Ataqqisatut qaaqqusaasut

Juaaka Lyberth, Kalaallit Atuakkiortut siulittaasuattut, nunarput Europap qeqqani atuakkialeraluni festivalit annersaannut, tassa “Authors Reading Month”-imut Tjekkiami illoqarfinni sisamani 2026-mi juulip qaammataa naallugu pisussamut ataqqisatut qaaqqusaasoq tusagassiorfinnut nalunaarpoq.

- Nunatta ataqqisatut qaaqqusaanera soorunami angusaavoq annertoorujussuaq. KA-p ukiuni 50-ini atuussimanerani taamatut misigisaqarsimanngisaannarpugut. Atuakkiortunut Nunatsinneersunut ataqqinaataavoq aamma periarfissarujussuulluni, atuakkiortut namminneerlutik najuullutillu atuakkiaminnik nunarsuarmioqatitsinnut saqqummiussisinnaanissaat, Juaaka Lyberth tusagassiorfinnut nalunaarumminni allappoq.

Atuakkiortut marluk, aappaa Tjekkiameersoq aappaalu nunamit ataqqisatut qaaqqusameersoq, atuakkiaminnik festivalertoqarnerani ullut tamaasa atuffassisassaput.

- Nunarsuarmioqatitta atuakkiaatitsinnik soqutiginnikkaluttuinnarneri assut nuannaarutigaara. Tassami soqutiginninneq Tjekkiaminngaaniiginnanngilaq, aammali nunanit allaneerluni, Juaaka Lyberth oqarpoq.