Ivana
Nikoline Brønlundip panimminik Aviaja-Luuna Hvidovre Hospitalimi
ataasinngornermi aggustip aqqarngani ernivoq.Pania inunngoqqammertoq
Høje-Taastrup Kommunemit arsaarinnissutigineqariarluni angajoqqaarsiassaanut
tunniunneqarpoq.
Ivana
Nikoline Brønlundip panini qanittukkut nalunaaquttap-akunnerini marlunni
siullerpaamik najorpaa, minutsilli 20-t sioqqullugit avissaartitaallutik.
Najorsinnaaneranut siunnersorti naapertorlugu Aviaja-Luuna puullaaqilermat
taamaattoqarpoq.
NUUMMI AKERLIUSSUTSIMIK TAKUTITSINEQ
Ilinniarnertuunngorniaq
Siumumilu ilaasortaq Oliver Bech Inatsisartoqarfiup saani aggustip 21-ani
akerliussutsimik takutitsinermik aaqqissuussivoq. Qaaqqusissummi ima allappoq:
”18-inik ukiulik Ivana Brønlund panimminik erninerminit akunneq ataasiinnaq qaangiuttoq
pinngitsaalineqarluni arsaagaavoq. Oqartussat "allunaatut
taaneqarsinnaasoq" isumaqarput – naak kalaaliugaluartoq Kalaallit
Nunaannilu ilaqutaqaraluartoq. Inatsisip L139-p, FKU-mik unitsitsisussap,
atuutilersinneqarnissaa sioqqutitsiarlugu FKU atorlugu nalilersorneqarpoq.
Tamanna naapertuilluanngitsuliorneruvoq. Akuerineqarsinnaanngilaq. Nuummi
GUX-imi ilinniartut tapersersuipput. Naapertuilluarneq, meeqqat
toqqissisimanissaat kalaallillu ilaqutariit ataqqineqarnissaat piumasaraarput.
Ornigullusi tapersersuinitsinnik takutitseqatigisigut - killiliigit,
oqariartuummik siammartereqataagit siunissarpullu piullugu sorsunnitsinnut
peqataagit.
Ivana
Nikoline Brønlundip panimminik Aviaja-Luuna Hvidovre Hospitalimi
ataasinngornermi aggustip aqqarngani ernivoq.Pania inunngoqqammertoq
Høje-Taastrup Kommunemit arsaarinnissutigineqariarluni angajoqqaarsiassaanut
tunniunneqarpoq.
Ivana
Nikoline Brønlundip panini qanittukkut nalunaaquttap-akunnerini marlunni
siullerpaamik najorpaa, minutsilli 20-t sioqqullugit avissaartitaallutik.
Najorsinnaaneranut siunnersorti naapertorlugu Aviaja-Luuna puullaaqilermat
taamaattoqarpoq.
- Taama
pisoqarnera peqqarniippoq. Tassanngaannaq avissaartinneqaratta arnarsiaata
kissumiarnerani nujaatigut taamaallaat kunissinnaatitaavara, Ivana Nikoline
Brønlund oqaluttuarpoq. Taassuma panimi najornerani arnaa Gitte Brønlund
ilaavoq.
Høje-Taastrup
Kommunemik suliamik ingerlatsinerminni VISO-mi immikkoortortaqarfik immikkut
ittoq kalaallit oqaasiinik kulturiannillu ilisimasaqarfiusoq
attaveqarfigisimannginnamikku inatsisinik unioqqutitsinertik
nassuerutigineqarpoq. Aalajangiinerlu angajoqqaat piginnaanerinik
nalilersuinermi tarnip pissusaanik misissuutit isorineqaqisut
tunngavigisimanerat nassuerutigineqarpoq.
Isumaginninnermut
ineqarnermullu ministerip Sophie Hæstorp Andersenip kommuni suliami tamatumani
qanoq sulisoqarsimanera pillugu nalunaarusioqqullugu qinnuiginikuua,
nalunaarusiarlu kingusinnerpaamik aggustip 29-ani tunniunneqartussaavoq.
Kommunimit
naqissuserneqartoq
Nassuerutiginninnerli
Aviaja-Luunap angerlarsimaffiup avataanut inissinneqarnikuuneranut
allannguutaanngilaq. Kommunip inatsisinik unioqqutitsisimanera suliamut
sunniuteqassanersoq suli ilisimaneqanngilaq, Ivana Nikoline Brønlundilli
anaanatut piukkunnanngitsutut naqissuserneqareernini ernummatigaa.
