Motzfeldt USA-mit tatineqarnerup nalaani ataatsimoorsimanermut qujavoq

Nunanut Allanut tunngasutigut naalakkersuinikkut ingerlatsineq pillugu nassuiaat Inatsisartuni sisamanngornermi oqaluuserineqarpoq, soorunalumi USA-miit tatineqarneq qitiuvoq.

Demokraatit oqaaseqartartuata Justus Hansenip pissutsit suli ilungersunartut oqaatigaa:

- Nunanut Allanut politikkitigut inissisimanerput imaannaanngilaq. USA-mi pisoq nalornilersitsiinnarani nunatsinnut, siunissatsinnullu nammineq aalajangiisinnaassuseqarnitsinnut tunngaviusumik apeqquteqalersitsivoq.

- Kalaallit Nunaannik aqutsiniarneq amerikap tungaaniit oqaatigineqaqattaartillugu, tamanna oqaasiinnaanngilaq. Tamanna pimoorulluinnartariaqarparput, Justus Hansen oqarpoq.

Politikikkut sunniiniartoqarsinnaanerata aarlerinaateqarnera mianersoqqussutigaa:

- Taamaattumik mianersorluassaagut. Pingaartitagut, inuinnaat oqartussaatitaanerat, ataqatigiinnerpullu aalajangiusimassavagut. Taamatut pisoqarnera iligisagullu ikioqatigiinnissarput Demokraatinut qitiulluinnarpoq, Justus Hansen EU-mik NATO-mik Kunngeqarfimmillu suleqateqarnermik pingaartitsisoq oqarpoq:

- Uagut angerlarsimaffipput, kitaani suleqatigiiffiuvoq. Ataqqinninnermik, tamat oqartussaanerinik, ataatsimullu pingaartitanik aallaavilimmik EU-mi, NATO-milu suleqateqarpugut. Nunarsuatsinni eqqissiviilliortumi taakkunani allanngujaassuseq ippoq.

- Ilutigisaanik Kunngeqarfimmi ataatsimoornissarput aalajangiisuuvoq, Justus Hansen oqarpoq. Oqallinnermi USA-miit suli siooranartoqartoq arlaleriarluni oqaatigaa.

Atassutip siulittaasuata Aqqalu C. Jerimiassenip oqaaseqaammini politikerit assigiinngitsunik isummerfigisaat oqallinnermilu qaqittaqattaagaat sammivaa – tassa Nuummi annertusaaneq sakkutoorpassuillu:

- Naallu Atassummiit illersornissakkut allatigullu suliniutit tamakkiisumik tapersersoraluaqalutigit, nunarsuarmioqatittalu erseqqissumik soqutiginnillutittaaq iliuuseqaqataanermikkut sakkutuunik NATO-mi ilaasortaneersunit tikittoqartarnera toqqammavimmigut ajunngittuugaluaq, nunaqqaterpassutsinnit ingammik nuummiunit apeqqusersuineq annertoriartorpoq, Aqqalu C. Jerimiassen oqarpoq, nangipporlu:

- Tassalu illoqarfiup pingaarnersaatut inissisimasumi sakkutooqarneq aallaasisartunit assut apeqquserneqartalerluni iluarineqaannaranilu. Tamanna Atassummiit tusaanngitsuusaaginnarusunngilarput.

Toqqissisimatitsinissaq siunertarineqaraluartoq sakkutooq sakkutuujusoq Atassutip siulittaasua oqarpoq.

- Taannalu allamiitikkusunneqarpat naalagaaffeqatigiit iluani oqaloqatigiinnigut pitsanngorsartariaqarpagut, ingasammik mittarfiit marluk anngajaat pingaarnertut inissisimajunnaarnikuusut pioreersillugit. Taakku periarfissaasinnaasut atagu naalagaaffimmi oqartussaasut qanimut oqaloqatigilaartigit.

Kangerlussuat Narsarsuarlu pivai.

Donald Trumpip oqaaseqaqattaarnera qatsunnaraluartoq USA-p suleqatiginissaa avaqqunneqarsinnaanngitsoq Atassummi siulittaasoq oqarpoq:

- Qanorluunniit iluaagitigigaluarutsigu tassa suleqatiginerata USA-p ingerlattariaqarnera nangeqqiinnangassanngorteqqarpasipparput, niuernikkut nunarsuullu sinneranut suleqataanikkuuppat, naalagaaffeqatigiinnermut akuunissatta toqqarneqarnera Naalakkersuisut siulittaasuannit pisortatigoortumik erseqqissumik oqariartuutigineqareernikuuvoq, taannaavorlu maanna illersuutitta annertunerpaartareriigaa, Aqqalu C. Jerimiaasen oqarpoq.

