Apummi isiginnaartitsineq

Qamuteralaat sumiiffimmit sumiiffimmut assartuinernut taamaallaat atorneqartanngillat. Aamma pinnguarnermut, takutitsinernut unamminernullu atorneqarsinnaapput. 

Tamanna qamuteralannik sukkaniuttartut pikkorinnerpaat aqqanillit uppernarsarpaat, taakkumi arfininngornermi apriilip aqqaneq-aappaanni Quassussuup tunuani unammipput, siullermeersumik ”Greenland Hill Climb Championship”-imi – tassa tatsimit qaqqap qaavanut sukkanerpaamik qaqiniunnermut, aqqutissatut nalunaarsukkat inissinnissinneqarsimasut kaajallallugit unammigamik.

– Unammiffigineqartoq teknikikkut ilungersunartuuvoq, aammali issangialaarluni taamaattumillu unammiffik quasalluni, ingammik finalimut anngunniunnermi finalimilu. Taamaakkaluartoq naggataatigut sukkasuumik unammisoqartoq, Lasse Trolle, aaqqissueqataasoq aamma nammineq sukkaniunnermi peqataasoq oqaluttuarpoq.

USA-mit isumassarsisitaaneq

Nuummi unammineq Jackson Hole Snow Devils Hill Climb-imik taaneqartartumit isumassarsiarineqarpoq. Taanna USA-mi Wyomingimi 1975-imi aallartinneqarpoq, ullumikkullu Canadami USA-milu qamuteralannik unammisartunit pikkorinnerpaanit 300-nit amerlanerusunit peqataaffigineqartarluni aamma isiginnaartorpassuaqartarpoq, ulluni pingasuni sangusaarnermi, tinngallattaarnermi allarpassuarnillu unamminerit assigiinngitsut malinnaavigineqartarlutik.

Lasse Trolle ikinngutinilu Victor Meinel — unamminermi normu 2-nngoqqammersoq — Wyomingimi angalaarsimapput Jackson Hole-milu qamuteralannik ingerlaarnermik misiliisarsimallutik, inuussutissarsiutigalugu qamuteralattartut arlallit peqatigalugit.

– Ikinngutigiittut inuusuttuaraanitsinniilli qamuteralannik angalaartarpugut. Nunatsinni pisoqartitsilluta aaqqissuusserusulluta, ukiuni kingullerni oqaloqatigiissutigisaratsigu. Wyomingimit januaarimi angerlaratta unammisitsisarnerminnilu qanoq aaqqissuussisarnerannik malittarisassaallu pillugit paasisaqarnerulaarluta, Greenland Hill Climb Championship siullermeersumik pisussaq pilersaarusiulerparput, Lasse Trolle oqaluttuarpoq, taassumalu inuit arlallit, ilaatigut Larseeraq Egede, unammisitsinissamut atatillugu allaffissornikkut suliaqarnissamut piareersimasoq, suleqatigilerlugit.

- Pilertortumik suleqatigiit qulingiluanngoratta ullorlu pilersaarusiorlugu aallartilluta. Inersimasut unamminissaasa saniatigut aamma meeqqat unamminissaat kissaatigalugu isumaqatigiippugut. Aaqqissuussinerlu piareerpoq. Tamatuma kingorna suliffeqarfiit allaffigisaqattaarpavut aningaasatigut ikiorseerusunnersut apeqquteqarfigalugit. Soqutiginnittullu amerlaqaat, Larseeraq Egede oqaluttuarpoq.

Meeqqat unamminerat

Aaqqissuisut aappaagu qanoq pitsaanerusumik aaqqissuussisinnaanerlutik isumassarsianillu pitsaasunik siunnersuutinillu amerlasuunik tigusaqarput. Taamaattumik maanna peqatigiiffiliorput, taamaalillutik aaqqissuussinerit aaqqissuulluarsinnaaniassagamikkik aningaasanillu tapiisinnaasunut qinnuteqarsinnaaniassagamik.

Meeqqat unammineranni qulit peqataapput, unamminerallu ingerlalluarluni. Nukappiaqqat niviarsiaqqallu aqqaneq-marluk tikillugit ukiullit peqataasinnaapput.

– Meeqqat ingerlaarnerminni nuannaarnerat takullugit pikkunaqaaq, isiginnaartullumi ajunngitsumik nukissaqalersitsinerat nuanneqaluni. Ukiut tamaasa taamatut sukkaniutsitsisarsinnaanissarput isiginnaartorpassuaqarsinnaasarnissaalu neriuutigaavut, Larseeraq Egede oqarpoq.

Aningaasaliisut ajugaasullu

Aningaasaliisut ilagaat Royal Arctic Line, qamuteralannik sinerissamit assartuinermut aningaasaleeqataasoq. Tamatuma saniatigut najukkani pisiniarfiit assigiinngitsut sinerissamit peqataasut timmisartornissaannut tapiisuupput.

Inersimasuni Max Madsen Sisimiuneersoq ajugaasuuvoq, maannalu Greenland Hill Climb Championships-ip siullerpaamik ingerlanneqarnerani ajugaasutut imminut taasinnaalluni. Taanna gavekortimik 30.000 koruuninik nalilimmik akissarsivoq. Ajugaasup tullia tassaavoq Victor Meinel Nuummeersoq, Jaqqa Grønvoldilu ajugaasut pingajuattut inissilluni.

”Tupinnaannartumik ingerlalluni, eqqarsarluarluni piumassuseqarluarlunilu Max ajugaaniarluni aalajangersimavoq, ukioq mannalu qamuteralannik unammiuaarnermi unammillernarnerpaami pissartanngorniunnermi piumasaqaataasunik takutitsilluni. Max pilluaqqungaarlugulu Sisimiut pissartanngorniunnermi maanna pissartanngortitsinera nuannaarutigaarput. Angusaq angisoorujussuaq neriuutigaarpullu suli amerlanerusut timersuummik soqutiginnillutik aallartitsinissaminnut isumassarsisitaasimassasut”, aaqqissuisunit pisup kingorna taama oqaaseqartoqarpoq.

 Timersuut pillugu oqaluttuat nuannersut

– Nunatsinni unamminerit amerlanerusut aaqqissuussinnaanissaat takorluugaraarput. Qamuteralannik timersuut akuerineqartariaqarpoq paasineqartariaqarlunilu. Aamma qamuteralannik timersuut pillugu oqaluttuanik nuannersunik tamanut oqaluttuartariaqarpugut, Lasse Trolle oqarpoq.

 Grønlands Bådcenter / Orsiivik aaqqissuussinermut 50.000 koruuninik pingaarnertut aningaasaliisuuvoq. Tamatuma saniatigut Kommuneqarfik Sermersooq, Nuuk Transport, Bolt Lamar, Nuuk Handymand Aps, Arctic Auto og Detailing, Qiviut, Sarfalerisut og VVS, Bifrost Motors, Permagreen, Autonord, Kalaallit Nunaanni Allaffimmioqarfik, Arctic Star, Nuuk Rental, Nuna Advokater, Inuk Travel, Royal Arctic Line, Nuuk Marine Center, Wrap Skilte Service aamma Raw Arctic aningaasaliisuupput.