Qamuuna misigissutsit nukissarlu

Ivaana Andachanilu, nipilersortartut, nuussuarmi qaammatip tulliani saqqummertussami ataatsimoorlutik saqqummersitsissapput. Arctic Sounds Management tusagassiutitigut taama nalunaaruteqarpoq.

Andachanip Ivaanallu ataatsimut suliaanni nipit immikkuullarissut marluk, eqqissisimasut elektroniskiusullu, ataatsimoortinneqarput, taama tusagassiutitigut nalunaarummi allassimavoq.

- Ivaanap erinarsortartutut/taalliortutut kissalaartumik nipilersoriaasia Andachanip elektroniskimik nuannersumik qitigassioriaasianut akuliunneqarpoq, tamannalu nipimik qamuuna misigissusinik nukissamillu oqimaaqatigiissitsisumik pilersitsivoq, Arctic Sounds Management allapput.

Nuussuaq erinnanik qulinik imaqassaaq, taakkunanilu arfineq-pingasut nutaajullutillu erinnat marluk Ivaanap saqqummersereersimasai ”Nipaassuseq” kiisalu ”Oqarfigilaarusukkuma” nutaatut immiuteqqinneqarsimapput.

- Nuussuarmi saqqummersussamik nipigut ataatsimoortillugit silarsuarmik nutaamik pilersitseqatigiippugut. Sammiviit assigiinngitsut misissuataarlugillu pinngorartitsinikkut immitsinnut unammillerluta nipimik namminiorpalaartumik aammali ataatsimoorfiusutut misinnartumik nassaarpugut, Ivaana oqaluttuarpoq.

Nipilersortartut tamarmik immikkut saqqummersitsinikuullutillu tusarnaartitsisartut, nipilersornermi kinaassutsinik ilisarnarluartunik pilersitsillutillu Nunatsinni, Issittumi Europamilu nipilersornerup silarsuaani ilisarisimaneqarlualersimapput.

- Nuussuup saqqummersinnginnerani erinnat Nuummi, Sisimiuni Reykjavikimilu tusarnaarianut tusaatinnikuuagut, tusarnaartullu tigulluarpaat, taamaammat nuussuup saqqummernissaanut qilanaarpugut, Andachan oqarpoq.