Siumup oqaaseqartartuata Erik Jensenip Issittumi sakkutooqarneruleriartornera isornartorsiorpaa:

- Issittumi sakkutooqarneruleriartorpoq, sulilu amerlanerusunik sakkutuulersuisoqarnissaq ingerlaannassaaq.

- Sakkutuulersuinerit ima annertutigilersimapput allaat Nuuk maanna sakkutooqarfimmik taaneqartarluni, Erik Jensen oqarpoq.

Siumut Ilulissani isumaqatigiissummik innersuussivoq:

- Nuup nunalu tamakkerlugu sakkutooqarfeqalernissaa siunertarineqarnikuunngisaannarpoq, Erik Jensen oqarpoq.

Siumut Naalakkersuisunut kaammattuutigaa, Arctic Five-p (Danmark/Kalaallit Nunaat, USA, Canada, Norge Ruslandilu) ataatsimeeqqittariaqarnerat, Ilulissanilu isumaqatigiissutip suli atuuttuuneranik apeqqusiinissaq – tassa Issittoq sakkulersorfiunngilluinnassasoq eqqissisimasumillu aqunneqassasoq. Ataatsimoorussamik nalunaarummik nassaartoqartariaqartoq, Erik Jensen oqarpoq.

Oqallinnermi attaviitsoq Vivian Motzfeldt Erik Jensenimut aperivoq isumaqarnersoq nunap nunamut allamut saassussisup sorsuttullu Issittumi eqqissinissamik nalunaarummik atsioqataanissaa inissimaniinnersoq.

Motzfeldtip nunap aqqa taanngilaa, Erik Jensenili akivoq Ruslandimik oqaloqateqarneq Ukrainemut sorsunnermut akuersaarnertut isigineqassanngitsoq:

- Nukivut sorsunnernut atorunnaariartigit. Eqqissinissarli sulissutigisigu. Imaassanngilaq nunap allamut sorsunnera akueriinnassagipput, Erik Jensen oqarpoq.

Inuit Ataqatigiit oqaaseqaataani aamma USA-p Kalaallit Nunaannut tatisineranut tunngasoq eqqartorneqarpoq.

Inuit Ataqatigiit oqaaseqartartuata Pipaluk Lyngep nunanut allanut naalakkersuisoqarfimmi sulisut USA-mit tatineqarnerminni qasusuillutik sulinerat pillugu qutsavigai.

Aamma nunat amerlasuut Kalaallit Nunaannik tapersersuisimasut qutsavigai:

Inuiaqatigiittut tatineqarnitsinni ataatsimoorpugut, nunat avannarliit Europallu aammattaaq nunarsuup sinnerata suleqatigiikkusussuseqarnerat tapersersuerusunnerallu ersarippoq.

USA-p Kalaallit Nunaat tiguarniarsarippagu EU-p aningaasatigut sakkussiani atorumaaraat eqqaavaa.

Suleqatiginnikkusussuseqarnerat toqqissiallaatigeqaarput, suleqatiginnikkusunnerannillu qutsavigalugit, Islandi, Savalimmiut, Frankrigi, Tyskland nunallu allarpassuit aamma tapersersuipput.

Nunanut allanut politikki eqqartorneqartillugu nunatta Danmark peqatiginngikkaluarlugu USA oqaloqatigisinnaagaa, Naleqqap siulittaasua Pele Broberg nunanut allanut politikki pillugu oqallinnermi oqarpoq.

USA-p Kalaallit Nunaannut tatisineranut atatillugu, tamanna oqallisigineqarpoq.

Maannakkut inatsisit naapertorlugit Danmark nunanut allanut sillimaniarnermullu tunngasunik akisussaaffeqarpoq.

Taamaattumik Danmarkimi nunanut allanut ministeri Lars Løkke Rasmussen taamani nunanut allanut tunngasunut naalakkersuisuusoq Vivian Motzfeldt peqatigalugu januaarimi Washingtonimut Amerikamiunik isumaqatiginninniariartorput.

Kisianni kalaallit pisinnaatitaaffii eqqartorneqartariaqarput, Pele Broberg ullumi oqallinnermi oqarpoq.