– Danmarkimi
isumaginninnermut ineqarnermullu ministerip Sophie Hæstorp Andersenip
Høje-Taastrup Kommunep nassuiaateqaqqullugu qinnuigimmanga qujamasungaarlungalu
nuannaarutigaara. Høje-Taastrup Kommunilli inerniliutiginikuusani
attatiinnassagaa ernummatigaara, peroriartorninnimi aqqusaarsimasakka
sakkortuut tunngavigalugit tarnikkut napparsimasutut nittarsaappaanga. Suliami
allakkiat 2017-imeersut – qulinik ukioqarnini – uannut tunngasut atorpaat.
Kisianni aqqusaarsimasakka kinaassuseriinnanngilakka. Maanna aamma inuuvunga,
kommunilli taanna soqutiginngilaa.
Kalaaliusutut
taaneqarsinnaanngitsoq
Pisimasut
Ivana Nikoline Brønlundip eqqaasai meeraalluni atornerlugaasarsimaneranut
tunngassuteqarput. Atornerlugaanerit nammineq pisuussutiginngisai,
sioorasaarneqartarneranit pinngitsaalineqartarneranillu pissuteqartumik
isertuussaasimammata arnaata ilisimasimanngisai.
Ivana
Nikoline Brønlund taassumalu arnaa Gitte Brønlund naapertorlugit, kommunip
immikkoortortaqarfik immikkut ittoq kalaallisut oqaasiinik kulturiannillu
immikkut ilisimasalik attaveqarfigerusussimanngilaat. Inatsit
tunngavigineqartoq naapertorlugu ilaqutariit kalaaliusutut
taaneqarsinnaanngitsutut nalilerneqarput.
– VISO
Høje-Taastrup Kommunemit saaffigineqarpat, ukiorpassuarni Danmarkimi
najugaqarsimanera qallunaatullu ilitsoqqussaralugu oqaaseqartuunera
pissutigalugit kalaaliusutut taaneqarsinnaanngitsutut nalilerneqarnissara aamma
aarleqqutigaara. Kisianni kalaaliuvunga. Danmarkimi kalaallinik
angajoqqaaqarlunga peroriartorpunga, kalaallit kulturiannik perorsagaallunga.
Ilaquttavut kalaallit najugaqatigiuarsimavavut, kalaallinillu
tikeraarneqartuaannarluta. Angerlarsimaffinni qallunaatut kalaallisullu
oqaluttoqartarpoq. Aamma kalaalerpassuarnik ikinnguteqarpunga. Inuusuttut
assammik arsarlutik nunanut allanut unammisartuinut siorna toqqarneqarama
qaammat allortarlugu Nuummukartarpunga. Nuummiinngikkaangama
unammisartoqatikkalu sungiusaasullu Danmarkimiittut qanimut
attaveqarfigisarpakka.
Kukkusumik
tunngaveqarneq
Jeanette
Gjørret, Stage Advokatfirmameersoq, Ivana Nikoline Brønlundip
eqqartuussissuserisoraa.
– Meeqqanut
Inuusuttunullu Ataatsimiititap suliamut aalajangiinera takusimannginnakku,
taamaattumillu aalajangiinerminni suna pingaarnerpaatinneqarsimanersut
nalugakku, oqarusuppunga kommunip kukkusumik tunngaveqarluni aalajangiisimammat
taanna atorunnaarsillugu meeraq angerlartittariaqarpaa. Taamaammanuna VISO-mi
immikkoortortaqarfik kalaallit oqaasiinik kulturiannillu ilisimasaqarfiusoq
ilanngunneqartartussaasoq.
Meeqqat
pillugit inatsit aamma Naammagittaalliuuteqartarfik naapertorlugit,
"meeqqap angajoqqaaminiiginnarnera peqqissutsiminut
ineriartornermulluunniit ajoqutaasinnaanera takuneqarsinnaappat,
inunngorneraniit angerlarsimaffiup avataanut inissinneqartussaavoq".
- Anaanaasup
sakkortuumik atornerlugaasarsimanera arsaarinninnissamik
tunngavilersuutiginissaa naammanngilaq. Meeqqap inunngorneraniit
arsaarinnissutiginissaa immikkut ittumik pissutissaqartariaqarpoq. Kommuni
pisumi ima paasissutissaateqartigisussaavoq meeraq angajoqqaaminut
tunniunneqassanngitsutut aalajangiisinnaalluni.
Suliaq
Naammagittaalliuuteqartarfimmi septembarimi suliarineqassaaq.
