sooq Pride Paradertoqartarnissaanut takussutissaasoq

LGBTQIA+-mut tunngatillugu aaqqissuussaanera peqqutigalugu akiliisitsisoqarnissaanik piumasaqartoqarnera, gay pridemik aaqqissuussinerup pingaaruteqarneranut takussutissaasoq, Laura Lennert Jensen isumaqarpoq.

-  LGBTQIA+-erpalaartumik aaqqissuussisoqarnissaa peqqutaalluni illoqarfimmi suliffeqarfiup lastbiilinik attartortitserusunnginnera, pridemik aaqqissuussisarnissap pingaaruteqassusaanut takussutissaasoq isumaqarpugut. Kikkut tamarmik inissaqarluinnartariaqarput.

Laura Lennert Jensenip illoqarfimmi suliffeqarfik lastbiilinik attartortitsisoq nittarsaakkusunngilaa, pisimasulli Pride Paradertoqartarnissaanik pisariaqarneranut tamanullu inissaqarnissap pingaaruteqassusianut assersuutaasutut taarusuppaa.

Lastbiilinik piginnittoq Sermitsiap attaveqarfigaa, tusagassiuutitigulli oqaaseqarusunnani oqaatigaa.

Naak pisoq pigaluartoq ingerlaaqatigiinneq tapersersorneqarluarluni naammassivoq. Illoqarfimmi innuttaasut illoqarfimmullu tikeraat, soorlu takornariartaatip tikeraarnerani takornariat aamma ingerlaaqataapput. Ingerlaaqatigiinneq illoqarfimmi pivoq, aqqutaani unillatsiarnerit tusarnaartitsinerillu pisarlutik. Illoqarfimmi innuttaasut alapernaallutik igalaakkut matukkullu alakkartertarput.