Vivian Motzfeldt Washingtonimiit kalaallisut oqalugiarnera Pele Brobergip nersualaarpaa, tassani Kalaallit Nunaanni innuttaasorpassuit toqqaannartumik oqaluffigimmagit.

Naleqqap suleqataasinnaasut katersornissai kissaatigaa, taakkualu qallunaajunersut, amerikamiuunersut apeqqutaatinneqanngitsoq, Pele Brobergip erseqqissarpaa.

Inatsisartut upernaakkut ataatsimiinnerat marlunngormat aallartippoq. Naalakkersuisoqatigiit Inatsisartut ataatsimiinnerisa siulianit partiimik ataatsimik ikilinikuummata ataatsimiititaliat allanngortiterneqartussanngornikuupput.

Ataatsimiinnermi matoqqasumi tamanna pivoq, aalajangiinerillu Inatsisartut nittartagaanni manna saqqummiunneqarsimalerlutik.

Ataatsimiititaliat qanoq agguataarnerat uani takukkit:

Aningaasaqarnermut Akileraartarnermullu Ataatsimiititaliaq

· Siulittaasoq: Aqqalu C. Jerimiassen (A)

· Siulittaasup tullia: Pele Broberg (N)

· Ilaasortaq: Hans-Erik Enoksen (D)

· Ilaasortaq: Margrethe Thårup Andersen (D)

· Ilaasortaq: Ane Hansen (IA)

Nunanut Allanut Sillimaniarnermullu Ataatsimiititaliaq

· Siulittaasoq: Pipaluk Lynge (IA)

· Siulittaasup tullia: Pele Broberg (N)

· Ilaasortaq: Justus Hansen (D)

· Ilaasortaq: Nivi Heilmann Efraimsen (IA)

· Ilaasortaq: Bentiaraq Ottosen (A)

Aalisarnermut, Piniarnermut Nunalerinermullu Ataatsimiititaliaq

· Siulittaasoq: Bentiaraq Ottosen (A)

· Siulittaasup tullia: Jens NapãtôK’ (N)

· Ilaasortaq: Ane Hansen (IA)

· Ilaasortaq: Pipaluk Olsen (D)

· Ilaasortaq: Kristian Jeremiassen (IA)

Inatsisinut Ataatsimiititaliaq

· Siulittaasoq: Aqqalu C. Jerimiassen (A)

· Siulittaasup tullia: Kuno Fencker (N)

· Ilaasortaq: Karen-Marie Kyed Frederiksen (D)

· Ilaasortaq: Nivi Rosing (IA)

· Ilaasortaq: Bo Martinsen (D)

Kukkunersiuinermut Ataatsimiititaliaq

· Siulittaasoq: Nivi Rosing (IA)

· Siulittaasup tullia: Erik Jensen (S)

· Ilaasortaq: Ida Vahl (D)

· Ilaasortaq: Mimi Karlsen (IA)

· Ilaasortaq: Bentiaraq Ottosen (A)

Ilaqutariinnermut Peqqissutsimullu Ataatsimiititaliaq

· Siulittaasoq: Pipaluk Olsen (D)

· Siulittaasup tullia: Aki-Matilda Høegh-Dam (N)

· Ilaasortaq: Bo Martinsen (D)

· Ilaasortaq: Paarma Lund Kreutzmann (IA)

· Ilaasortaq: Bentiaraq Ottosen (A)

Kultureqarnermut, Ilinniartitaanermut Ilisimatusarnermut Ilageeqarnermullu Ataatsimiititaliaq

· Siulittaasoq: Nivi Heilmann Efraimsen (IA)

· Siulittaasup tullia: Isak Johannesen (N)

· Ilaasortaq: Margrethe Thårup Andersen (D)

· Ilaasortaq: Karen-Marie Kyed Frederiksen (D)

· Ilaasortaq: Nivi Rosing (IA)

Sanaartornermut Ataatsimiititaliaq

· Siulittaasoq: Justus Hansen (D)

· Siulittaasup tullia: Gerth Mikaelsen (N)

· Ilaasortaq: Hans-Erik Enoksen (D)

· Ilaasortaq: Nivi Heilmann Efraimsen (IA)

· Ilaasortaq: Bentiaraq Ottosen (A)

Inuussutissarsiornermut- Aatsitassanullu Ataatsimiititaliaq

· Siulittaasoq: Mimi Karlsen (IA)

