Inuunermi misigisaq puigunaatsoq

Hjørringimi Dana Cup sapaatip akunnerani kingullermi ingerlanneqarmat, Nunarput inuusuttunik arnanik 100-nit amerlanerusunik arsaattartunik peqataatitaqarpoq.

Niviarsiaqqat U-15-imeersut 17-it, Nuummi B-67-imeersut immikkut maluginiarneqarput. Taakku Dana Cupimik aaqqissuisunit toqqagaapput, peqataanerat najugaqarnerallu aaqqissuisunit isumagineqarluni.

Dana Cupip Arctic Importillu aamma Rema 1000-ip suleqatigiinnissaq pillugu immikkut ittumik isumaqatigiissuteqarnerisigut tamanna pivoq, suliffeqarfiillu taakkua marluk Dana Cup tapersersorpaat qinnuigalugulu tapersersuinertik ingammik kalaallit niviarsiaqqat arsaattarnerannut iluaqutaassasoq.

- Kalaallit arnat arsaattartut maannamut angutinit tunulliunneqartarsimapput, tamannali allanngortikkusupparput, Henrik Kronborg Arctic Importimi tuniniaanermut pisortaq oqarpoq.

- Dana Cupimik suleqateqarnerput aningaasaliissuteqarnerinnaanngilaq. Tamannami inuusuttunut taakkualu peqatigiiffimminni ataatsimoornerannut aningaasaliineruvortaaq.

- Arsaattarneq ataqatigiinnerulersitsisarpoq piginnaanernillu pingaarutilinnik ineriartortitsisarluni – tamatumalu saniatigut timersornerup iluani naligiissitaanerup pingaaruteqarneranik erseqqissaanissamut periarfissatsialaalluni. Kalaallit niviarsiaqqat arsaattartut Dana Cupimi peqataasinnaanissaat nunanilu tamalaani arsaattartut akornanni peqataanerannut tapersiisinnaanerput tulluussimaarutigaarput.

Tapersersuineq pingaaruteqarluinnartoq

- Tapersersuineq nuannaarutigeqaarput, niviarsiaqqammi misigisaqarluarmata, tamannalu aamma timersoqatigiiffiup siunissami niviarsiaqqanik sullissineranut pingaaruteqarluinnassaaq, Nikolaj Mathæussen, B-67-ip niviarsiarartaannut U-15-inut sungiusaasoq oqarpoq.

- Timersoqatigiiffik minnerunngitsumillu angajoqqaajusut angalanissamut aningaasanik katersuiniarnerminni ukiuni kingullerni ilungersorsimapput. GM-ertoqarnerini arlalinni Inussivimmi kioskimut akisussaanikuuvugut. Taamaattumik niviarsiaqqat Arctic Importip aamma Rema 1000-ip tapersersuinerisigut nerisaqarnissaminnut unnuiffissaminnullu akiliunneqarumaartut paasigatsigu, nuannaarneq killeqanngilaq.

Nikolaj Mathæussenip panini Ivaana aamma qujassutissaqarfigaa, ullumikkut niviarsiaqqanut arsaattartunut sungiusaasuunerminut – aamma Hjørringimut angalaqataasinnaanerminut.

- Ivaanap ania Dana Cupimi pingasoriarluni peqataasimavoq, namminerlu aamma misilikkusullugu oqaatigiuaannarsimallugu. Niviarsiaqqalli sungiusaasussaminnik amigaateqarmata sungiusaasunngornissara akueraara. Meeqqavut pingaarnerpaapput, taamaattumik akuersisariaqarsimavunga - aammami peqqissimissutigisimanngisaannarpara.

- Angalanerput nuannerluinnarpoq, maannalu angerlamut utereersimalerpugut, tamatta nutaamik nukissaqarluarluta. Tamanna kalaallit arnat arsaattarnerannut pingaaruteqarluinnassaaq, tamanna qularinngilluinnarpara, Nikolaj Mathæussen oqarpoq.

Arsaattarfiit eqqortumik angissusillit

Nukappiaqqat aamma taama isumaqarput, tassami Ungaaq Abelsen nukappiaqqat U-13-it qulit missaat ilagalugit Hjørringimeeqataavoq.

- Arsaattarferujussuarmi nunanit tamalaanit peqataaffigineqarsinnaasumi arsaannermik misiliisinnaagatta nuannaarutigeqaarput. Tassami Nuummi qaqutiguinnaq taama periarfissaqartaratta, Ungaaq Abelsen nassuiaavoq.

- Meeqqat arsaattartut peqataasinnaanerat pingaaruteqartorujussuuvoq, inuunerminni misigisassatut nuannernerpaatut isigissavaat. Angajoqqaat aningaasaliisullu qujamasuutigaavut, meeqqammi nuannersumik misigisaqartinniarlugit ilungersorsimammata. Qularinngilara inuunerminni puigunngisaannassagaat — inuunerminni misigisassatut nuannernerpaatut isigissavaat.

Nukappiaqqat angalanertik aamma nuannaarutigaat. Ingammik Danmarkimi arsaattarfiit angisuut maluginiarluarneqarlutik.

 - Sapaatip akunnera nuannerluinnarpoq, Jens Jørgen, Minik aamma Lucas B-67-ip nukappiarartaanni U13-imeersut oqarput.

- Arsaattarfik angisooq ilumoortunik ivigaaralik aatsaavissuaq arsaaffigaarput, soorlu tv-kkut arsaattunik isiginnaaraangatta takusartakkatsitut. Arsaattarfik angisooq uatsinnut futsalertartunut angivallaarami, arpannerulaarnissarli annilaangaginngilara, Minik oqarpoq.

- Maani nuanneqaaq — piffissaq tamakkerlugu nuannisarpugut. Kiannera uannut ajoqutaanngilaq — siallernissarsualu oqaluuserineqaqisoq malugisimanngilarput. Sialualaartarnera kisiat malugivarput, Lucas tapersiilluni oqarpoq.

Angerlarsernissamut piffissaqartoqanngitsoq

- Pisoqarfiungaarmat angerlarsernissatsinnut piffissaqannginnatta. Angerlarsinngilagulluunniit, Jens Jørgen oqaluttuarpoq.

B-67 Dana Cupimi katillugit holdinik qulinik peqataatitaqarpoq. Taakku saniatigut IT-79-ip Nuummeersup holdit marluk aamma K1933-p Qaqortumeersup holdi ataaseq peqataatitaralugit.

- Dana Cupimi peqataasut Hjørringimiinnerminni atuarfinni unnuisarput – Vendsysselimilu atuarfiit tamangajammik atorneqarsimallutik. Ullut tamaasa peqataasut kajumissutsiminnillu ikiuuttut tamaasa nerisittarpavut – nerinerit tamaasa 15.000-ingajannik nerisoqartarluni, Dana Cupimi paasissutissiinermut pisortaq Torben Vandsted oqaluttuarpoq.

Iligiit tamarmik sungiusaammik unammisarput, minnerpaamillu pingasoriarlutik pingaarutilinnik unammisarlutik, kiisalu Dana Cupimi pissartanngorniunnermi tunngaviusumi anngunniullutik unammisarput. 15-it inorlugit ukiullit marloriarlutik 20 minutsini unammisarput, angajulliunerusullu marloriarlutik 25 minutsini unammisarlutik.

Sapaatip akunnerani ataatsimi unammisaqattaarnerni arsaattarfinni 63-ini katillugit 2542-riarluni unammisoqarpoq.