Inuk Jørgensenip filmiliaa Canadami nersornaaserneqartoq
Filmi naatsoq Entropy Inuk Jørgensenip filmiliaa Montreal International First Peoples’ Festivalimi nersornaaserneqarpoq.
Inuk Jørgensen Montrealimi nersornaasiinermi takutinneqartussamik oqalugiaasiorniarluni sisamanngormat ullaaralaakkut makiaartariaqarsimavoq.
Assiliisoq: Inuk Jørgensen
Filmi Entropy silap pissusiata allanngoriartornera pillugu filmiliaavoq, kalaallit isaannit oqaluttuarisaanermi isikkivianit kisitsisit atorlugit nalunaarsuusiorneq qitiutinnagu misigissutsit qitiutillugit filmiliaq, sisamanngorpallu filmi pillugu filmiliortoq Inuk Jørgensen Canadami Montrealimi festivalertitsinermi nersornaaserneqassaaq.
Entropy 2023-mi aasakkut Kujataani inunngorfimmini immiunneqarsimasoq, Inuk Jørgensen Sermitsiamut ilisimatitsivoq. Filmi marsimi CPH:DOX-imi takuteqqaarneqarsimavoq, Frederik Elsnerip Nanook-imeersup nipilersugaanik nipilersuuserneqarsimalluni kiisalu NAPA-mit Visit Southgreenlandimillu tapiiffigineqarsimalluni.
- Pingaaruteqangaarpoq
Inuk Jørgensen nalunaarummi oqaluttuarpoq oqalugiaasiorniarluni sisamanngormat ullaaralaakkut makiaarsimalluni:
- Ullaaralaaq makippunga suliartortinnanga meeqqallu atuarfiliaatsinnagit videokkut inuulluaqqussusiorniarlunga. Qujanartumik ullaaralaakkut suli qaamasarmat video nassiussinnaasimavara.
Nersornaat pingaaruteqangaartoq, filmiliortartoq Sermitsiamut oqarpoq:
- Nersornaat uannut pingaaruteqartorujussuuvoq, soorunami filmiliortartutut nersorniarneqarama, pingaartumilli kalaallit eqqumiitsuliortartuinit oqaluttualiaanera pissutigalugu.
- Filmi immiunneqarmalli kujataanit innuttaasunillu tapersersorneqangaarpoq, taamaattumik taakkua - uagullumi ataatsimoorluta - suliarisimasatsinnut uppernarsaataavoq, Inuk Jørgensen Sermitsiamut allappoq.
Tuluit Nunaanni festivalimut qaaqquneqartoq
Filmimut aningaasanik tunissuteqarsimasut amerlasuut, ilaatigut Kalaallit Nunaannit tamarmeersut, aammalu nunani avannarlerni nunallu inoqqaavisa akornanni filmiliortartuneersut, immiussinerup nalaani tamatumalu kingorna suleqatigisimasani, qujassutissarujussuusut aamma oqaluttuarpoq.
Filmi Canadami nersornaaserneqarnerup saniatigut aamma Tuluit Nunaanni Wildscreen Festivalimi takutinneqartussatut qaaqquneqarpoq. Entropy festivalip 43-ssaanik ingerlanneqarnerani filminut 33-nut pisortatigoortumik toqqarneqartunut ilaavoq.
Inuk Jørgensen naapertorlugu festivalimi „Panda Awards“ „filmiliortartut Oscariattut qorsuttut“ assersuunneqarsinnaavoq.
- Kalaallit filmiliaat naatsoq taakkununnga ilaasinnaanera angingaarpoq taamatullu pisoqarnikuunngilaq, Inuk Jørgensen oqarpoq.