· Siulittaasup tullia: Juno Berthelsen (N)

· Ilaasortaq: Napaartoq Petrussen (D)

· Ilaasortaq: Vivian Motzfeldt (Attaviitsoq)

· Ilaasortaq: Aqqalu C. Jerimiassen (A)

Eqqissisimatitsinermut Avatangiisinullu Ataatsimiititaliaq

· Siulittaasoq: Napaartoq Petrussen (D)

· Siulittaasup tullia: Mette Arqe-Hammeken (N)

· Ilaasortaq: Parma Lund Kreutzmann (IA)

· Ilaasortaq: Kristian Jeremiassen (IA)

· Ilaasortaq: Bentiaraq Ottosen (A)

Qinigaanerup Misilinneqarnissaanut Ataatsimiititaliaq

· Siulittaasoq: Paarma Lund Kreutzmann (IA)

· Siulittaasup tullia: Kuno Fencker (N)

· Ilaasortaq: Karen-Marie Kyed Frederiksen (D)

· Ilaasortaq: Bo Martinsen (D)

· Ilaasortaq: Bentiaraq Ottosen (A)

Suleriaaseq pillugu Ataatsimiititaliaq

· Siulittaasoq: Kim Kielsen (Attaviitsoq)

· Ilaasortaq: Per Berthelsen (D)

· Ilaasortaq: Mimi Karlsen (IA)

· Ilaasortaq: Aki-Matilda Høegh-Dam (N)

· Ilaasortaq: Aqqalu C. Jerimiassen (A)

· Ilaasortaq: Lars Poulsen (S)

Inatsisartut ippassaq matoqqasumik ataatsimiinnerminni ataatsimiititaliani sorlerni kikkut ilaasortaanissaat aalajangerpaat, ataatsimiititalialli nutaat katitigaanerat suli tamanut saqqummiunneqanngilaq.

Nivi Rosingili (IA) ataatsimiititaliami ataatsimi ilaasortaanerminit pingasunut ilaasortaalersimalluni Facebookimi allappoq.

Allagaq naapertorlugu Kukkunersiuinermut Ataatsimiititaliami siulittaasunngorlunilu, Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliami aamma Inatsisinut Ataatsimiititaliami ilaasortanngorpoq.

- Saniatigut aamma qinigaasinnaassuseq pillugu ataatsimiititaliami ilaasortaallungalu inatsisartut sinnerlugit ICC-mut aallartitaallunga.

- Taakkununnga sulinissara qilanaaringaarpara, taanna allappoq.

Inatsisartuni ataatsimiititalianut ilaasortanngortut allattorsimaffiat suli tamakkiisumik saqqummiunneqanngitsoq politikeri alla pingaarutilimmik atorfittaarsimalluni Facebookikkut nalunaarpoq.

Isumaginninnermut, suliffeqarnermut, nunamut namminermut avatangiisinullu naalakkersuisuusimasoq Bentiaraq Ottosen (A) Inatsisartut Aalisarnermut, Piniarnermut Nunalerinermullu Ataatsimiititaliaanni siulittaasunngorsimalluni allappoq.

- Qularnanngitsumik suliassarpassuaqarpoq aamma pingaaruteqarpoq aalisarnikkut inuussutissarsiuutigisaq pillugu sukataaruteqartuarnissara, taanna allappoq.

Bentiaraq Ottosen suliffissarsiorfimmik nutaamik suliap iluatsinngitsoortup kingunerisaanik 2025-mi novembarimi naalakkersuisutut tunuarpoq. Taamanimiilli ullumikkumut ataatsimiititaliami ilaasortaasimanngilaq.

Inatsisartuni oqaluuserisassat marluk ullumi ippassarlu pisussat, Kalaallit Nunaanni nalunaaquttap ingerlaaqatigiiffiata UTC-3-mut utertinniarlugu suliarineqartussaagaluarput.

Ataatsimiinnermi oqaluuserisassat aammaarlutik kinguartinneqarput. Inatsisinut Ataatsimiititaliap piumasaqarneratigut kinguartitsisoqartoq Inatsisartut siulittaasuat Kim Kielsen (S) marlunngormat paasissutissiinermini oqarpoq.

Siumut Nalerarlu – maanna illuatungiliuttut – nalunaaquttap ingerlaarfiata allanngortinneqaqqinnissaa siunnersuutigaat, taamaalilluni Danmarkip nalunaaqutaanit akunnernik sisamanik nikingassutaaqqilissalluni. Aamma aasaanerani nalunaaqutaq atorunnaarsinneqassalluni.

