DANMARKIMI PINNGITSAALIILLUNI MEEQQAMIK ARSAARINNINNEQ NUTAAQ
Kommunip suliamik suliarinninnermini inatsisinik unioqqutitsinini utoqqatsitsissutigaa
Tallimanngormat isumaginninnermut ineqarnermullu ministerip suliamut akuliunneranit nalunaaquttap akunneri arlaqanngitsut qaangiunneranni, Høje-Taastrjup Kommune inatsisitigut pisussaaffitsik malillugu VISO-mi immikkut suleqatigiinnik attaveqarsimannginnerminnut Ivana Nikoline Brønlundimut utoqqatsitsissummik nassiussipput: ”Tamanna eqqumaffigisimanngilarput. Tamanna annertuumik utoqqatitsissutigaarput,” taakku allapput.
Høje-Taastrup Kommunip maanna Ivana Nikoline Brønlund pillugu suliami VISO-mi immikkut suleqatigiinnik, kalaallit kulturiannik oqaasinnillu immikkut ilisimasalinnik, inatsit ulloq 1. Jam akuersissutigineqartoq naapertorlugu attaveqarfigisassaminni, kukkusimanertik utoqqatitsissutigaat.
Assiliisoq: Trine Juncher Jørgensen
Isumaginninnermut ineqarnermullu ministerip Sophie Hæstrup Andersenip Høje-Taastrup Kommunep Ivana Nikoline Brønlundimik suliarinninneranik aarleqquteqarnerminik Sermitsiamut oqaaseqarneranit nalunaaquttap akunnialui qaangiuttut kommuni ilaqutariinnut utoqqatserpoq.
”Januar 2025-imili VISO-mut attaveqarnitsinni piffissaalluartillugu iliuuseqarsimalluta nalilerparput, Meerarli pillugu inatsisip ulloq 1. Maj 2025 allanngortinneqarneranut atatillugu inatsisitigut tunngavissaq inissimmat, VISO attaveqarfigeqqissimasussaagaluartarput. Tamanna annertuumik utoqqatitsissutigaarput,” Ivana Nikoline Brønlundimut allakkami, Sermitsiap takusimasaani allaqqavoq.
Nittartakkakkut quppernermi utoqqatsertut
Høje-Taastrup Kommune aamma tallimanngormat unnukkut suliaq pillugu tusagassiuutinut nalunaaruteqarput, tassanilu ”VISO attaveqarfigeqqinneqarsimasariaqaraluartoq kiisalu suliaq tassungalu isornartorsiut saqqummiunneqartoq tunuliaqutaralugit suliamik ingerlatsinertik misissoqqissimasariaqaraluarlugu,” allapput.
Kommuni ” inatsisitigut pisussaaffinnik ilisimaarinnillutik, tassani VISO-p atorneqarnera ilanngullugu” tamanna ullunik marlunnik sioqqullugu Sermitsiamut oqaraluarput.
Suliamili matumani taamaassimanngitsut matumani paasinarsivoq.
Panimmi takoqqinnissaa pisariaqartikkaa
Ivana Nikoline Brønlund kommunip utoqqatsitsissutaa sumulluunniit atorsinnaanagu Sermitsiamut oqarpoq. Panimmi utertinneqarnissaa pisariaqartippaa. Pania ataasinngornermi ullaap tungaa inuusimatsisartoq pinngitsaalissummik arsaarinnissutigineqarpoq.
– Paninnik pinngitsaalilluni arsaarinninnermik aalajangerneq atorunnaarsittariaqartoq isumaqarpunga. Suliamik suliarinninnermi inatsisit unioqqutinneqarsimatillugit aalajangernerup attanneqarsinnaanera paasisinnaanngilara. Tamanna inatsisinik illersugaanermut akerliuvoq, Ivana Nikoline Brønlund oqarpoq.
Høje-Taastrup Kommunip Ivana Nikoline Brønlund ilaqutaalu VISO-mik attaveqarneq pillugu maanna ataatsimiigiaqquai.
