KNQK ukiuni arlalinni ukiumoortumik naatsorsuutinik tunniussisimanngilaq
Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup Sermitsiamut paasissutissiissutigisaat naapertorlugit KNQK-p 2021-mut 2022-mullu ukiumoortumik naatsorsuutai aatsaat apriilip 3-ani 2025-mi tigusimavai. Taamaalilluni peqatigiiffik piffissami sivisuumi naatsorsuutinik tunniussisimanngilaq, tamanna pisortanit tapiiffigineqarsinnaanissamut piumasaqaataagaluarpoq.
Foto: KNQK
Kalaallit Nunaanni Qimussertartut Kattuffiat (KNQK) ukiuni kingullerni ukiumoortumik naatsorsuutinik tunniussisimanngilaq.
Taamaattumik ukiup aallartinnerani peqatigiiffik pisortanit tapiiffigiumaneqanngilaq.
Kattuffiup 2024-mi 2025-milu Avannaata Qimussersuanik aaqqissuussinissamut 1 millionit koruunit sinnerlugit tapiliussatut qinnuteqaataa Inatsisartut aningaasaqarnermut ataatsimiititaliaata itigartippaa.
Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup Sermitsiamut paasissutissiissutigisaat naapertorlugit aatsaat apriilip pingajuanni ukioq manna KNQK-p ukiumoortumik naatsorsuutai tiguneqarput – taamaallaalli 2021-mulli 2022-moortut.
Taamaalilluni kattuffik piffissami sivisuumi naatsorsuutinik nassiussinngilaq, pisortanit tapiiffigineqarsinnaajumallutik tamanna piumasaqaataagaluarpoq.
Allamit aningaasaliiffigineqarneq
Taamaattorli KNQK amerikamiunit aningaasaliisunit assartuinermut 1,4 million koruunit missaannik aningaasanik pissarsisimavoq.
Tamatuma saniatigut KNQK-p siulersuisuini eqqissiviilliortoqarpoq. Sermitsiamut paasissutissat naapertorlugit siulittaasup tullia ilaasortaajunnaarsinneqarpoq, sulilu ilisimaneqanngilaq sooq taanna ilaasortaajunnaarsinneqarnersoq, aamma kina siulittaasup tulliatut maanna inississimanersoq.
Sermitsiap siulittaasoq Mikkel Jeremiassen arlaleriarluni mailikkut, sms-ikkut oqarasuaatikkullu attaveqarfiginiartaraluarpaa, sulili akinngilaq.
USA-p kattuffimmut aningaasaleeqataanerata Kalaallit Nunaata USA-llu akornanni diplomatiskiusumik ajornartorsiortitsinermut qitiutinneqarpoq, Usha Vancep marsimi nalunaarutigimmagu qimussimik sukkaniunneq isiginnaariartorlugu Kalaallit Nunaannut tikeraarniarluni, tassa Amerikamiut oqartussaasuisa Avannaata Qimussersua aningaasaleeqataaffigimmassuk.
