KNR-ip tusagassiortut arlallit qineqqusaartoqarnerata nalaani soraarsikkai
Sermitsiap paasissutissaatai naapertorlugit KNR-ip nutaarsiassaqartitsiviani aaqqissuisut marluk nutserisullu marluk tallimanngormat soraarsitaapput.
Sermitsiap paasissutissaatai naapertorlugit nutaarsiassaqartitsivimmi sulisut katillugit sisamaat soraarsitaapput, taakkunannga marluk aaqqissuisut marluk nutserisuupput.
Foto: Leiff Josefsen
Obs: Aaqqissuisut marluk pineqartut allaaserisamut nutartikkamut ilanngunneqarput.
Qineqqusaarnerup sukaruttorfiani KNR-ip nutaarsiassaqartitsivimmi sulisut arlallit soraarsippai.
Sermitsiap tusarfinnit arlalinnit tamanna paasivaa.
Sermitsiap paasissutissaatai naapertorlugit nutaarsiassaqartitsivimmi sulisut katillugit sisamat, taakkunannga aaqqissuisut marluk nutserisullut marluk pineqarput.
Sulisut unioqqutitsilluni sulinermik unitsitsinerat aqutsisunillu oqaloqateqarusunnginnerat soraarsitaanerannut pissutaavoq.
Nutaarsiassaqartitsivimmi sulisut 16-it februaraarip 27-ani isumaqatigiissutit unioqqutillugit sulinerminnik unitsitsinerisa kingorna soraarsitsisoqarpoq.
Tusagassiorfimmi tamanut kiffartuussisumi sulisut atugaat aamma pisortat attaveqarfiginiarnerisa paasinnissinnaannginnerallu akerliussutsimik takutitsiffigalugit sulinermik unitsitsisoqarpoq.
Sulinermik unitsitsineq pissutigalugu sulisunut peqataasunut mianersoqqussutinik tunniussisoqarsimavoq.
Tusagassiorfimmi innuttaasunut kiffartuussivimmi taarseraappallaarnerat pissutigalugit nutaarsiassaqartitsivimmit saqqummersinneqartartut ukiuni arlertuni annikillineqartarput.
Suliatigut oqilisaassisoqarniarluni radio aviisip qallunaatuua piffissami aalajangersimasumi aallakaatinneqartarunnaarallassasoq qanittukkut aalajangiunneqarpoq.
Annga Lyngep januaarip 31-ani atorfimminit angerlartitaanerata kingorna Bjørk Lange Olsen maanna pisortaagallarpoq.
KNR-imi pisortat oqaaseqartinnissaat Sermitsiap sulissutigaa.
