KNR-ip pisortaa: Isumaqatigiissutit unioqqutillugit sulinermik unitsitsineq ilungersunartumik kinguneqarpoq

KNR-imi aqutsisut tusagassiorfiup innuttaasunut kiffartuussisup nutaarsiassaqartitsiviani sulisut sisamat soraarsinniarlugit tallimanngormat aalajangerpaat. Sulisunut atugassarititat akerlerleralugit sulisut 16-it februaarip 27-ani sulinerminnik unitsitsinerisa kingorna soraarsitsineq pivoq.

KNR-ip nutaarsiassaqartitsivia sivisuumik sulisussaaleqinermik suliffimmilu avatangiisinik ajornartorsiuteqarnermigut tatineqaqqavoq. Qineqqusaarnerup nalaani sulisunik sisamanik soraarsitsinerup pissutsit ajornerulersinnginnerai pisortaagallartoq Bjørk Lange Olsen Sermitsiap aperaa:

- Sulisut sisamat soraarsinneqarnerat soorunami kalluaavoq. Kisianni unioqqutitsilluni sulinermik unitsitsiniarnerup ingerlarnga eqqarsaatigalugu aqutsisut pisariaqarsorisimavaat suliassatta inuiaqatigiinnullu pisussaaffitta qitiutinneqarnissaat, pisortaq allakkatigut akissummini oqarpoq nangillunilu:

- Unioqqutitsilluni sulinermik unitsitsineq KNR-ip ingerlatsineranut annertuumik akornusiivoq, taamaattumillu taamatut aalajangernissaq pisariaqarsimavoq.

Pingaarnertut suliassaq sanngiillisinneqarpa?

Qineqqusaarnermi tusagassiuutit innuttaasunik paasissutissiinissaq eqqarsaatigalugu immikkut pingaaruteqarput.

Apeqqut: Qineqqusaarnermi sulisut nutaarsiassanik suliaqartut taama amerlatigisut soraarsillugit – taakkunannga aaqqissuisut marluk – KNR-ip pingaarnertut suliassaanik sanngiillisitsinnginnerpa?

- Innuttaasunut nutaarsiassaarnissamik akisussaaffipput pimoorupparput. Taamaattumik sulisut qineqqusaarnermi unioqqutitsillutik sulinerminnik unitsitsinerat ajornartorsiutaavoq, Bjørk Lange Olsen allappoq, nangillunilu:

- Sulisuni sisamaasuni marluk nutserisuupput, taakku nutaarsiassanik suliaqarneq ajorput, aaqqissuisullu marluullutik. Aaqqissuisulli aappaa piffissami kingullermi atorfiminiinngilaq, taamaattumik nutaarsiassanik suliaqarnermut sunniuteqarnera aaqqissuisup ataatsip suliaanik naleqarput. Sunniutaa sapinngisamik minnerpaaffianiissasoq sivikinnerpaaffianiissasorlu qulikkaaniarlugu sulissutigaarput.

Aqutsisut attaveqarniarnerisa naammannginnerat sulisut ilaatigut isornartorsiorlugu sulinerminnik unitsitsipput.

Pisortaq: Malittarisassat malinneqassapput

Bjørk Lange Olsen naapertorlugu KNR-imi aqutsisut sulisut pitsaasumik oqaloqatiginiarsarisimavaat pissutsillu aaqqinniarlugit arlalinnik iliuuseqarsimallutit. KNR-imi immikkoortortanit allanit sulisunik ilaatigut ikiuuttoqarluni radioaviisillu qallunaatuua unitsikkallarneqarluni:

- Radioaviisip qallunaatoortaata matugallarneqarnera, KNR-ip oqaluttuarisaanerani aatsaat taama pisoqarnera, aqutsisut pissutsinik pimoorussisimanerannut aaqqiissutissanillu ujartuisimanerannut ersiutaavoq.

AAMMA ATUARUK

KNR-imit soraarsitsinerit TP-mi siulittaasup tupaallaatigai

- Iliuuserineqartut taakku sulinermik unitsitsinissaq pinngitsoortinniarlugu siunnersuutigineqarput sulisunilli akuerineqarsimanngillat. Tamatuma saniatigut sulinermut inatsisit isumaqatigiissutillu atuuttut malinneqarnissaat attattariaqarparput. Tamanna suliffeqarfinnut tamanut atuuppoq, aamma KNR-imut, pisortaagallartoq allappoq.

Apeqqut: MTU-p misissuinerata takutippaa KNR-imi aqutsisunut tatiginninneq appariartuinnartoq — pissutsit aaqqinneqarnissaat pisussaaffiittut isiginngiliuk - taamaappat- sulisunik soraarsitsisarneq qanoq ililluni tamatumunnga iluaqutaassava?

- KNR-imi aqutsisut sulisut atugaat pimooruppaat. Suliffimmi avatangiisit aamma sulisut tatineqarnerat pillugit unammilligassat ilisimavavut, aaqqiissutissarsiorlutalu sulilluta.

- Erseqqissaatigeqqissavarput sulinermik unitsitsineq, ingammik qineqqusaartoqarnerani, KNR-ip ingerlaneranut sulisunullu sulinermik unitsitsinngitsunut ilungersunartumik kinguneqartoq. Unammilligassanut piusunut aaqqiniarnermut iluaqutaanngilaq, killormorluinnaq iliorneruvoq.