MOTOORI
Deres Auto saqqummersitsivissuarmik ammaalertoq
Deres Auto biilinik 30-t tungaannut amerlatigisunik saqqummersitsiviusinnaasumik Nuup ilaani Industrivejimi ammaangajalerpoq
Biilinik saqqummersitsivissuartaassami init quleriit allersaat 400 m2-t missaattut angissuseqassaaq, ininilu alliup tullia kingoraartissaasivittut atuuttussaq aamma 400 m2-t missaattut angissuseqassalluni.
Assi: Oscar Scott Carl
Sialussuartillugu
nittaalartalimmilluunniit anorersuartillugu biilinik nittarsaassilluni nuannertuaannanngilaq.
Tamannali qujanartumik ajornartorsiutaajunnaangajalerpoq, Deres Autommi biilinik
saqqummersitsivissuartaassaa ammarpat, biilisilersaartut qaasiinngikkaluarlutik
assaalinngikkaluarlutilluunniit biilinik nutaaliaanerpaanik takusaasinnaanngussapput.
– Biilinik saqqummersitsivissuartaassami init quleriit allersaat 400 m2-t
missaattut angissuseqassaaq, ininilu alliup tullia kingoraartissaasivittut
atuuttussaq 400 m2-t missaattut aamma angissuseqassalluni, Deres Autop pisortaa
Michael Østergaard oqarpoq.
Biilit nutaaliaanerpaat
Deres Autop Nuup ilaani Nuussuarmi illuutai tassaalerput Industrivej 37,39,
41,43 aamma 45, illuutaatalu ilaat tassa saqqummersitsivissuartut atuutissalluni.
– Biilinik saqqummersitsivissuartaassatta ammarnissaanut natilersornissaa nakkutilliissutinillu
filmiliuutilersornissaa amigaataaginnalerput, Michael Østergaard oqarpoq.
Deres Auto
Hyundaimeersunik, Toyotameersunik, Mercedesimeersunik, Mitsubishimeersunik
biileerniartarpoq, Kinamilu biililiorfittaameersunik tassa Navorimeersunik tuniniaalertussanngungajalerluni.
Biilit tuniniakkatik biililiorfinnit taakkunaneersut amerlanerpaartaat saqqummersitsivissuartaamiitittassavaat,
biilillu allat soorlu assartuutit pisarnertut silatiminniitiinnartassavaat.
Biilinik saqqummersitsivissuartaassaq biilinut 30-t missaannut inissaqartitsissaaq.
Assi: Oscar Scott Carl
– Silatitsinniittut 50-it missiliortarpaat, taamaammat biilit tuniniakkatta
nutaaliaanerpaartaat saqqummersitsivissuarmiitittarumaarpavut, sinnerilu silatitsinniittarumaarput.
Silatitsinniittummi aasakkut pujorallilertortarmata ipertoorujussuanngortarput,
sapaatip akunneranut pingasoriarluta sisamariarlutaluunniit serpartaraluaraangatsigilluunniit.
Aamma ukiukkut piffissap ilarujussuani aputaajaqqaarlugillu kissasseqqaartarpavut
biilisilersaartunit takusarneqartinnagit.
Biilinimmi nillertorujussuarnik
nittarsaassiniarneq oqitsuinnaasanngilaq, Michael Østergaard oqarpoq.
Ammarnersiorneqassasoq
Deres Autop biilinik saqqummersitsivissuartaassaani juulip ingerlanerani ammarnersiussangavaa,
saqqummersitsivissuartaassanilu ammaanersioreeruniuk biiliinnaanngitsunik
aammali umiatsianik illorsuarmi tassani aamma saqqummersitsilersaarluni.
– Illorsuartaassatta qanoq atorsinnaanissaanut isumassarsiarpassuaqarpugut,
Michael Østergaard oqarpoq.
