Pipaluk Lynge Inatsisartuni sulinngiffeqartoq – Peter Olsen sinniisussatut aggersarneqarpoq

Ane-Marie Petersen
efterårssamlingen2026

Inatsisartunut ilaasortaq Pipaluk Lynge (IA) inuttut peqquteqarluni Inatsisartuni sulinngiffeqarpoq. Inuit Ataqatigiit allattoqarfiani pisortaq Edvard Lyberth Mørch  Sermitsiamut paasissutissiivoq.
Pipaluk Lyngep sulinngiffeqarnera septembarip 22-ani aallartippoq, maannalu sapaatit akunnerisa pingajussaat ingerlalluni. 
Peter Olsen Inatsisartut ukiaanerani ataatsimiinneranni sinniisussatut taamaammat aggersarneqarpoq.

Pipaluk Lynge Inatsisartunut qaqugu uteqqissanersoq suli nalunarpoq. Sulinngiffeqarneratalu qanoq sivisutiginissaa paasissutissiissutigineqarani.

Inatsisartuni ilaasortat 31-usut Inatsisartut nittartagaanni ina.gl-imi aqqi allaqqasinnaammata Pipaluk Lynge tassani ilaanngitsoq allattoqarfimmi pisortap ilanngullugu paasissutissiissutigaa. Pineqartorli sulinngiffeqartutut aamma nalunaarsorneqaqqavoq.

Inatsisartunut qaqugu suliartoqqissanersoq suli nalunarpoq.

Pipaluk Lynge Inatsisartut Nunanut Allanut Sillimaniarnermullu Ataatsimiititaliaanni siulittaasuugaluarpoq, atuuffimminiilli tunuarnini septembarip 22-ani tamanut nalunaarutigaa. Parteeqataa Nivi Rosing ataatsimiititaliami tassani maanna siulittaasuuvoq.

Pipaluk Lyngep politikkikkut piffissami sivisuumi suliaqareerluni, ilaatigut Kalaallit Nunaata USA-mut NATO-mullu attaveqarnera pillugu, siulittaasutut tunuarnissani aalajangiussimallugu Facebookimi quppernermini saqqummiussamini kingullermi allaaseraa.

Kalaallit Nunaata nammineq aalajangiisinnaassusaa sulissutigalugulu nunanut allanut sillimaniarnermullu politikkimut tunngasuni Kalaallit Nunaata, Danmarkip Savalimmiullu assigiimmik paasissutissinneqartarnissaat anguniarsimallugu ilaatigut allaaseraa.

- Naatsorsuutigineqarsinnaajuaannarpunga, tamannalu tulluusimaarutigaara, tapersersorneqarnini pillugu qujalluni allappoq.

Powered by Labrador CMS