KNR-imit soraarsitsinerit TP-mi siulittaasup tupaallaatigai
KNR-ip aqutsisuisa nutaarsiassaqartitsivimmi sulisoqarnerup tungaatigut tatineqareersumi sulisunik sisamanik soraarsitsinerat sulisut peqatigiiffiani siulittaasup tupaallaatigaa.
Assi: Oscar Scott Carl
Nutaarsiassaqartitsivimmi sulisut sisamat KNR-imit tallimanngornermi soraarsinneqarnissaat aalajangerneqarpoq. Sermitsiap paasissutissaatai naapertorlugit taakkuupput aaqqissuisut marluk nutserisullu marluk.
Arnaq Nielsenip, Kalaallit Nunaanni Tusagassiuinermik suliaqartut Peqatigiiffianni siulittaasup, soraarsitsinerit paasiuminaatsippai:
- Tupannarpoq, ilaasortatta aamma tupaallaatigeqaat. Suliffimminnik annaasaqartut sulilu atorfillit, oqarpoq, nangillunilu:
- Peqatigiiffik paasitinneqarpoq, maannakkullu ilaasortavut ikiorniarlugit sapinngisatsinnik iliuuseqarpugut.
Qineqqusaarnerup sammineqarneranut sunniuteqassasoq
Soraarsitsisoqarnera kisimi alianarani qineqqusaarnermut maanna ingerlasumut aamma kinguneqassasoq taanna isumaqarpoq.
- Ilaasortatsinnut pisoq alianarpoq aammali Kalaallit Nunaannut tamarmut. Nutaarsiassaqarfimmimi sulisut ikinnerulerput. Qineqqusaarneq pillugu nutaarsiassiisarnermut sulisut tamarmik pisariaqartinneqarput.
- Innuttaasut nutaarsiassanik sukumiisumik saqqummiussiffigineqartartussaapput, aamma qanoq pisoqarneranik paasissutissinneqartartussaallutik – ingammik maanna qineqqusaarnermi. Soraarsitsinerit KNR-ip nutaarsiassaqartitsiviani sulisunut sinneruttunut suli ilungersortitsinerulissapput. Suliassarpassuaqareerpormi maannalu ikinnerullutik suliarisussanngorpaat, Arnaq Nielsen oqarpoq.
Soraarsitsinerit KNR-imi ajornartorsiutinik aaqqiiumaartut taanna isumaqanngilaq:
- Aqutsisut iliusaat paasiuminaappoq. Kalaallit Nunaanni kikkut tamangajammik aamma nunatta avataaniittut amerlasuut KNR ukiuni kingullerni ajornartorsiuteqaqisoq nalunngilaat.
- Soorunami isumaqatigiissummut akerliusumik sulinermik unitsitsineq tapersinngilarput, kisianni immikkoortortaqarfimmi sulisussaaleqiffiungaartumi ilaasortatta soraarsinneqarnerat suli tupaallannarpoq, Arnaq Nielsen oqarpoq.
Aaqqiissutissamut iluaqutaanngitsoq
Suliffimmi atugassarititat, sulisut naammagisimaarinninnerat allallu pissutigalugit ajornartorsiutit arlaleriarlugit qaqinneqartartut oqaatigaa:
- Tamanna pissutsinik aaqqiissutissaanersoq pitsanngorsaatissaanersorluunniit takujuminaattarpoq – ilaasortanut sinneruttunut, aammali KNR-ip tusagassiutitut ingerlalluartutut suliffeqarfittullu toqqissisimanartutut tusaamaneqarneranut.
- Ilaasortat soraarsitsinerit aliasuutigingaatsiarlugulu tupaallaatigingaat takusinnaavara.
TP-mi siulittaasoq naapertorlugu ilaasortat soraarsinneqartut nutaarsiassaqartitsiviullu sulisui sinneruttut - immaqa ullumikkut, kingusinnerpaamilli sapaatip-akunnerata naanerani — ataatsimeeqatigineqassapput.