2025-mi ukiakkut ataatsimiinnermi siullermeerneqarput, tassanilu naammassineqartussaagaluarlutik. Ukiuunerani ataatsimiinnermut kinguartinneqarput, ullormili siullermi taamaatiinnarneqarlutik. Maanna kinguarteqqinneqaqqipput.

Ullormut oqaluuserisassanut pilersaarutit maanna atuuttut malillugit maajip tallimaani aappassaaneerneqartussanngorpoq maajillu 15-iani pingajussaaneerneqassallutik.

Aalajangiinissap sooq kinguartinneqartarera paasissutissiissutigineqanngilaq. Siullermeernerani partiinit tamanit tapersersorneqarpoq, kingornali Siumut naalakkersuisooqatigiinnermit anivoq.

Inatsisartut isumaqatigiillutik 2022-mi nalunaaqutaq maannakkutut UTC-2-mut allanngortinniarlugu aalajangerput, Siumulli kukkussuteqarsimallutik maannalu tamanna aaqqiviginiarlugu Sermitsiamut nassuerutiginikuuaa.

Demokraatinit Jørgen Rosbach Naalakkersuisunngorlaat ilagaat.

Siorna Inatsisartunut qinigaavoq, akisussaaffeqarnerunissanilu piareersimaffigalugu Sermitsiamut oqaluttuarpoq.

Siorna Inatsisartunut qineqqusaarama akisussaaffeqarnerunissara, Inatsisartuni ataatsimiititaliani sulineruppat Naalakkersuisuniluunniit akisussaaffeqalissaguma, tunuarsimaarfiginiarnagu aalajangiutereersimavara. Taamaammat piareersimavunga, Jørgen Rosbach oqarpoq.

Sorliit pingaarnersiugaralugit suliariniarnerai pillugit aperineqarami piffissaq siulleq atorlugu akisussaaffeqarfiit, tassaasut avatangiisit, pinngortitaq, nukissiuteqarneq ilisimatusarnerlu, paasisaqarfigissalugit oqarpoq.

Suliniutut ingerlanneqartussat Naalakkersuisut isumaqatigiissutaat naapertorlugit ingerlanneqarumaarput, taanna oqarpoq.

IA-meersoq Iddimanngiiu Jensen Bianco Tasiilamiu siullerpaamik Naalakkersuisunut ilaasortanngorpoq. Ineqarnermut, attaveqaasersuutinut, isorliunerusunut upalungaarsimanermullu naalakkersuisunngorpoq.

Iddimanngiiu Jensen Bianco akisussaaffimmik tigusinissaminut piareersimalluni Sermitsiamut oqarpoq:

- Uanga nammineq isorliunerusuneersuuvunga, tamannalu suliannut sunniuteqangaassaaq, aammali attaveqaasersuutinut tunngatillugu. Maannakkorpiaq Tunumi ilaasunik angallassinermi suli unammillernartoqartoq takusinnaavarput, aammali inissiat arlallit aserfallassimasut, oqarpoq.

Naalakkersuisunngornermini unammilligassaqarnini isertuutinngilaa, sakkortuumik pingaarnersiuinissamut piareersimavoq:

- Nunatta isorliunerusuni unammilligassai soorpiaanersut misissorniarpakka, iliuuseqarfigineqarsinnaasullu iliuuseqarfigalugit. Suliap aallartinnissaanut qilanaarpunga, Iddimanngiiu Jensen Bianco oqarpoq.

Naalakkersuisunut ilaasortanngortut pingasut sulinngiffeqarniarlutik qinnuteqartut akuerineqarput.

Aammattaaq Naalakkersuisunut ilaasortaq nutaaq, Marita Broberg (A), qinigaasinnaatitaanera akuerineqarpoq.

Ane Hansen Kristian Jeremiassenilu IA-p Naalakkersuisunut ilaasortanngortuinut sinniisut iserput.

Ida Vahl Demokraatit sinnerlugit Naalakkersuisunut ilaasortanngorlaap Jørgen Rosbachip sinniisussaattut qaaqquneqarpoq.

Inatsisartut nalunaaqutaq 12.15-ip tungaanut unilaarput.

