Kinamiut biililiaat Navor Nunatsinni atugaalissasoq

Deres Autop biili orsussamik batteriimillu akuleriissitsilluni ingerlatilik Navor E5, juunip naalernerani Nuummut apuunneqartussaq neriulluarfigisorujussuuaa. Pineqartoq tassaavoq SUV inunnut arfineq-marlunnut inissalik, taamaallaat 250.000 koruunit missaannaannik akeqartoq.

– Navor Danmarkimi januaarimi saqqummersinneqaramili nuannarineqarluarpoq. Nuummut maanna apuutissavarput qanorlu isummerfigineqarumaarnersoq pissanngatigaara, Deres Automi pisortaq Michael Østergaard oqarpoq, taassumalu maannamut E5 qernertut tallimat tikisittussanngorpai.

EU-mit akuersissuteqartoq

NAVOR, DFSK Motorip Kinamiut biililiornermi suliffissui marluk Dongfeng Motor Group aamma Seres Group suleqatigalugit ingerlatseqatigiiffiutaanut ilaavoq. DFSK Motor Kinamiut biililiorfiini siullersaalluni EU-mit akuersissuteqarpoq. Navor E5 nunani 70-init amerlanerusuni ullumikkut tunineqartarpoq, maannamullu 3 millioninit amerlanerusut Navorimik, aamma “Fengon E5”-imik taaneqartartumik biileqarlutik.

Biilip qilaavatigut illersittagalik aamma kinguporsornermut assiliissutilik

E5 ilaqutariinnut biiliuvoq atortorissaaruteqarluartoq orsussamik batteriimillu akuleriissitsilluni ingerlatilik. Biili arfineq-marlunnik issiaveqarpoq, taakkunannga tunorliit marluk qivertinneqarsinnaallutik, taamaalilluni nassataasivik angisooq pissarsiarineqarsinnaalluni. E5 aamma qilaamigut illersittagaqarpoq, innaallagiatortunik issiaveqarluni aamma assigiinngitsunik atortorissaarutilimmik aquuteqarluni kiisalu Apple CarPlay/Android Auto-mut atassutilimmik angisuumik skærmeqarluni, tunuporsornermut assiliiveqarluni aamma biilip saneraanni innaallagiatortunik tarrarsuuteqarluni.

Orsussamik batteriimillu akuleriissitsilluni ingerlatilik

Biili benzinamik batteriimillu akuleriissitsilluni ingerlateqarpoq, tassa innaallagissamik motooriminik pingaarnertut atuisuulluni. Batteri pineqartoq 17,5 kWh-iuvoq innaallagissamik 70 kilometerit angullugit ingerlasinnaassuseqartoq. Tamatuma saniatigut 1,5 literimik orsussalimmik benzinatortumik motooreqarluni.

Navor E5, Skoda Kodiaq imaluunniit VW Touran assigalugit arfineq-marlunnik ilaasoqarsinnaavoq. Taamaattorli Navor taakkua marluk nutaajunerminni akiisa affaata missaannik taamaallaat akeqarpoq.

– Akia eqqarsaatigalugu Kalaallit Nunaannut tulluarpoq. Naak taamaallaat assakaasumigut siorlertigut nutsuisoqaraluarluni oqimaassuseqarami atorsinnaalluassaaq. Taamaamat tunisaalluarnissaa upperilluinnarparput, Michael Østergaard oqarpoq.