Siulittaasoqarfiup Naalakkersuisunut ilaasortanngortut pingasut Inatsisartuni ilaasortaanerminniit sulinngiffeqarnissamik qinnuteqaataat suliarissavai.

Taakku tassaapput Jørgen Rosbach, Marianne Paviasen kiisalu Iddimanngiiu Jensen Bianco.

Sivisuumik oqallittoqareersoq Jens-Frederik Nielsenip Naalakkersuisunngortitsinissamut siunnersuutaa maanna taasissutigineqartussanngorpoq.

18-it naalakkersuisussat akersissutigaat, qulit taaseqataanngillat.

Naalakkersuisut nutaat piviusunngorput.

- Inatsisartut Naalakkersuisullu akornanni ukiuni aggersuni pilersitsiviusumik ineriartortitaqarfiusumullu suleqatigiinnissaq qilanaaraara, Jens-Frederik Nielsen oqaluttarfimmit oqarpoq.

Akisussaaffiit agguartaarnerat ataani takuneqarsinnaapput.

Siumumi Naalakkersuisunilu ilaasortaasimasoq Vivian Motzfeldt aamma oqallinnermut akuliuppoq:

- Innuttaasut nipi torersoq inimi maani ataqqinartumi qanorluunniit isumaqatigiinngitsigigaluaraanni maqaasigaat qularinngilara. Eqqartuussisuunngilagut, oqarpoq.

Erik Jensen Siumumeersoq suli oqaluttarfimmiippoq Anna Wangenheimillu folketingimut qineqqusaarnikuusoq Naalakkersuisunngortunut nutaanut ilaaneranut isorinninninnermut apeqqutit akiorlugit.

Naalakkersuisut nutaat pillugit Naleraq oqaaseqarpoq:

- Piffissami kingullermi allanngortoqarujussuarnikuuvoq. Qanittukkut qanermut assiaquteqartoqartarpoq, maannali soorlulusooq isitigut assiaquteqartoqarluni inuiaqatigiit isiginngitsuusaarneqartutut pineqarput, oqaaseqartoq Jens Napãtôk oqarpoq.

Jens Napãtôk inuiaqatigiinni pissutsit iluarinngisani sivisuumik oqaluuserai.

Taamaattumik Naleraq Naalakkersuisunut ilaasortassanik nutaanik taaseqataarusunngilaq. Taamaammat taaseqataaqqinnianngilaq.

Siumut aamma akuerseqataarusunngilaq

Siumut aamma taaseqataanianngilaq.

- Naalakkersuisut suliassaaleqinavianngillat. Tupaallannarlunilu eqqumiilaarpoq Naalakkersuisunut ilaasortanngortussat allani suliffissarsiortut imaluunniit Danmarkimut angalaniarlutik pilersaarusiortunut innersuunneqarmata, Erik Jensen oqarpoq.

Erik Jensenip Anna Wangenheim Folketingimut qineqqusaarnikuunera pigunarpaa.

Taanna IA-meersup Pipaluk Lyngep qisuariarfigaa, Siumullu qineqqusaarnermut akerliunnersoq apeqqutigalugu.

- Siumumiit pisinnaatitaaffiit assigiinngitsut illersorpavut, uagutsinnullu eqqumiippoq naalakkersuisup periarfissanik nutaanik ujartuinera, Erik Jensen oqarpoq.

Wangenheim oqaaseqarumavoq

Siulittaasoq Kim Kielsen akuliuppoq erseqqissarlugulu Folketingimut qinersineq oqaluuserineqarani Naalakkersuisut nutaat oqallisigineqarnerat.

Taamaalilluni Naalakkersuisut nutaat taassissutigineqarnissaannut oqallinneq sivitsorpoq. Naalakkersuisunut ilaasortat folketingimut qinigassanngortinnerat Erik Jensenip isornartorsiornera attappaa.

Anna Wangenheim oqaaseqarumavoq, qineqqusaarnissamut aalajangertinnani eqqarsaatigilluarsimallugu oqarpoq.

Naalakkersuisutut suliassani tamakkiisumik suliarisimallugu oqarpoq.

Jens-Frederik Nielsen maanna oqaluttarfimmukarpoq.

Naalakkersuisunngortussanut innersuussani taasissutigeqquai.

Naalakkersuisuni ilaasortanngortut nutaat sisamat tassaapput Jørgen Rosbach (D), Iddimanngiiu Jensen Bianco (IA) og Maritha Broberg (A) Mariane Paviasen Jensenilu (IA).

IA-p siulittaasuata Múte B. Egedep Vivian Motzfeldtip nunanut allanut tunngasunut akisussaaffia, USA-mit tatineqarneq pissutigalugu immikkut ittumik tatineqarsimasoq, tigugaa immikkut maluginiagassaavoq.

IA-mi siulittaasup tullia Aqqaluaq B. Egede aningaasaqarnermut naalakkersuisunngorpoq.

Naalakkersuisuni ilaasortaaffiit agguataarnerat aaku:

Naalakkersuisut Siulittaasuat: Jens-Frederik Nielsen (D)

Nunanut Allanut, Inuutissarsiutinut Aatsitassanullu Naalakkersuisoq: Múte B. Egede (IA)

Aningaasaqarnermut Naalakkersuisoq: Aqqaluaq B. Egede (IA) Ilinniartitaanermut, Kultureqarnermut Timersornermut Ilageeqarnermullu Naalakkersuisoq: Nivi Olsen (D)

Avatangiisinut, Pinngortitamut, Nukissiuteqarnermut Ilisimatusarnermullu Naalakkersuisoq: Jørgen Rosbach (D)

Meeqqanut, Inuusuttunut, Inatsisit Atuutinneqarnerannut Naligiisitaanermullu Naalakkersuisoq: Mariane Paviasen Jensen (IA)

Peqqissutsimut Inunnullu Innarluutilinnut Naalakkersuisoq: Anna Wangenheim (D)

Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisoq: Iddimanngiiu Jensen Bianco (IA)

Aalisarnermut, Piniarnermut, Nunalerinermut Imminullu Pliersornermut Naalakkersuisoq: Peter Borg (D)

Isumaginninnermut, Suliffeqarnermut, Ilaqutariinnut Nunamullu Namminermut Naalakkersuisoq: Maritha Broberg (A)

Inatsisartut maannakkut siulittaasussamik qinersinialerput.

Demokraatit Kim Kielsen siulittaasussatut innersuuppaat, taamaalillunilu taanna ingerlaqqittussanngorpasilluni.

Vivian Motzfeldt siulittaasup tulliatut innersuunneqarpoq.

Politikerit taakku marluk naalakkersuisooqatigiinnik tapersersuiuarnissamik isumaqatigiissuteqarput, tamannalu Kim Kielsenip siulittaasutut ingerlaqqinnissaanut pissutaasimagunarpoq.

Naleqqamiit Jens Napãtôk’ kingorna oqaluttarfimmukarpoq. Suleriuseq pillugu ugguarluni oqarpoq, tassami Naleraq siulittaasup ukiamut qinersisoqannginnerani qinerneqartariaqarsimagaluartoq isumaqarpoq.

Illuatungiliuttut naammaginninngillat

Naleraq taaseqataassanngitsoq oqaatigineqarpoq.

Kim Kielsen siulittaasup (nammineq) attaviitsunngornikuunera pissutigalugu qinersisoqartariaqartoq oqarpoq.

Suleriuseq malinneqartoq isumaqarpoq.

Erik Jensen maanna oqaluttarfimmukarpoq. Suleriuseq malinneqarsimanngitsoq aamma isumaqarpoq.

Kim Kielsenip Erik Jensen unitseriarlugu siulittaasussamik toqqaanissaq oqaluuserineqartoq eqqaasitsissutigaa.

Kim Kielsen 18-init akuerissutigineqarluni siulittaasutut toqqarneqarpoq.

Inatsisartut maannakkut siulittaasuata Kim Kielsenip ataatsimiinneq ammarpaa.

Suleqatigiinnissaq pillugu ima aallartippoq:

- Oqaloqatigiinnikkut suleqatigiinnikkullu allannguiniarluta kissaativut aatsaat piviusunngortissinnaavavut, aallarniilluni oqarpoq.

Naaja H. Nathanielsen Folketingimut qinersisoqarnera pissutigalugu sulinngiffeqarnissamik qinnuteqarsimasoq aamma oqarpoq.

Vivian Motzfeldt marsip 13-ianni Naalakkersuisunit tunuartoq Inatsisartunullu ilaasortanngoqqittoq aamma paasissutissiissutigaa.

Taamaattumik Anders Olsen Siumumeersoq ilaasortaajunnaarpoq.

- Neriuppunga ataatsimiinnivut nuannersumik angusaqarsuserusuttumillu ingerlassasut, Kielsen oqarpoq.